28 mars 2012 par L’infant d'Tournai

Bonjour, savez, mes gins.

Cha a presque passé inaperchu dins les gazettes mais l'ov'là qu'no ville elle est jum'lée avec Bethléem !

Ceulle-là, i falleot aller l'querre !

D'après nos édiles, cha fait d'jà bramint d'ainnées qu'i z'aveottent busié à cha. Après n'paires « d'échanges culturels », i s'seont dit qu'i pourreottent aller pus leon !

Et l'ov'là, asteur on est jum'lés avé Bethléem ! Qui ç'qu'i-areot cru cha, éné ? Infin, on pourreot dire que ch't'eine orconnissance puisqu'on sait, et cha ch'est l'histoire qui nous l'a raqueonté, qu' les deux prumiers qui-eont rintré dins Jérusalem pou l' libérer, ch'éteot deux infants d' Tournai, Léthalde et Ingelbert ! Et on sait bin qu' Jérusalem i n'est pos leon d' Bethléem...

Et puis, ch'est aussi l' ville dusque Jésus i-est né d'après ç' qu'on raqueonte.

Seul'mint, attindez mes gins, j' vas asteur vous in dire eine : i paraitreot qu' Jésus i-est né à Bethléem, mais pos c'ti-lal ! Pasqu'i-a deux Bethléem : ein in Palestine (ch'est l' ceu qu'on est jum'lé avec) et ein éaute in Galilée, à n'paires de kilomètes de Nazareth. Et du queop, on s' deminte si i n's'reot pos puteôt né dins l' deuxième...vu qu'i-a passé tout s' jeonesse à Nazareth. Et ch'est d'ailleurs pour cha qu'on l'a app'lé Jésus d' Nazareth !

Je n' sais pos quoisque ç' jum'lache i va nous apporter mais i n' deottent toudis pos queompter sur mi pour aller leu rinte visite. J' n'aime pos l'avieon !

Au moins, Troyes, cha ch'est bin. Ch't'ichi tout près, on parle l' même lanque, on minche bin et on beot bin ! Quoisqu'i feaut d'minder d'puque, éné ?

On m' dira qu'i feaut vir pus leon, que ch't'ein mélinche de cultures, d' sociétés, mi j' veux bin mais je n' sus toudis pos convaincu d'l'utilité d' faire tout cha.

Infin, si falleot vraimint ein jum'lache, ch't'acor eine sanche qu'i-eont queusi Bethléem et pos Nazareth ! S'imaginez ein queop : t'taleur, les flaminds qui z'habitent dins l' villache du même neom tout près d' Gand, i z'areottent cru qu'i z'éteottent jum'lés avé nous-z'éautes ! Final'mint, Bethléem...ch'est pos si mal que cha !

Allez, à l'feos qui vient, mes gins !

L'infant d'Tournai