17 avril 2010 par  L’Infant d’Tournai   Magazine

Bonjour, savez, mes gins.

Je n’sais pos si vous êtes au courant, mais à ç’soir on va fiêter ein fameux évén’mint ! Commint ? Vous ne l’savez pos ? Neon, je n’vous parle pos de l’visite de Lommel, même si i seont dins le héaut du class’mint !
Neon, à ç’soir on va mette quéqu’ein à l’honneur !

Bin seûr que vous l’connissez… Si vous orwettiez l’émissieon « Chint pour chint et Or » su No Télé, on cite s’neom tous les s’maines. Ch’est Jacques BAUCAMP, l’caméraman de no télévisieon locale. Et à ç’soir, on va l’mette à l’honneur pasqu’i va filmer…, t’nez vous bin, s’millième match ! Vous s’rindez queompte ?

Mille matches d’fotbal, par tous les temps, dins tout’s les conditieons, bé i feaut l’faire ! 

Je m’souviens acore de li à l’Unieon quand i d’veot meonter à l’étchielle pour arriver su l’toit de l’tribune. Seûr qu’i-a d’vu in vir à ç’temps-là. Ch’est vrai qu’asteur in deuxième divisieon, i-a bramint pus d’confort qu’avant ! Mais Jacques i n’a pos fait que l’fotbal. Pasque c’militaire de carrière à l’ortraite, i-a eine deuxième passieon : ch’est l’véleo ! Et cha li arrife de conduire eine moteo, vu qu’i-est aussi motard . Ou bin alors, ch’est li qui filme, même que ch’t’alfeos risqué, savez pasqu’i ouèfe alors dins des conditieons souvint difficiles !   

Et dire que ç’garcheon i-est arrivé à No Télé, ainsin, par hasard ! Ch’éteot dins l’début des ainnées quater-vingts… Ahais, i donneot ein p’tit queop d’main et i s’a ortrouvé ein jour pa-derrière eine caméra. Cha li plaiseot tell’mint qu’final’mint qui s’a  ortrouvé « cadreur ».

Feaut dire aussi que s’n’organisatieon et s’rigueur – cha li vient seûr’mint de s’n’incien métier – i-eont fait d’li ein élémint bin précieux pou l’équipe. Et d’préciser aussi qui deonne des beons consels à les jeones qui comminch’tent l’métier.

Mais i n’a pos qu’dins le sport qu’on peut l’vir ouvrer. Ah neon, asteur on l’ortrouèfe toudis à les captatieons des séances des p’tits cabarets et d’puis eine paire d’ainnées, mais ichi eine paire ch’est pus que deux, chez les Filles, celles Picartes. I-in est même dev’nu l’coqu’luche. D’abord, quand ç’qu’elles in parl’tent, elles d’eont toudis plein leus bouques : « Quand Jacques i-est dins l’salle, on s’sint moins stressées… ». I-a pos à dire, i leu fait d’l’effet.

Mais là, j’n’irai pos pus leon, cha n’m’orwette pos.

Infin, j’voudreos dire aussi, et je l’conneos assez pou savoir que ch’est vrai, que si alfeos i-a s’mine des mauvais jours, s’guife in rache comme on direot à Tournai, ch’est surtout qu’derrière s’n’air bourru s’cache eine heomme plein d’gintillesse, avec ein cœur gros comme cha ! Ch’est l’ginre de personne qu’on aime bin rinqueontrer et j’sus fin bénaisse d’avoir ceulle chance.

Et à ç’soir, on va tertous l’ver nos verres à s’beonne santé in li disant qu’on espère ête là insanne pou fiêter l’deux millième !

Allez, à l’feos qui vient, mes gins.

L’Infant d’Tournai