24 octobre 2009 par  L’infant d’Tournai  Magazine

Bonjour, savez, mes gins.

Comme tous l’s’ans, à parel’ époque, cha s’ra béteôt l’Orvue du Cabaret Walleon. Et comme chaque feos, elle se jeuera à l’Maseon de l’Culture. Ceulle ainnée, l’ Cabaret i va nous im’ner dins eine toute nouvelle auberche, l’Auberche du Père Mich’lin.

Pour les ceusses qui suif’tent eine milette l’actualité, i d’venn’reont bin seûr de quoi ç’qu’i s’agit. Et vous ad’veinez tout quoi ç’qu’i peut s’passer dins eine auberche, éné ? Ch’est seûr qu’on in veot d’tous les sortes ; des gins qui vienn’tent in voyache – général’mint i-a toudis bramint d’tourisses dins les hôtels – des gins d’par-chi, des gins d’pus leon. Cha fait qu’ainsin pindant près d’treos heures, on va printe plache dins le hall de l’hôtel et on va découvert bramint d’affaires, ch’est mi que j’vous l’dis.

Alors, si vous avez invie d’passer ein beon momint et d’rire ein beon queop, i n’vous feaut pus hésiter. Et vous trouv’rez tous les rinsein’mints sur www.cabaretwallon.be

Mais avant tout cha, on va orvénir à nos « Sang et Or » qui veont jeuer deux matches importants in deux s’maines: d’abord à ç’soir cont’ Lièche, dusqu’i-a acor des neoms bin connus comme Raphaël Quaranta, que ch’est l’intraineur principal, T1 comme on dit asteur, et Christian Piot, qu’i-intraîne les gardiens. L’contraire i-areot tout n’même étonné !

Et ceull’ équipe, à in vir les résultats, elle comminche à orvénir dins l’parcours. Cha n’s’ra pos facile à m’n’avis !

Et l’sémaine prochaine, à Renaix, cha n’s’ra pos neon pus eine pourménate de santé, i n’a pos d’danger. Car si les Flaminds i seont derniers, ch’n’est pos pour cha qui veont s’laicher faire savez. Bin du contraire.

Mais comme nos jeueux i nous eont moutré qu’on pouveot queompter sur eusses, surtout dins les momints difficiles, on n’deot pos s’faire trop d’bile. Surtout qu’on s’ra là pou l’z’incorager.

Allez, à l’feos qui vient, mes gin.

L’Infant d’Tournai