19 mai 2009 par L’Infant d’Tournai.  

Bonjour, savez, mes gins.

Je n’vous apprindrai rien in vous disant qu’dins eine paire de jours, dins no chité, cha s’ra l’fiête de l’accordéeon.

Verdi au soir, su l’Plache Saint-Pierre, et dins les invireons, i-ara tous des groupes d’accordéonneux qui, tout au leong de l’soirée…et eine beonne partie de l’nuit, i veont animer l’quartier au seon du pianeo à bertielle.

Feaut dire que ch’t’ein instrumint qui or’vient à la mote, éné ? Et ch’est comm’ cha que d’puis eine paire d’ainnées, l’lind’main d’l’Ascinsieon, i-a eine associatieon, qui s’appelle « L’accordéon moi j’aime », qui a mis sur pied eine fiête comme dins l’temps quand ç’qu’i-aveot bal musette dins les villaches et su les plaches.

Mais ichi, ch’n’est pos tout à fait l’même pasque les musiciens i pourmèn’tent dins les restaurants et les bistreots. I z’arrif’tent, i jeut’tent et i feont canter les gins. Bin seûr, i n’vous feaut pos oblier l’dringuelle pou les artistes ! Je n’vous dis pos l’ambiance qu’i-a là-d’dins, vu qu’i d’a bramint qu’i-orprenn’tent in chœur les cancheonnes et je m’deminte même si cha n’finit pos in farandoles !

On a l’impressieon d’faire ein ortour dins l’passé mais ç’qu’i-a d’pus amusant, ch’est qu’les jeones i seont les pus rabis après ceulle fiête. Ch’est seûr l’accordéeon i-a acor d’l’av’nir pa-d’vant li.

Et après cha, pou les pus corageux, l’diminche au matin, i-a eine balate « musicale »  à véleo. I-in a qui partent de l’Plache Saint-Pierre, in jeuant, in cantant…et in pédalant aussi à l’occasieon, et les éautes i s’in veont d’Lille Wazemmes. Et i s’ortrouèf’tent tertous à Baisieux pour ein pique-nique « d’accordéeonneux ». Ch’est seûr qu’i-ara là d’l’amus’mint !

N’s’inquiétez pos, i-a des carettes qui feont l’navette pou les ceusses qui seont esquintés et qui n’saf’tent pus ormeonter su leu véleo !

On peut dire que l’s’organisateurs i z’eont vraimint tout prévu ! I n’reste pus qu’à espérer qu’i n’eont pos oblié d’comminder l’solel pou ceulle balate ; mais cha, ch’t’eine éaute histoire.

Allez, eine beonne fiête d’l’accordéeon et à l’feos qui vient, mes gins.

L’Infant d’Tournai