28 août 2009 par  L’infant d’Tournai  Magazine

Bonjour, savez, mes gins.

Vous n’savez pos comme j’sus contint d’vous ortrouver dins l’gazette des « Sang et Or ». Et j’pinse bin qu’mes deux compagneons i n’attind’tent qu’cha aussi.

J’espère que vous avez passé d’beonnes vacances et qu’vous orvenez au stade Luc Varenne in pleine forme.

Pasqu’asteur, nous ov’là orpartis pour eine nouvelle saiseon et on voudreot d’jà tertous savoir commint ç’qu’elle va s’passer. Et cha n’s’ra pos eine partie d’plaisi quand on veot l’s’adversaires : Mons, Tubize, Dender, avec toudis l’Antwerp, Beveren, l’Lierse, l’Brussels sans queompter les surprisses qu’on pourreot découvrir dins eine paire de meos…

Bin seûr, comme tous l’z’ans, et comme dins tous les clups,  i-a eu des cang’mints. Ainsin on a ein nouvel intraîneur vu qu’Mossieu LAVERGE i n’a pus voulu rester avec nous-éautes. Des amateurs i n’d’a eu tout plein mais l’ceu qu’on n’a pos parlé et qu’i-éteot pourtant imballé, ch’est Zizi VANDERHOOST, qu’on a connu dins l’temps au Racin’ et à l’Unieon. I paraît qu’i-aveot tout’s les qualités pour rimplacher Laverge. Mais final’mint, ch’est Christophe DENIE qui-a orpris l’équipe et quand ç’qu’on sait tout l’ouvrache qu’i-a fait l’saiseon passée, on n’deot pos s’faire trop d’biles.

Bin seûr, j’conneos déjà des supporters qui veont critiquer pasque les résultats des matches amicaux i n’eont pos été fort fameux.

D’abord, j’leu dirai qu’ces matches-là, cha n’est foque des intraîn’mints et que l’résultat i-est moins important que l’manière. I n’feaut pos neon pus oblier qu’les adversaires, ch’n’éteot pos n’importe qui. Anderlecht, Courtrai, Mouscreon, Charleroi… Et on peut dire tout ç’qu’on veut, pour mi, i n’a que l’championnat qui queompte.

Et in parlant d’championnat, on peut dire que nos « Sang et Or » i l’eont bin comminché in orvénant d’Eupen avec ein point. Pasque quand on r’veot les imaches à No Télé, j’pinse bin qu’on a passé par eine pétite porte. Infin, l’principal, ch’est l’nul qui nous ordeonne l’espoir après l’défaite à Aud’narde in coupe de Belgique. Asteur on peut pinser à l’venue d’Ostende à ç’soir. Et d’ortrouver deux personnaches qu’on n’est pos prêts d’oblier ichi, Thierry PISTER et Grégory DELWARTE. On leu souhaite bin intindu d’faire eine beonne saiseon dins leu nouvelle équipe mais j’sus désolé pour aujord’hui, m’cœur d’Tournaisien i pinch’ra pou no n’équipe qu’on va incorager pou l’porter vers l’victoire !

Allez les « Sang et Or ». Allez TOURNAI

L’Infant d’Tournai