21 mars 2012 par Catoupi 

Ch'est ç' wékenne que l' carnaval i débarque dins l' ville. Eine nuit des intriques verdi au soir, ein cortèche saim'di après-deîner, après l'hommache au Pichou Saint-Piat par les P'tits Rambilles, puis l' grand feu pou brûler l' roi carnaval, et eine soirée dansante dins l'Halle aux Draps.

L' titre de m'n'artique, ch'est à peu près l' thème qui-a été queusi ceulle ainnée : « Ballons et friandises, éveillons notre gourmandise ». Bé qu'i soitte, pour les infants, ch'est ein fin bieau thème. Hasard qu'i veont orchevoir des babelutes, des chucartes et des caramels à tous les coins d' rue. Cha s'reot bin qu' les commerçants i rut'tent des bonbeons pa leu ferniête à tous les infants. J'ai vu cha au carnaval de Kain, et ch'est ein bieau geste des commerçants. Si les patreons d' café i pourreot'tent aussi faire ein p'tit geste, cha arring'reot aussi bramint d' grands...

L' carnaval, pour mi, ch'est ein évèn'mint qu' je n' sareos pos rater. Je m' raminvre qu'au début qu' j'alleos, j'éteos puteôt géné de m' déguiser, et je n' connisseos pos grand meonte. Asteur que cha fait vingt-cheonq ans qu' j'y vais, j' conneos bramint d' gins, et i-arrife bin souvint qu'on dit banjour avec ein larque sourire à des carnavaleus, même sans savoir leu neom, mais on sait dins queulle confrérie qu'i seont. Ch'est toudis mieux que d' croiser des gins sans rien leu dire et in f'sant eine treonche jusque par tierre.

Après cha, on ara eine pétite semaine pou s'ormette avant d'attaquer l' deuxième série des p'tits cabarets. Verdi 23, verdi 30 et saim'di 31 mars, à l'Halle aux Draps à 20h comme d'habitute, i-ara d' nouvieau bin d' l'amus'mint. Les heommes qui z'eont leu carte d' mimbre 2012 i rint'tent pou rien, l' z'éautes i peuftent toudis printe leu carte in arrivant, et i-areont dreot à deux plaches pour l'Orvue du meos d' novimpe.

Hasard qu'on n' va pos cor s'innuyer d'ichi à Pâques !

Catoupi