Magazine 9 avril 2011 par  L’Infant d’Tournai  

Bonjour, savez, mes gins.

Asteur qu’on arrive tout douch’mint à l’fin du championnat et qu’on sait dusqu’on jeuera l’saiseon qui vient, j’voudreos vous parler d’l’ornouvieau du FC TOURNAI.

Neon, je n’me fous pos des gins et cha n’a rien à vir avec l’affaire Zarzecki – on areot été propes avec li – mais puteôt du sintimint qu’ceulle déquinte in troisième divisieon elle deonne ou bin elle orquinque l’moral des troupes.

Je n’sais pos si vous avez ormarqué dins l’z’interviews des jeueux ou d’l’intraîneu, les propeos i n’seont pus les mêmes qu’avant. Alors qu’i-a n’paires de meos, tertous i-alleot partir et qu’i n’vouleot’tent pus intinte parler des « Sang et Or », asteur i seont tout chuque tout miel et on direot qu’i s’reot’tent prêts à orsigner pour orconstruire eine nouvelle équipe avé d’z’imbitieons dins l’série d’in d’sous. Ch’est curieux alfeos comme on peut canger !

D’jà su l’terrain, d’puis ein momint, on veot eine fameusse différince. Et vlà in puque qu’on s’met à gagner ! Ch’est bin l’preufe que c’t’équipe-là elle n’éteot pos si mauvaisse que cha.

Mais i n’feaut pos r’vénir su l’passé et puteôt s’tourner vers l’av’nir !

Et quand ç’qu’on veot l’prestatieon des deux jeones, Loïc et Quentin, l’sémaine passée, on peut s’dire que l’orlièfe elle est prête. Bin seûr, i feaut leu laicher l’temps d’s’aguérir – quoi qu’i comminch’tent à avoir l’espérieince tous les deux – mais j’sus seûr que dins ein p’tit momint, on pourra queompter d’sur eusses et qu’i-ara aussi d’éaut’s jeones qui suivreont.

Vous veyez qu’tout i n’est pos aussi noir qu’on l’dit. Au contraire, comme i diseot i-a pos si longtemps qu’cha Jean-Claude Stocman : « Ch’est orculer pou mieux saut’ler ». Bin seûr li i l’a dit in français, mais dins l’feond, i n’a pos tout à fait tord. Mais d’tout cha on orpalera dins l’dernier « Sang et Or » de l’saiseon conte Rupel Boom.

D’ichi-là, j’vous souhaite ein beon match et pourquoi pos… fiêter l’victoire à ç’soir conte Visé.

Allez, à l’feos qui vient, mes gins

L’Infant d’Tournai