23 juin 2009 par l’Picard d’ichi, l’Orculeot, l’Infant d’Tournai et Clovis  

Bonjour mes gins. D’puis l’ nouef du meos d’juin, l’Cabaret i n’écrit pus dins l’Nord Eclite. Ch’est arrivé tout d’ein queop et on n’a même pos eu l’ temps d’ vous dire d’ quoi  in écrivant ein dernier billet. Adeon, on a décidé d’ l’écrire quand même ceul dernier billet même si i n’ s’ra jamais mis dins l’ journal.  

« CH’EST F.I.N.I »

Ahais mes gins, ch’est l’dernier billet du Cabaret qu’on vous écrit ichi. L’dernier d’eine leongue série, puisque ceulle belle avinture elle a comminché l’ vingt et ein du meos d’ mars in deux mille six. No n’amisse, Mossieu Daniel Foucart, qui éteot l’chef d’édition à ç’ temps-là, i nous aveot d’mindé d’écrire ein billet in patois dins l’Nord Eclite.

Dins l’ liméreo ein, l’Infant d’Tournai i-aveot d’jà donné l’teon : « Cha fait qu’asteur, tous les mardis, vous allez nous ortrouver dins ceulle gazette et l’ein après l’éaute on va vous raqueonter tout quoi ç’qui s’passe dins no ville, dins l’pays et même pus leong qu’cha, mais toudis avec bramint d’humour ». Et i feaut croire que no n’orcette elle éteot beonne pasque on a bin vite su  qu’ bramint d’gins liseot’tent no billet. I d’a même qui acateot’ent l’ gazette l’mardi esprès pou lire nos carabistoulles ! Tournai ch’t’ein grand villache et on n’a pos b’soin d’ statistiques à la gomme pou savoir d’quoi savez !

L’secret de no succès ? Bé, i n’d’a pos. On a écrit comme d’habitute, avec ein cœur rouche et blanc, les « choses de la vie » alfeos gaies, alfeos eine milette moinsse.

Tout i-alleot fin bin, tout l’meonte i-éteot à l’coule d’or quand ein bieau jour de juin, on a appris qu’ Mossieur Foucart i-éteot muté à Mouscreon. Malhureus’mint, on a vite compris que l’nouvieau « rédac chef » i-éteot puteot « pète-sec » et puteot « sinsatieon »  qu’ « traditieon ». Ch’est l’air du temps, vous m’direz. Pétète mais ch’n’est pos su ç’n’air-là que  l’Cabaret i va danser, i-aime bin trop s’liberté. Et on est seûr que  tous nos Inciens dusqu’i seont asteur, i s’reont d’accord avec eç’ point d’vue.

Mais avant d’ déposer nos pleumes, on voudreot vous dire, chers amisses, qu’on a orsinti bin du bonheur à écrire nos p’tites chroniques et on espère que vous d’avez eu autant in les lisant. On vous ormercie pou vot’ fidélité et vos incourag’mints. Mais i n’vous feaut pos s’désoler, vous pourrez toudis nous ortrouver dins l’Passetoutoute.  Vife l’Cabaret !

Vos amisses du Cabaret : l’Picard d’ichi, l’Orculeot, l’Infant d’Tournai et Clovis

Bonjour mes gins. D’puis l’ nouef du meos d’juin, l’Cabaret i n’écrit pus dins l’Nord Eclite. Ch’est arrivé tout d’ein queop et on n’a même pos eu l’ temps d’ vous dire d’ quoi  in écrivant ein dernier billet. Adeon, on a décidé d’ l’écrire quand même ceul dernier billet même si i n’ s’ra jamais mis dins l’ journal.  

« CH’EST F.I.N.I »

Ahais mes gins, ch’est l’dernier billet du Cabaret qu’on vous écrit ichi. L’dernier d’eine leongue série, puisque ceulle belle avinture elle a comminché l’ vingt et ein du meos d’ mars in deux mille six. No n’amisse, Mossieu Daniel Foucart, qui éteot l’chef d’édition à ç’ temps-là, i nous aveot d’mindé d’écrire ein billet in patois dins l’Nord Eclite. Dins l’ liméreo ein, l’Infant d’Tournai i-aveot d’jà donné l’teon : « Cha fait qu’asteur, tous les mardis, vous allez nous ortrouver dins ceulle gazette et l’ein après l’éaute on va vous raqueonter tout quoi ç’qui s’passe dins no ville, dins l’pays et même pus leong qu’cha, mais toudis avec bramint d’humour ». Et i feaut croire que no n’orcette elle éteot beonne pasque on a bin vite su  qu’ bramint d’gins liseot’tent no billet. I d’a même qui acateot’ent l’ gazette l’mardi esprès pou lire nos carabistoulles ! Tournai ch’t’ein grand villache et on n’a pos b’soin d’ statistiques à la gomme pou savoir d’quoi savez ! L’secret de no succès ? Bé, i n’d’a pos. On a écrit comme d’habitute, avec ein cœur rouche et blanc, les « choses de la vie » alfeos gaies, alfeos eine milette moinsse. Tout i-alleot fin bin, tout l’meonte i-éteot à l’coule d’or quand ein bieau jour de juin, on a appris qu’ Mossieur Foucart i-éteot muté à Mouscreon. Malhureus’mint, on a vite compris que l’nouvieau « rédac chef » i-éteot puteot « pète-sec » et puteot « sinsatieon »  qu’ « traditieon ». Ch’est l’air du temps, vous m’direz. Pétète mais ch’n’est pos su ç’n’air-là que  l’Cabaret i va danser, i-aime bin trop s’liberté. Et on est seûr que  tous nos Inciens dusqu’i seont asteur, i s’reont d’accord avec eç’ point d’vue. Mais avant d’ déposer nos pleumes, on voudreot vous dire, chers amisses, qu’on a orsinti bin du bonheur à écrire nos p’tites chroniques et on espère que vous d’avez eu autant in les lisant. On vous ormercie pou vot’ fidélité et vos incourag’mints. Mais i n’vous feaut pos s’désoler, vous pourrez toudis nous ortrouver dins l’Passetoutoute.  Vife l’Cabaret !

 Vos amisses du Cabaret : l’Picard d’ichi, l’Orculeot, l’Infant d’Tournai et Clovis

Suivant >