Semaine 18 2010 par  Catoupi  

Ch'est l' momint d' parler d' quoi, à vo n'avisse ?

Bé comme tous l'z'ans au début du meos d' mai, on pourreot parler de l' foire de mai, su l' plaine des manoeufes. On pourreot d'viser su l'muguet, qu'i n' d'a bramint vu l' météo, mais qu'i-est toudis aussi tcher chez l'fleurisse. On pourreot souhaiter beonne fiête à tous les manmans.  Bé tant qu'on y est, "beonne fiête, manman" !

Ch'est aussi l' momint d' parler d'esprit "patriotique": avé tous les mascarates et les carabistoules de nos politiciens, qui n' saftent pus ç' qui-est important, à part ed' printe el' pouvoir et d' rimplir es'portefouèle.

Avé l' Unieon Belche (tins, cha existe, cha ?) in fotbal, qu'elle a bin du mau à queusir et trouver ein intraineu "durape", qui n' cache pos trop après les liards et qui-a l'esprit ein tant soit peu "belche".

Mi, j' préfère vous parler d' no bieau langache: d'abord, ej' viens d' finir de lire ein life que m' comarate Catoire i m'a deonné: "El' Pétit Prince". Ch'est l' traductieon in picard du life de Saint-Exupéry. Ch'est Bruno Delmotte qui-a traduit cha, et ch'est fell'mint bin fait. Ch'est d'jà li qui-aveot traduit deux albums de Tintin et eine histoire de Martine ("Martine à l' cinse"). Je m' souv'neos d'avoir li "Le Petit Prince" in français, mais j' deos avouer qu' ch'éteot par obligatieon pou l'école, et que j' n'aveos pos eu autant d' plaisi qu'avec el' traductieon in picard.Bravo, Bruno ! Et merci, Catoire !

Pou finir, "Ch'est l' momint d'in parler", ch'est l' sujet imposé du concours Prayez de ç't'ainnée-chi. Bin seûr, pou les ceusses qui veultent participer et qui n'eont jamais eu d' prumier prix, i peuftent queusir ein éaute sujet pou l'concours. I-a eine divisieon esprès pou l' sujet imposé, et eine divisieon pou tout l' reste, qu' cha soiche in cancheon, poème ou monoloque.

Mais je n' vas pos ichi vous débobiner tout l' réglemint: L'réglemint complet i-est à l' ferniête du local du Cabaret (54, rue Saint-Martin). Et i feaut invoyer ses tesques au pus tard el' 31 juillet.

Adeon, à vos pleumes! N'attindez pos l' dernier momint, pasque "Ch'est l'momint d'in parler".

Catoupi