18 septembre 2009 par  L’infant d’Tournai  Magazine

Bonjour, savez, mes gins.

J’espère bin qu’vo moral i n’est pos acor atteint pasque pou l’quart d’heure, i n’a vraimint pos d’quoi pavoiser !

On m’dira tout ç’qu’on veux, mais si vous voulez m’n’avisse, on a d’vu j’ter ein sort sur no n’équipe pasque d’puis l’orprisse, i n’a rien qui tourne reond !

On n’queompte pus l’s’éclopés, on n’a pos bramint d’chance pindant les matches et du queop, l’démarrache i-est puteôt difficile.

Mais comme après l’plouèfe, ch’est toudis l’bieau temps qu’i-orvient, on n’a pus foque à attinte que l’mauvais nuache i s’in va. Et d’puis l’temps qu’i-est là, hasard qui n’va pus d’meurer lommint.

Seul’mint, i n’feaut pos croire qu’i n’a qu’ichi qu’cha n’va pos ! Perdez l’cas d’no n’équipe nationale ! Hé bé là au moins, i-a d’quoi braire. A croire qu’i n’veul’tent pus jeuer. Alors si même les liards, cha n’les intéresse pus, dusqu’on s’in va ?

Tout cha ch’est pou l’fotbal et si ch’est vrai qu’on s’tracasse alfeos quand l’balle elle ne tourne pos comme on l’voudreot, i-a tout n’même des situatieons bin pus pires que cha. Et pour cha i n’a foque à suife l’actualité !

R’wettiez eine p’tit queop l’neombre d’usines qu’i-eont ou bin qui veont serrer ? Les nouvelles mesures chez les facteurs, les problèmes dins l’insein’mint ! Et dusque cha n’va pos mieux ch’est dins l’agriculture !

Z’avez vu les producteurs de lait qui feont grèfe et qui rue’tent tout l’lait dins les camps ! I-a du pour et du conte mais dins l’feond i z’eont raiseon de n’pos s’laicher faire, éné ! Et tout cha pasque ch’est asteur l’europe qui décite tout ! Bé on est propes avec tout cha ! Mais j’m’ai fait ceulle réflexieon : si tous les ceusses qui produis’tent eine séquoi et qui doiv’tent tout ruer ainsin quand ç’qui feont grèfes, i n’a pus foque à attinte l’grèfe des brasseux…

Là-d’ssus, à vot beonne santé !

Allez, à r’voir mes gins et à l’feos qui vient

L’Infant d’Tournai