3 avril 2009 par  L’Infant d’Tournai  Magazine

Bonjour, savez, mes gins.

J’vas ichi m’faire taper d’sus pa l’comité mais j’n’areos pos su ténir m’lanque pus lonmint !

I-a été décidé l’sémaine passée de r’former deux clups in provinciale. L’but ch’est d’abord de faire jeuer nos jeunes. Insuite, ch’est d’faire progresser les deux clubs jusqu’in prumière provinciale pou pouvoir les aguerrir et leu donner l’niveau pou servir l’équipe fanion du Fotbal Clup.

Pou trouver les neoms des deux clups, i n’eont pos eu d’misère : cha s’ra l’Unieon et l’Racin’. Les prumiers i jeuereont in rouche et vert, et les éautes in guéaune et noir ! Cha on l’areot bin ed’veiné. Et n’vous savez pos l’meilleu ? Ch’est qu’i-a eu des candidats pour orprinte les deux équipes. Mais l’comité i f’ra appel à deux vrais tournaisiens : Marcel Rouneau i-intraîn’ra les ceusses qu’on appell’ra comme dins l’temps les Infants, et Jules Devos li i s’occup’ra les Rats.

Dins ein prumier temps, i jeuereont dins l’même divisieon, in quatrième bin seûr, et cha ch’est pour ortrouver des derbies comme dins l’temps.

Mais attintieon, si i feont tout cha, cha n’est pos pou rigoler savez. Ch’est dins ein but d’améliorer l’formatieon, comme i dis’tent ! L’problème, veyez au RFC, ch’est qu’on forme trop d’jeunes qui n’eont pos acor el niveau de l’Divisieon II. Et si i n’l’eont pos, ch’est pasqu’i n’saf’tent pos et surtout qu’i n’eont pos l’temps de s’perfectieonner. Et du queop, Jean-Claude Stocman et Jean-Michel Caink i z’eont eu l’idée de r’créer les deux clups comme dins l’temps. I jeureont chaquein leu tour au state Luc Varenne, mais l’diminche après-deîner comme dins l’temps.

I parait que quand Jean-Claude i-a anneonché l’nouvelle aux inciens supporters du Racin’, cha a été de l’folie. I danseot’tent, i canteot’tent comme si i v’neot’tent d’orgagner eine deuxième feos l’finale de l’Coupe de Belgique ! Et chez l’s’Unionisses, ch ‘éteot l’même, i-eont canté « Ch’est l’Unieon qui s’amène » tout l’soirée ! Et bin seûr l’prumière cosse à faire, cha s’ra d’orwettier dins l’journal, quand l’calinderrier i va sortir, l’date des derbies Unieon-Racin’ et Racin’- Unieon. Mais comme on l’a dit, i jeuereont l’diminche après-deîner pou n’pos faire concurrince à les « Sang et Or » qui restent tout n’même l’pumier Clup de l’chité des Cheonq Clotiers.

Et du queop, ch’est toute l’ville qui va orvife grâce au FC qui asteur, i-est bin installé in deuxième divisieon, et surtout grâce à l’Unieon et au Racin qui nous f’reont orvife des derbies folkloriques comme dins l’temps ! Savez, dusqu’i n’aveot qu’treos agints d’police pou dix mille perseonnes ! On n’aveot pos b’soin à ç’temps-là d’police montée et tout l’bazar.

Beon, allez, j’d’ai dit assez, j’m’in vas r’mette l’main su m’n’écharpe rouche et verte et j’attinds l’prumier derby avec impatieince !

Allez, à r’voir mes gins et à l’feos qui vient.

L’Infant d’Tournai