12 mai 2009 par L’Picard d’chi.  

Quand t’ravisses l’calinderrier, t’es alfeos bin estamperné avé tous les neoms d’saints que t’peux trouver asteur. I t’a là des neoms que te n’d’as jamais intindu parler et d’z’eautes que te n’ortouefes pus.

Ainsin, par eximpe, m’comarate l’Orculot qui écrit ichi avec dins ceulle gazette, i sait qui deot planter penn’tières à l’saint Joseph et comme s’calinderrier, ch’t’ein qui a eu au garagisse rapport à les photos qui éteotent d’sus et qui aimeot fin bin, eh, bé saint Joseph, i l’a jamais trouvé (i n’a pos voulu s’mette à côté des photos, hasard)  adeon, ses penn’tières i seont toudis dins s’ermisse et i va d’voir minger des frites surgélées tout l’ainnée….

Mais on a aussi invinté des fiêtes d’tous les sortes, : les secrétaires, les miltaires, les journaleux et j’in passe, ainsin on fait vife l’commerce.

Mais beon, ch’est pos d’cha que j’veux vous parler aujourd’hui, ch’est d’eine fiête qui rest’ra toudis dins no calinderriers et même si elle ne s’y trouefe pos, elle s’ra toudis dins l’cœur de chaquein, ch’est l’fiête des mères.

I suffit d’vire les gins qui a chez les fleurisses ou acore l’effervescince qui a dins les classes d’z’écoles pour faire les cadeaux pou s’rinte queompte que tertous i veut profiter d’ ç’jour pou fiêter s’maman.
Pasque s’maman, on n’d’a qu’eine et on peut dire que ch’est l’pus bieau trésor qu’on peut avoir de toute s’vie. J’pinse à l’cancheonne que t’conneos p’tête de Marie Laforêt que l’titre, ch’est « cadeau » pasque tout l’vie d’eine maman, ch’est cadeau : cadeau de l’vie qu’elle deonne, cadeau du temps qu’elle deonne, cadeau de l’pasieienche qu’elle deonne, cadeau d’l’amour qu’elle distribue, cadeau d’l’orelle toudis tindue, cadeau du tracas qu’elle se fait pour ta, cadeau du bonheur tout simplemint.

Alors au-d’là des fleurs et des cadeaux, ch’est eine fiête bin méritée.

Et tertous ichi i pinse à s’maman et l’ceu qui a acore l’sanche d’l’avoir, bé i li fait fiête, i l’invite à deiner, i l’imbrache pus souvint qu’à s’tour, essayant ainsin d’li faire oblier tous les soucis qu’i li a deonnés, mais aussi de s’faire pardeonner de n’pos aller li rinte visite pus souvint, rapport à l’vie d’seot qu’tertous i mène à queurir à longueur d’journée (mais i-est d’jà pardeonné, eine maman cha met tout s’vie à comprinte et pardeonner).

Et si s’maman elle n’est pus de s’meonte, ch’est là qui s’rind queompte de l’plache qu’elle teneot dins t’vie et qu’elle tiendreot acore asetur si elle éteot acore là.. T’as alors s’cœur tout mansé pindant s’moumint d’ramivrances. Ah, si maman elle éteot acore là pou vire cha, pou m’deonner consel ou simplemint pou m’acouter….

Ainsin va la vie,. Mais l’fiête des mères ch’est aussi l’fiête de t’feimme (elle n’aime pos que t’l’appelles maman in d’eautes temps, mais ç’jour ichi, te peux…), elle ne rimpache pos t’maman mais par bin des côtés,elle est bin souvint aussi ein cadeau plein d’tindresse et d’attintieon. Oauis, j’sais bin qu’elle bertonne alfeos mais i feaut bin avouer qui-a d’queo à certains moumints.

Et te n’peux pos t’impêcher d’busier qu’tes filles (et t’belle-fille) elles s’reont ein jour maman, que t’feimme elle s’ra grand-maman (essaie toudis d’l’app’ler bobonne…même l’jour de l’fiête des mères…ç’queop chi…..)  et qu’ainsin, tes infants, elles f’reont l’même que t’maman, que t’feimme, elles s’reont pou leu z’ infants….CADEAU.

Beonne fiête, maman, beonne fiête à vous eautes toutes les mamans…….

L’Picard d’chi.