30 mai 2012 par Catoupi

L'ESTU, ch'est l' club de handball de Tournai. Et vous l'avez seûr'mint vu dins l' gazette, no n'équipe tournaisienne elle meonte in divisieon ein!

Ein évén'mint, vous n' pinsez pos ?

Feaut l' dire, ichi à Tournai, on a des gins qui s' démèn'tent et qui z'arriftent à faire des miraques. Qu' cha soiche in handball, water-polo, ping-pong (pardeon, in tennis de tape), et j'in passe.

Ainsin, on peut ête fier d'avoir eine équipe tournaisienne qui va in divisieon ein, et surtout avec ein esprit eximplaire. Du jeudi d' l'Ascinsieon, que ch'éteot l' jour du titre, i-aveot mille cheonq chints perseonnes au hall des sports à l' plaine des manoeufes.

Plus qu'au fotbal! Incroyape pour ein sport pos assez connu.

I-aveot tout plein d'infants, les jeones du club, avec leus parints, qui suiftent l'équipe tout l'année.

A l' fin du match, tout l' public i-éteot d'bout, i-a même des gins qui brayeottent. Les jeueus i canteottent, i-a des balleons quieont cait du plafeond (cha cangeot de l' plouèfe), et même el' coupe elle a déquindu au d'bout d'eine fichelle. Queulle ovatieon, et queulle émotieon quand Fred Mespouille i l'a attrapé et qu'i l'a l'vé bin heaut!

L'av'nir, i-est in divisieon ein. Et ç' qui-a d' bin, ch'est qu'i form'tent des jeones pou l'z'am'ner in équipe prumière. Pos d' folies avec des transferts qui coûtent tcher, on n' dépinse pos ein euro qu'on n'a pos, qu'i-a dit l' responsape.

Cha a l'air logique, mais ch'est pos comme cha tout partout, malhureus'mint.

Alors, acor bravo à l'ESTU, et beon vint in divisieon ein!

Catoupi