Semaine 18 2009 par Catoire  

« Heureux qui comme Ulysse a fait un beau voyage », ch’est l’prumière line d’ ein incien  poème qu’on d’veot apprinte par cœur quand j’éteos à l’Athénée.

On diseot, « heureux qui communiste » mais adeon ch’teot seul’mint pou rire. Pasque de ç’temps-là, mes gins, on n’ saveot pos treop commint certains heommes politiques briscadeot’tent nos liards. Asteur on l’sait, et cha n’est pos cha qui va nous rapurer.

Ainsin, pindant qu’ vous d’allez ouvrer tous les jours jusqu’à midi pou payer vos contributieons, pindant que vous approuvez d’ suife l’protocole de Kyoto  in copant l’chauffache et l’ leumière pou écolomiser l’énergie qui coûte si tchier, pindant qu’ vous queomptez vos liards jusqu’à la pus p’tite pièche in  busiant commint qu’ vous d’allez faire pou arriver à l’ fin du meos…eh bé, i d’a d’zeautes qui n’orwettent pos si près savez. Et allez roulez casquettes ch’est la foire aux capieaux !

Eine paire d’albrans du parlemint wallon i-z'eont décidé d’aller, d’su no queompte bin seur, in vacances de lusque in Californie. Et pos tout seus, bé nanan, i-z'eont imbarqué leu moitié comme cha nous, les contribuapes, on a payé doupe ! On a même payé acor ein treosième queop pasque,  dins l’gazette, on a bin espliqué que mes heommes i- z’orcheveot’tent  in puque eine seomme de chint chinquante eureos par jour ! Jusse pou leu p’tites dépinses !!

Quand on pinse qu'i-a des gins qui n’eont même pos cha pou minger par meos ! Ceulle dringuelle s’appelle l’ « Per diem ». Mi j’dis quand on s’ sert d’eine lanque étringère pour délommer eine séquoi ch’est pou mucher des drôles d’affaires savez.

Bin seur quand  i-zeont été démasqués, i-z'eont invinté eine bleusse : i d’alleottent sur plache pou s’ documinter su « l’culture in milieu aride ». Bé hasard, te dis cha à ein qu’vieau d’ beos i t’ deonne ein queop d’ chabot ! Et pou ç’ qui est des régieons arides, i n’ falleot pos d’aller si leon, i n’eont qu’à faire ein p’tit voyache in « Wallifornie » i pourreont vir toute  « l’aridité du milieu » : usines in ruines, routes in ruines, les gins à l’ tique et tout l’ reste.

J’ pinse, mes gins qu'i-est grand temps qu’ les votants i s’ défint’tent. Adeon, j’ai vu à l’ télévisieon qu'i-a des gins qui eont formé ein « comité d’ vigilance » pour surveiller tout quoi ç’ qu'i fabriqu’tent nos « heureux z’élus ». J’ sus chint pout chint d’accord avec eusses. J’vas vous espliquer pourquoi. In latin, « Ministre » cha veut dire « serviteur ».

Adeon quoi d’ pus normal qu’ nous eautes les patreons on survelle no personnel !

Catoire