3 octobre 2009 par  L’infant d’Tournai  Magazine

Bonjour, savez, mes gins.

Vous n’allez pétête pos m’croire mais j’sus t’ichi comme l’écrivain pa-d’vant l’page blanque !

Quoisque j’vas raqueonter ? Dire que tout y va bin ? On n’va pus m’croire ! Dire que ç’qu’i nous arrife, ch’t’eine catastrophe ?

Cha s’reot exagéré !

Alors, i feaut trouver eine séquoi qui r’deonne l’moral aux gins sans raqueonter des carabistoules !

Du queop, j’vas vous parler du positif. Ouais, i-in a d’puis l’début de l’compétitieon. Je n’vous d’minte pos d’raviser les résultats mais puteôt d’orwettier les matches. Perdez par eximpe l’ceu d’l’Antwerp : vous pinsez qu’i-a bramint d’équipes qui veont aller m’ner 1-3 dins ç’clup-là ? Et l’sémaine suivante, alors qu’on perdeot 1-3 cont’ Wetteren, et cha à l’mi-temps du match, on a tout ‘même ordressé l’tiête pou orvénir à égalité ! Et acor, on a été à deux deogts l’importer !

Veyez qu’tout i n’est pos si mauvais qu’cha ! Et l’sémaine passée au Lierse, on a t’nu ein beon momint alors qu’on aveot d’jà perdu deux jeueux.

No n’équipe elle peut bin vite ortrouver des couleurs. Pour cha i suffit que l’chance elle ne li tourne pus l’deos et vous allez vite queus nouvelles ! Les éautes i n’areont qu’à bin s’ténir. Mais ç’qui feaut surtout avant cha, ch’est qu’on n’les laiche pos caire et qu’on soiche toudis derrière les dirigeants, les jeueux et l’intraîneur. Pasqu’ein clup, on ne l’supporte pos seul’mint quand i gagne, éné ?

Allez, à r’voir mes gins et à l’feos qui vient.

L’Infant d’Tournai