9 juin 2009 par L’Picard d’chi  

On est  ichi in plein dins les fiêtes musicales, i-a eu l’accordéeon, i va béteôt avoir l’fiête de l’musique, on a pouvu raviser à l’télé l’concours Reine Elisabeth et dins tous les fancy-fair d’école, les infants i veont s’in donner à cœur joie pou canter du mieux qui peuv’tent. Ch’est l’fiête à l’musique et ch’est bin ainsin.

Quand j’busie à m’z’ainnées d’infance, i m’orvient des fiêtes d’famille dusque tertous i pousseot l’cancheonnette à l’fin d’ein r’pas bin arrosé.

I aveot des cancheonnes qui orveneotent toudis, d’z’airs pathétiques avé d’z’infants qui s’imbarqueotent su ein batieau qui chavireot ou acore des ringaines sintimintales dusque te demindes dusqu’i z’alleotent l’querre.

Mais i-a eine cancheonne qui m’marqueot particulièr’mint et que m’papa i canteot souvint. Cha s’app’leot l’histoire de not p’tite musique et ch’éteot l’histoire de l’société d’musique d’Marquain bin avint la guerre quarante.

Cha diseot au début « L’histoire de not pétite musique, si vous voulez j’vas l’raconter, ch’est fort facile quand on l’esplique, mais j’d’ai attrapé des suées… » Après t’aveos tout l’histoire des gins du villache avé l’instrumint qui jeueotent ou acore l’z’avintures pou aller jeuer dins les villaches alintour……J’ai d’jà d’mindé par ci par là, si quequ’ein i-areot acore s’texte (pasque mi, j’ai l’air)  mais bernette (si jamais l’ceu qui lit cha, i l’a  eh bé, i peut toudis l’invoyer au cabaret ou bin au Nord Eclite, cha m’f’reot bramint plaisi).

Mais ch’est comme toudis, on n’a pos busié à inregistrer et asteur, on n’d’a pus d’souv’nir.

Pourquoi que j’raceonte cha, eh bé, ch’est pos compliqué. I-a ein meos d’ichi, j’ai intindu jeuer l’société d’musique d’Eperchin. Queu plaisi d’vire et d’acouter ces artisses !!…Et tout d’ein queop, l’histoire de l’pétite musique, elle s’a ram’né dins m’tiête. J’veos acore l’photo de l’musique d’Marquain de c’temps-là et quand j’veyeos jeuer mes gins d’Epérchin, ch’éteot l’même sintimint d’bonheur  que j’liseos su l’visache des musiciens d’asteur que l’ceu que j’devineos  su l’portrait de l’musique de m’papa que j’warde ceulle photo bin précieus’mint. . Pasque eine société d’musique dins ein villache, ch’est du bonheur tout plein, Du bonheur pou les gins qui l’z’acoutent mais aussi pou les ceusses qui jeut’ent, rien qu’à vire l’communicatieon qui aveot inter tous ces musiciens te veyeos qui z’éteotent hureux. Au point que j’m’diseos qu’ch’est bin dammache que je n’sais pos lire eine note assez vite  et que j’n’peux pos jeuer avec eusses. J’devine aussi qu’leu troisème mi-temps cha n’deos pos ête du gâteau.

Ch’est seur, je n’rat’rai pos leu prochain concert ni si j’d’ai l’occasieon l’ceu d’eine eaute société d’villache pou l’z’acouter ch’est seur pasque ch’est d’z’airs intraînants qui t’mettent dins l’ambiance mais aussi pou les vire pasque l’bonheur i s’communique rien qu’à les raviser et aussi..pou  in boire eine avec eusses à la fin pasque je n’d’ai pos vu bramint s’in raller tout d’sute.

Mais quand j’y pinse, on dit bin eine société d’musique et qui dit société  dit des gins insanne, des jeones, des vieux, des bieaux, des laids ( i n’d’a pos des masses pasque quand i souritent les gins i n’seont jamais laids)  qui dit société dit bonheur d’vife avé l’z’eautes pou donner et orchevoir du bonheur, bé que l’meot société i-est bin queuzi dins c’cas-là….

L’Picard d’chi