27 février 2010 par  Catoupi   Magazine

Dins la vie, i-a deux sortes d' gins : les ceusses qui n' seont jamais contints et leus ceusses qui seont toudis contints.

Dins les ceusses qui seont toudis contints, i d'a cor ed' deux sortes: les ceusses qui moutrent qu'i seont contints, et les ceusses que te n' sareos pos dire qu'i seont contints.

Par eximpe, j' vas printe (au hasard) René Vandérékèn et l' présidint d' l'unieon belche ed' fotbal.  Ch'est deux ziques qui seont toudis contints.  René Vandérékèn, li, i pouveot gagner (rar'mint) ou perte (bin pus souvint) avé l'équipe nationale, i n' rieot jamais (i-aveot pos d' quoi) mais i-éteot toudis contint (on s' déminte pourquoi), in disant qu'i-aveot vu des belles queosses su l' terrain. On s' démindeot alfeos, à part les pompom girls, quoisqu'i-aveot pouvu vir ed' bieau su l' terrain...

L' présidint d' l'unieon belche, li, ch'est l' même queosse sauf que ch'est l' contraire : i-est toudis contint, comme l'éaute, mais li, i rit toudis.  L' prési carolo i vient l' vir pou s' faire faire des cadéeaux : l' prési i dit qu'awi, et i rit plein s' panche.  Les éautes mimpes ed' l'Unieon belche i distent qu'i n'areot pos dû faire des cadéeaux ainsin : bé i n'a rien avec cha, i rit cor toudis.  Et final'mint, on li ar'deonne raiseon, alors là, vous s'imaginez bin qu'on frôle el' fou rire.

Mossieu Advocaat i va intraîner in Hollante ?  "Bé i n'a rien avec cha", qu'i dit in riant tout plein s' panche, toute faceon, on n' va pos à l' coupe du meonte, cha cait bin, hahaha !

Bé je n'sais pos si vous pinsez comme mi, mais à m' meote que ch'est pos à ç' rythme-là qu'on va orvife des grands momints d' fotbal international avé l' Belgique.

Mais j'y pinse, pétête qu'i-a bin raiseon, i feaut rire, pour avoir el' moral ! Et avec les talints qu'on a in Belgique (surtout les jeueus qui seont partis jeuer à l'étringer), pourquoi qu'on n'ireot pos à l'Euro 2012 ou à l' coupe du meonte in 2014 ?  Et si on pourreot organiser l' coupe du meonte 2018 ?  Hahaha !

Beon, réveons eine milette, mais alors qu'on queusit ein présidint ein p'tit queop pus sérieux, vous n' pinsez pos ?

In attindant, on espère qu'on va bin rire à ç' soir à l' fin du match, grâce à l' victoire des Sang et Or queonte Louvain !

Catoupi