17 mars 2009 par L’Picard d’ichi  

V’là qu’on vient d’publier eine inquête des pus sérieusses qu’on a même vu qu’on in parleot à l’télé et dins les gazettes : l’lanque walleonne , elle est m’nacée et pire acore no lanque picarte avec.

Eh, bé, cha ch’t’ eine affaire. Dins l’même temps, j’lis qu’in France, ein incien minisse qui n’a pus d’eaute cosse à faire, i-a proposé que l’neom de l’Picardie i disparaisse comme régieon et v’là acore pire et tant mieux. Ah, neon, on n’va pos ichi tout détricoter ainsin.

Si t’es v’nu à l’orvue du chint’naire du Cabaret,t’as seur’mint vu l’scène que Jean-Pierre Verbeke i-a écrit su l’Renaissance dusqu’i diseot que l’Picarte à Paris, ch’éteot d’jà eine séquoi.

Si t’as d’jà parlé avec Bruno Delmotte, bé i t’espliqu’ra qu’no lanque picarte, ch’est po ein parlache de ducasse mais qu’ch’est bin incré dins l’histoire et si t’lis l’superpe ouvrache d’Pol Wacheul « Chint ans d’cabaret » te comperdras bin que ch’est eine pièche de no patrimoine qui n’feaut pos abandonner.

D’ailleurs, i d’a qui dis’tent (et j’in fais partie mais j’sais bin que ch’est pétête eine millette exagéré) que si Clovis, au lieu d’s’in aller à Paris, i-éteot resté chez nous z’eautes, bé ,on parl’reot l’Picard dins l’meonte intier et cha s’reot l’français qui s’reot eine lanque régionale. A quoi qu’cha tient…

In attindant, mi j’dis que l’Picard et no patois tournaisien, i feaut les intret’nir comme nous z’eautes on l’a fait au Picard des Infants i-a béteôt ein an (que l’temps i passe vite) et cha porte ses fruits, on fait d’z’animatieons dins les écoles, les p’tits proutes d’l’école de Wiers, i z’eont sorti ein CD, dins l’quartier saint Piat, i-a eine classe d’l’école communale et eine eaute d’l’école libre qui veont, avé l’aide du cabaret et des écrivains publics, rinte hommache au Pichou à l’fin du meos d’mai et ch’est pos tout.

Si t’éteos v’nu avé l’Cabaret canter au cercle des Tournaisiens à Louvain la neufe, l’sémaine passée, t’areos eu aussi t’ceour tout mansé in veyant ceulle beonne chintaine d’jeones tournaisiens canter, l’main su leu cœur, après avoir inl’vé leu casquette par respect « Les Tournaisiens sont là », ch’est ein fameux moumint d’émotieon et l’preufe que l’Picard, i vivra core lommint.

Mais i n’tient qu’à chacun d’inter nous à incourager tous les ceusses qui l’feont vife, v’nez nous vire au cabaret, v’nez à l’orvue du meos d’novimpe (t’éteos pus qu’cheonq mille l’ainnée passée, ch’est bin la preufe qu’on a no plache) ,allez vire nos amisses les Filles Celles ou acore l’relèfe Saint Eloi à Froyennes, ou les acteurs de l’kermesse Saint Antoine et tous les ceusses qui feont vife no cher patois à Tournai, à Mouscron, à Ellezelles et dins tout l’Picardie..

Allez, on queompte su vous z’eautes pou faire démintir les prévisieons d’l’Unesco dins c’domaine.

L’Picard d’ichi.