24 avril 2009 par  L’Picard d’ichi  Magazine

Bé, v’là l’saiseon qui tout bell’mint arrife au d’bout.

On peut dire que nos joueux i-eont fait bin pus que d’nous inchanter tout au long des matches qui z’eont jeué et i z’eont même dû , comme tertous faire face à l’adversité, à ein arbitrache pos toudis à leu n’ avintache et même à des mintiries des gins d’Tirlemont qui n’eont pos raté l’coche d’mette ein club walleon hors jeu (mais on n’a pos dit no dernier meot, savez…) in accablant l’malhureux Breleur d’tous les maux imaginapes pou casser du suque su s’deos.

Mais avint d’faire el bilan, j’voudreos ichi vous parler d’respect et de l’conjuguer in treos temps.
L’prumier ch’t’ein queop d’gueule, l’deuxième ein queop d’cœur et l’troisième, ein queop d’espoir.

Queop d’gueule d’abord.

I m’arrife souvint de l’sémaine d’lire l’queompte-rindu du comité provincial du Hainaut. Hé bé, ch’est pos piqué des viers ç’qu’on peut lire là.

T’as des cadets, des minimes ou même alfeos des préminimes qui n’eont pus aucun respect d’l’arbite et qui n’se gên’tent pos pour imployer ein langache d’chartier quand ch’est pos d’mette l’main su li et je n’te parle pos d’certains délégués ou intraîneux qui n’eont rien à foute sur ein terrain. J’trouèfe même que l’sanctieon elle est alfeos bin cléminte. Je m’souviens d’Marcel Soyez quand i-éteot  intraîneu des cadets du temps du Racin’, bé t’areos pos osu li rinte t’maillot dins l’mauvais sens sans li dire sivouplait ou d’jeuer sans mette t’mailleot dins t’maronne et orlever tes cauchettes, i s’reot p’tête temps qu’on fasse acore l’même aujourd’hui, l’fotbal des jeones ch’est eine école de l’vie. Mais beon, i n’feaut pos généraliser les mauvaisses pratiques mais i feaut impêcher qu’cha prenne d’l’ampleur.

Queop d’cœur après.

Hé bé, ch’est pou nos joueux, leu n’intraîneu et tous les dirigeants d’no clup « sang et or », faire eine saiseon comme i z’eont fait avec talent pou l’z’eins, sagesse pou l’z’ éautes. On a fait ein championnat eximplaire sans ruer les liards po cassis et aller braire tout partout pou rinflouer les caisses, ein championnat avec abnégation, sérieux , esprit d’équipe et amour d’ses couleurs, on veot l’résultat. A tertous les joueux, à Mossieu Laverge, à Mossieu Stocman et tous les dirigeants, j’dis « Capieau » et j’dis respect.

Queop d’espoir infin

Bé ch’est à les gins d’Namur que j’voudreos m’adresser. Ch’est seûr que leu saiseon n’leu laich’ra pos ein souv’nir impérissape mais i falleot aussi du corache pou ormeonter su l’terrain chaque semaine in n’se veyant pos avincher au class’mint. Alors j’ai aussi bramint d’respect pou ces joueux et ces dirigeants. Pétête qui-areot suffi alfeos qu’ein ballon i rinte dins l’goal putôt que d’frôler l’piquet pou canger l’face d’ein match mais ch’est le sport. Alors, mi j’dis acore qu’j’ai beauqueop d’respect pou ceulle équipe qui n’a p’tête pos les honneurs du montant mais qui a mis s’pièche à l’édifice du championnat d’divisieon deux et j’espère pour eusses et pou l’fotbal walleon qui veont bin vite ormeonter pour nous ortrouver dins ceulle série qui vienn’tent d’quitter.

L’championnat i va béteôt serrer ses portes, on vous attind l’ainnée qui vient pou d’nouvelles avintures.

Allez les « sang et or ».

L’Picard d’ichi