20 mars 2010 par  L’Infant d’Tournai   Magazine

Bonjour, savez, mes gins.

Et alors, z’êtes in forme ? Pasqu’aujord’hui, ch’est l’Derby ! Ouais, i parait qu’on appelle cha ainsin, même si les éaut’s i seont d’l’éaut’ côté de l’frontière linquistique. Vous m’direz quand ç’que l’Sporting de Charleroi i jeue cont’ el’Standard, on appelle cha ein derby walleon…  Et ch’t’ainsin qu’pou Mouscreon s’in sortir et faire ein grand clup de l’Wallonie Picarte, i-aveot pinsé à racater l’matricule de l’Unieon du Centre… On ara tout vu.

Infin, orvennons au match de ç’soir ! Ahais, « el derby » !

Ah, j’sais bin ç’que vous allez m’dire : « Ch’n’est tout n’même rien à côté de ç’qu’on a connu dins l’temps, quand ç’que ch’éteot l’derby inter l’Unieon et l’Racin’ ! ».

Et ch’est vrai qu’i n’a rien d’comparape ! Pasque cha, ch’éteot des derbies. T’aveos les fanfares qui défileottent in ville avant d’s’in aller au state. Feaut dire aussi qu’les deux states i z’éteot’tent au bord de l’ville. Asteur, les musiciens i devreot’tent printe el pétit train pour s’in aller à Kain…

Et quand l’musique elle arriveot, i-aveot d’jà eine ambiance du tonnerre d’su les gradins.

I-aveot alfeos dix mille perseonnes et t’n’aveos pos b’soin d’forces de l’orte ( i-aveot tout au puque treos, quate agints) , pos d’service de sécurité (qui fout alfeos pus el brin qu’éaute cosse) ni de stewards, comme i dis’tent asteur. Et tout i-alleot fin bin. Ch’est p’tête aussi pasque les mintalités i-z’éteot’tent différintes. Et qu’on éteot d’l’Unieon ou bin du Racin’, ch’éteot toudis fiête après l’match. Normal, ch’éteot inter tournaisiens.

Infin tout cha, ch’éteot dins l’temps et asteur avec eul fusieon qu’no Bourguémette Mossieu Massy i-a fait, on a eine équipe in deuxième divisieon !

Et si ch’est vrai qu’on n’l’a pétête pos aussi belle que l’année passée, on c’mminche tout douch’mint à vir el bout du tunnel. Mais cha n’impêche.

Et j’espère qu’à ç’soir, cont’ Renaix, derby ou pos, on va moutrer à les gins qu’le FC TOURNAI i n’est pos à s’plache dins l’class’mint et qu’on va vite ordresser cha…et in vitesse acor.

Et ç’qu’on espère surtout, ch’est qu’à l’fin des nonante minutes, on pourra canter, comme on l’feseot dins l’temps à l’fin des derbies, - quand ç’que l’victoire elle éteot au rindez-vous - « Les Tournaisiens seont là ! »

Allez, à r’voir mes gins et à l’feos qui vient

L’Infant d’Tournai