Magazine 24 septembre 2010 par  L’Infant d’Tournai  

Bonjour, savez, mes gins.

Aujord’hui, j’voudreos vous parler des arbites.

J’sais bin ç’que vous allez m’dire, que ch’t’ein sujet qu’i-orvient alfeos après eine défaite…ou après ein mauvais match du trieo arbitral.

Hé bé, neon, j’voudreos ichi vous parler d’eine séquoi qui m’a plu in allant vir jeuer m’filleul qui disputeot « l’match au sommet » de l’deuxième provinciale avé l’Montkainoise conte Warcoing.

Nous-éautes qu’on a l’habitute de parler du trieo arbitral - et dire qu’in prumière divisieon i seont à quate ! - ichi l’malhureux i-éteot tout seu su l’terrain pou diriger l’partie.

Vous m’direz, i n’a perseonne qui l’a obligé et si i l’fait, ch’est pasqu’i veut bin. D’accord, mais l’faire tout seu, même si ch’t’ein match d’deuxième provinciale, cha reste toudis ein match, avé ç’que cha intraîne comme obligatieons. Les sorties à signaler, les hors-jeu à n’pos treomper, in seomme, i feaut avoir des is partout !

Pasque les jeueux i s’foutent bin que l’malhureux in noir i n’sait pos tout vir. Ch’n’est pos cha qui les impêche de laicher traîner leus pieds, ou d’deonner ein p’tit queop in douche. Tout cha dins l’deos d’l’arbite, vous s’in doutez bin.

Mais mi ç’qui m’énerfe, ch’est qu’autour du terrain, t’as toudis eine paire de balochards qui critiqu’tent tout’s les décisieons…pour autant qu’cha n’est pos pou leus couleurs, bin seûr. A croire que ç’n’heomme-là, cha devreot ête ein sur-heomme. Et ch’est souvint les ceusses qui n’eont jamais jeué ou arbitré ein match qu’i s’mettent in évidince ! I faudreot ein queop leu deonner ein chuffleot pour vir s’i conneot’tent l’règlemint…
Infin, tout cha pour dire que ces gins-là, l’s arbites hein, i-eont bin du mérite.

Tins, - j’passe du queoq au baudet - in parlant d’mérite, j’pinse aussi à les supporters des « Sang et Or » qui n’eont pos eu beauqueop l’occasieon d’vibrer d’puis l’début de l’saiseon.

Mais, je n’sais pos si vous l’sintez comme mi, mais à m’mote que l’résultat de l’sémaine passée à Lommel i va deonner du corache à les jeueux et cha n’m’éteonn’reot pos qu’on fiête à ç’soir no prumière victoire.

L’important…ch’est d’y croire.

Allez, à r’voir mes gins et à l’feos qui vient

L’Infant d’Tournai