7 mars 2009 par  Catoupi  Magazine

Vous savez ç' que ch'est qu'ein agoneu ?  In français, cha veut dire "tricheur".  C'meot-là, on pourreot l' dire à bramint d' fotballeus (surtout in prumière divisieon), à chaque queop qu'i feont de l' comédie pour eusses avoir ein pénalty. 

D'z'injures ainsin, du temps des derbys, on n' d'intindeot d' tous les sortes dins les deux camps; et cha resteot du folklore, à part eine paire d'énergumènes ed' chaque côté qui z'éteot'tent ein p'tit queop trop excités, mais hureus'mint, i n' d'aveot pos d' treop...

Mais attintieon ! Depuis qu' l'unieon belche elle a décrété l' tolérance zéreo, i feaut bin faire attintieon à tout quoi ç' qu'on dit su l' bord du terrain, savez !

Bin seûr, i-a d'z'injures qu'i n' feaut pos laicher dire, et alors i veaut mieux faire halte-là.  Mais i-a eine paire de s'maines, "les wallons, c'est du caca", cha n'aveot l'air que d'ête eine beonne blaque pou l' présidint d' l'unieon belche qui rieot tout plein s' panche... (comme à l'habitute).  J'areos bin voulu vir ç' qui s'areot passé si cha areot été su l' deos des flaminds, des africains ou bin des arabes...

Tout d'ein queop, ç' brafe présidint i-a cangé d'avis pasque l'z'injures i-eont pris eine éaute tournure... Adeon, asteur les surporters i veont d'voir soigner leu langache.  Bé je m' deminte bin commint qu'on va faire pou délimiter les meots qu'on peut dire et les ceusses qu'on n' peut pos.  Pour orvénir à "les wallons, c'est du caca", j' sus seûr qu'i l'eont laiché faire i-a treos s'maines, mais qu' cha n' pass'reot pus asteur.

J'imagine d'jà ein surporter s'esclamer : " Mais cher adversaire, vous rendez-vous compte que vous vous êtes laissé choir sans qu'aucun contact ne vous fût occasionné ! C'est intolérable, et je suggère que monsieur l'arbitre vous octroie un carton de couleur canari"...

Infin, si vous voulez, i-a bin moyen d' trouver d'z'injures qui n' feont du mau à perseonne, comme i l' faiseot l' capitaine Haddock.  Alors, mi, j' vous propeosse eine paire de meots bin d' chez nous z'éautes, que l' présidint d' l'unieon belche i-ara bin de l' détoule  pou savoir si ch'est permis ou pos.  Surtout qu' ch'est pos tout des meots négatifs !

Alleons-y :  Aroteu !  Fouteu d' coules !  Mourdreu !  Mouquieu !  Fouteu d'gins !  Rambile !  Filouteu !  Arsoule !  Guernoule !  Marouleu !  Panch'lu !  Bas du cul !  Ach'vareu !  Avintageu !  Massou !  Démépriseu !  Démaqueu !  Choleu !  Purleu !  Incorneu !  Batt'lieu !

Beon, j' vas m'arrêter ichi, si vous in voulez acor, i vous feaut d'mander à l'Infant d' Tournai, i-in conneot tout plein.

Allez, beon match, binte d'albrans !

Catoupi