24 février 2009 par L’infant d’Tournai  

Bonjour, savez, mes gins.

Ah bé cha, j’n’in v’viens pos ! On dit alfeos qui n’a pus rien qui va dins no p’tit pays, mais i feaut dire aussi qu’les Flaminds i n’feont rien pour arringer l’z’histoires !

Z’avez intindu l’réactieon d’l’Unieon Belche de fotbal dins l’affaire du match Genk-Tubize dusque les supporters limbourgeois i-aveot’tent berlé « Les Wallons, c’est du caca ! ».

Rien qu’cha, on veot d’jà tout d’suite à qui ç’que ch’est qu’on a à faire, éné ? Et l’Fédératieon, elle a tout juste répondu ch’teot des chants « ludiques », presque folkloriques. Si cha cha n’est pos ein manque de respect des Walleons !  Infin, quand on sait qu’à l’tiête,  i n’a béteôt pus qu’des flaminds pour diriger, on a tout d’suite compris et i n’feaut pos s’attinte à des miraques !

Acor hureux qu’nos politiciens i s’ormuet’tent pour moutrer qu’nous-éautes les Walleons, on vaut mieux qu’cha ! Et no Rudy DEMOTTE in tiête acor ! Pasqu’à l’allure que cha va, on va béteôt s’faire écraser par tous mes gins. Et quand on sait in puque qu’i seont les rois des agoneux, on pourreot bin s’faire mette in couleur.

Et l’pus bieau eximpe, ch’est bin l’suspinsieon du jeueu tournaisien Breleur qui s’a fait lli aussi mette in couleur, et là ch’est sans jeu d’meots, par des « stewards » de Tirlemeont qu’i-eont invinté tous des carabistoulles pour que l’cintre-avant tournaisien i n’meonte pus d’su l’terrain avant bin lonmint ! Et bin seûr on leur a donné raiseon. Si ch’n’est pos honteux ! Je m’deminte tout n’même si cha se s’reot passer ainsin si s’neom i-areot comminché par « Van… » ou bin si i-areot jeué in Flandres ?

L’suspinsieon elle n’areot seûrmint pos été l’même. On vit vraimint dins ein pays à deux vitesses. Si t’es du Nord ou bin du Sud, l’sanctieon elle n’est pos l’même !

In attindant, i n’feaut pus s’étonner qu’i-a des guerres quand on pinse que dins no Belgique, on n’se respecte d’jà pus. Pasque tout cha, pour mi, ch’est avant tout ein manque d’respect des Walleons et j’direos même puque, ch’est de l’provocatieon ! Je m’deminte si on fes’reot l’même qu’eusses…, quoisqu’i direot’tent ?

Essayez toudis, eine feos qu’vous vous pourménez d’sus l’digue à la mer, de canter « les Flaminds seont des andoulles… » et espliquez leu bin seûr qu’ch’est eine cancheonne folklorique ! Je m’deminte si cha va les faire rire ?

Allez, à l’feos qui vient, mes gins

L’infant d’Tournai