11 avril 2012 par Biête d'orache

C't'ainné i-a ein grand évén'mint qui va avoir lieu à Tournai. Vous l'savez tertous, à moins qu' vous v'nez d' passer eine paire d'ainnées d'su la lune ou bin su l'île de Robinseon Crusoé, ch'est l'arrivée du tour de France, l' 2 juillet à v'nir. Et ch'n'est pos rien savez, ch'est ein' sapré organisatieon. Tout i-est réfléchi, calculé au millimète pour que tout s' passe bin. Du queop, ichi à Tournai, ch'est l'effervescence, la police, les ouvériers communaux, les services administratifs, l' protocole et l' communicatieon, l' télé locale, tertous i-est réquisitionné et s'a mis à l'ouvrache pour que tout i va comme su des roulettes. Même nos mandataires politiques communaux i seont tout énervés et in trinspiratieon pou ç't'évén'mint. –Tins eusses cha deot les canger, pou eine feos qu'i seont in trinspiratieon !-

I féaut dire qu'eine arrivée du tour dins not' beonne vielle ville, cha n'est foque l' deuxième feos qu' cha arrife, l' prumière feos ch'éteot in mill' nué chint soixinte six. I-a 46 ans, et l' ceu qu'i-aveot gagné ch'éteot...Ch'éteot. Final'mint je n' m'in rappelle pus, j'aveos ein an. Par queonte, j'sais qu' l'arrivée ch'éteot d'jà au boulevard Bara, comme ceulle ainnée, dusque l' sprint final i s' f'ra jusse pa-d'vant l' maseon de l'culture. Ch'est vrai qu' su l'Esplanate de l'Europe, i-a là bin de l' plache pou mette tous les véhicules du Tour, et pou eine feos l' parking i servira à ein' séquoi, pasqu'à longueur d'ainnée i-a là autant d' carettes stationnées que d'poils su l'tiête de Yull Brinner.

Ch't'ainsin qu'su l' boul'vard, on a élagué ein p'tit queop les arpes pou savoir filmer l' sprint avé l'z'hélicoptères, pos d' treop pasque l'z'écoleos i-alleot'tent acor faire des braques et porter plainte. I-eont dit « les arpes i seont pus importants que l' sprint, même si ch'est l' mailleot vert qui ganne ! » et on va avec orfaire ein tout nouvieau r'vêt'mint de l' route, et bin aménager les abords de l'arrivée. Tins justemint ! ch'est bin dammache qu'on n' pouveot pos faire l'arrivée dins l' centre, j' sus seûr et certain qu' là, tous les travéaux de l' ville i-areot'tent été finis in temps et in heure. Pasque dins l'état qu'no chité elle est pou l' momint, avé des treos et des meonts d' tierre d' tous côtés, des pavés qui berloquent à tous les coins d' rue, i-areot'tent aussi bin pus organiser l' campionnat d' Belgique de VTT ou bin d' cyclocross. Ou cor mieux, faire passer Paris-Roubaix par Tournai. Pou l' momint l' tranchée d'Aremberg à côté de l' traversée d'no ville, ch't'eine prom'nate de santé.

I-a aussi pou ç't'évén'mint eine masse d'activités et d'manifestatieons prévues. L'sémaine passée et i-a d'jà eu l' fiête pou les cent jours avant l' tour à Tournai. Mais cha n'est pos fini, ainsin l' diminche 8 avril, l' jour de Paris-Roubaix, l' ville de Tournai et l' municipalité d'Orchies i-organis'tent eine rindonnée à véleo d'22 km, ouverte à tertous jusqu'à Orchies. Ceulle rindonnée elle démarre à 10h au matin su l'Esplanate de l'Europe et pou l'ceu qui trouèfe que ch'est treop d' kilomètes à faire i-a ein deuxième départ pour 9 kilomètes qui s' fait à 10h30 de l' frontière à l'Glann'rie.

Eine feos arrivé à Orchies i-a ein grand chapiteau avé ein écran géant pour suife l' course d' Paris-Roubaix, Pou l'ceu qu'i-a faim et seo, i-a de l' restauratieon et à boire dins l'chapiteau. Vers 13h00 on pourra vir l' passache de l' course des juniors, et vers 15h30 l' passache des pros, avé j'l'espère bin ein belche in tiête, même si ch't'ein flamind ! Pasque mi j'sus chauvin et j'ai bin l' diale de tous ces discussieons su l' communautaire ! Et pou les ceux qui n'ont pos invie d'rester à Orchies, i-aussi tout l'après deiner, des navettes de bus pou ram'ner les gins et les véleos à l'Glann'rie et à Tournai. L'ov'là ainsin vous savez tout, j' pinse que cha va ête ein' belle journée à passer et i-ara seûrmint d' l'ambianche, et mi je n' vas pos rater cha. Après cha, i-ara acor toutes sortes d'espositieons su l' tour de France, mais tout cha j' vous l'espliqu'rai l' feos qui vient, pasqu'ichi i-est temps que j' vas m'intraîner à véleo pou savoir faire l' rindonnée jusqu'à Orchies l' 8 avril prochain. Tins ç' jour-là, j' vas faire ein duathlon, 22 kilomètes à véleo et après cha l' chint mètes comptoir. Allez pus sérieus'mint, n'obliez pos ceulle rindonnée, on vous attind nombreux, v'nez in masse pou ceulle belle journée de sport et d' détinte. A bintôt j'espère, et in attindant vife l' véleo et vife l' tour de France

Biête d'orache.