Magazine 3 mars 2011 par  L’Infant d’Tournai  

Bonjour, savez, mes gins.

Je n’sais pos si vous avez suivi l’actualité mais feaut bin orconnaîte qu’in Belgique, on n’fait jamais rien comme les éautes !

Neon, je n’vous parlerai pos d’politique. D’abord pasqu’i n’a rien à dire vu qu’on tourne in reond d’puis eine paire de meos…et dins ç’cas-chi, eine paire ch’est pus que deux …

J’vouleos parler de l’réforme du championnat d’fotbal. Infin, l’réforme de l’réforme vu qu’i n’eont rien cangé. Rien, ch’est p’tête vite dit. I veont continuer à seize. Cha ch’est fait, malgré qu’les p’tits clups i n’éteot’tent pos d’accord au début. Mais final’mint, i z’eont accepté. Sans doute par l’opératieon du saint-esprit…

Mais l’pus pire, pasque pour mi ch’t’à morir de rire, ch’est pour eusses carculer et connaîte l’neom du ceu qui va déquinte ! Pasque si d’a ein qui s’ortrouèfe là-d’dins, i-a toudis bin de l’sanche. Si j’ai bin tout compris, i veont faire l’moyenne des treos dernières saiseons et l’ceu qu’i-ara l’pus mauvaisse, i s’in ira in deuxième divisieon. Deonc, si j’sus logique, l’ceu qui vient justemint d’meonter, vu qui n’a pos d’passé in prumière et qu’on n’sait pos li faire de moyenne, hé bin, i-ordéquind dùsqu’i vient. Ah pour cha ch’est bin fait, éné ? A m’n avis qu’ch’est les grands clups qu’i-eont peondu ç’bazar-là vu qu’eusses i n’seont jamais inquiété pa l’déquinte !

Mais, après mûrte réflexieon, je n’pinse pos qu’ch’est ceulle réforme qui va rimplir les stades dins no pays.

Infin, nous-z’éautes on s’in fout d’tout cha vu qu’l’ainnée qui vient, on s’ra ein étache pus bas et on ara bin d’l’amus’mint avé tous les derbies qu’on va avoir : Mouscreon-Péruwelz, Renaix et espéreons-le vu qu’l’intraîneu ch’t’ein tournaisien, les Géants Athois ! Et des derbies cha attire bin des gins ! Mais là, in treosième divisieon, pus questieon que l’Ministère de l’Intérieur i vient mette s’nez. Ah neon, li i n’s’occupe que de l’prumière et l’deuxième divisieon. Pus bas, i s’in fout. Alors qu’i-a alfeos bramint pus d’meonte dins les stades de l’troisième divisieon que dins les ceusses de l’« antichambre de l’élite » pour parler comme i feaut.

Comme quoi, ch’t’ein riche foutache de gins !

Infin, n’feaut tout n’même pos oblier qu’on est in Belgique !

Allez, à r’voir mes gins et à l’feos qui vient.

L’Infant d’Tournai