Semaine 10 2009 par Pichoulit.  

J’pinseos pourtant qu’j’éteos pos pu biête qu’ein eaute (cha dépind qui ch’est l’eaute) et pos pus malin non pus (cha je l’sais bin) mais quand j’ouvère l’télé, i-a eine banse d’affaires que j’parviens pos à comprinte.

Ainsin, l’affaire Fortis. I feaut dire que comme j’ai pos d’actieons j’sus pos treop motivé pou essayer d’comprinte mais n’impêche tous ces affaires de liards, d’actieons cha m’dépasse : les ceusses qu'i faudreot qui dis’tent oui et qui dis’tent neon ou bin l’contraire, je n’sais pus. L’seule affaire que j’ortiens ch’est que j’n’voudreos pos ête à l’plache des gins qui ouèf’tent dins les aginces , qui n’seont pos actionnaires même si les liards i pass’tent dins leu mains mais ch’est pos à eusses et qui risquent d’s’ortrouver sins imploi. Cha fait eine affaire que je n’comprinds pos.

Après cha, on dit qu’on va faire eine inquête au parlemint pou savoir si i-a pos ein minisse qui a foutu des coules mais les esperts i dis’tent qu’on n’peut pos pasque i-a les séparations des pouvoirs. Tins v’là eaute queosse asteur, adeon i feaudreot faire simblant qu’i n’a rien eu.

Après cha, on apprind qu’on va quand même pouvoir mais autermint... Eine deuxième affaire que je n’comprinds pos.

Après cha, j’vas aller faire ein tour dins l’meonte judiciaire et j’apprinds qu’à Gand on aveot orlaché eine douzaine d’ priseonniers pasque on est seur qu'i-eont fait à r’bours mais on s’a trompé dins les papiers adeon i feaut les r’lâcher pou queurir acore après comme dins les grands jeux chez les scouts, bé, je n’voudreos pos ête à l’plache des policiers qu’on jeue ainsin avé leu pis.  Eine treosième affaire que je n’comprinds pos.

Eaute queosse : les grands patreons des banques et des usines à liards quand i pertent leu n’imploi, on dit qu'i z’eont dreot à ein parachute doré, cha veut dire assez d’liards pou vir arriver les fins d’meos et partir au solel sans s’in rinte queompte et l’ouverrier qui perd s’n’imploi, li i n’a même pos eine bouée pou asseurer à ses infants qu'i pourra payer l’cantine scolaire à l’fin du meos.  Acore eine séquoi que je n’comprinds pos.

Et cha continue, ein minisse qui perd s’plache (si,si cha arrife) du moumint qu'i-a été minisse longtemps assez, i continue à avoir l’sainte touche pindant deux ans, à ç qu’on m’a dit , l’temps d’s’orlancher. Mais ein jeone qui-a ç’qu’on appelle ein imploi précaire, si i perd s’plache, eh, bé i s’ortrouèfe au chômache.

Décidémint, j’n’y comprinds rien…..

Mais ch’est pos tout.

Je n’comprinds pos qu’Madame Lizin, elle peut aller chez l’coiffeur avé les liards qu’ein malate i-a donné pou faire eine prisse de sang.

Je n’comprinds pos qu’on peut vinte eine bâtimint de l’ville et donner les liards à ein club d’fotball

Je n’comprinds pos…

Je n’comprinds pos…..

Seur qu’on m’prind pou ein seot et qu’on pinse que j’vas avaler tout cha et qu’on va m’indormir avé l’Star Académy, Kolantha ou core eine eaute navet in pinsant qu’cha j’vas l’comprinte.

Allez , t’esquinte pos…j’ai tout compris.

Pichoulit