5 mai 2009 par L’Orculeot  

Et Adeon ? Vous n’avez  pos oblier d’offère ein p’it queop d’ muguet à vo n’amoureusse, vo feimme ou vo mamère.

El’ meos d’ mai ch’est quand même ein bieau meos.  Cha  comminche  par ein jour de congé et puis i d’a ein’ paire qui suiftent avé l’Ascensieon et même alfeos l’ Pint’coute.

Ch’est l’ meos qu’les fleurs i s’ouvèrtent. Ch’est l’ meos qu’on comminche à minger les prumiers radis et les prumières salates du gardin. Ch’est l’ meos des fraisses. Ah les fraisses qu’on rétale sur eine tartine avec du chuque ou de l’castonate !

Mais vous z’allez dire que ç’que j’ raqueonte i n’ a rien à vire avec el’titre de m’ pétit  busiache. Et bé sifait ! El’ meos d’ mai ch’est aussi l’ traditieon du concours Prayez. Ch’t’ein concours pou s’ raminvrer el’ fameux canchonnier Adolphe Prayez qu’i-a composé eine banse de cancheons et d’ poèmes.

L’ ceu qui veut l’ faire i deot  écrire eine  cancheon, ein monoloque, ou ein poème in patois tournaisien. I peut queusir n’importe queu sujet ou bin i peut l’ faire sur el’ sujet imposé. C’t’ainnée chi ch’est «  Acor eine de faite ! ».

Alors si l’ cœur vous in dit, perdez vo pleume et faites el’ concours. L’réglemint i-est à l’office du tourisme et su no site sur internet.

L’Orculeot