17 février 2009 par L’Picard d’ichi  

Eh bé m’z’amisses, cha ch’est wekene.

D’jà qu’aux alintours de l’fin novimpe, i-a tous les saints qu’on beot, qu’après cha, i-a les treos réveilleons, v’là qu’pou compléter l’affaire, i-a asteur l’Saint Valentin.

Mais cha, ch’est pos comme les eautes fiêtes, essaie toudis d’faire guinse comme à l’saint Eloi ou l’Sainte Barpe et t’vas vire comme te va ête orchu.

Pasque l’saint Valentin, t’as pos intérêt à l’oblier. Ouais, j’sais bin quand t’es tout nouvel’mint amoureux, i-a pos d’risque mais après….neon i n’a pos d’risque non pus, te m’diras. D’ailleurs i d’a des ceusses qui eont tell’mint pris l’avaince pou acater leu cadeau qu’au moumint d’l’offrir i n’sav’tent pus dus qu’i l’eont muché. I d’a d’z’eautes qui écrif’tent des poèmes ou bin qui pass’tent pa les facteurs d’amour, infin tous les plans i seont beons du moumint que te n’laiches pos passer l’date.

Mais alfeos…importé pa l’vie agitée qu’on mène, te pourreos justemint  laicher passer l’date, quand j’dis cha pourreot arriver ch’est vraimint fort rare pasque t’es attindu au tournant.

D’abord les fleuristes , i feaut ête fameus’mint berlou pou n’pos vire l’p’tits coeurs quand te passes pa d’vant leu boutique, après cha i-a les marchands d’parfum qui t’feont des réductieons que te demintes bin pourquoi ch’est si tcher dins les eautes périotes et puis…i-a t’feimme qui t’fait d’z’allusieons à peine voilées (pos t’feimme, …..les allusieons…) que si t’as pos compris ch’est qu’t’es ein rute albran.

Et si malgré cha, te l’oblies acore, bé, t’as l’air d’ein riche annochint l’jour vénu qu’t’as pus qu’à queurir dare dare chez l’fleuriste…si i-est acore ouvert et si i li reste eaute queosse que des fleurs séquées… ou alors d’faire l’saisi et d’dire que te n’l’aveos pos oblié mais que t’li réserfes eine surprisse et l’am’ner au restaurant …si i reste de l’plache.. (cha s’reot étonnant si t’as pos réservé) Dins s’cas-là, t’as pus qu’eine solutieon, faire l’grand jeu et li dire que t’as réservé ein City Trip à Paris ou ailleurs. Et j’espère pou ta que te n’queomptes pos su tes actieons Fortis pou payer l’voyache pasque te risques d’li payer seul’mint eine pourménate jusqu’in heaut du Meont Saint Aubert.

Asteur,si in lisant m’artique te t’rinds queompte que ch’éteot saint Valentin saim’di passée…bé, je n’voudreos pos ête à t’plache.

L’Picard d’ichi