13juin 2012 par Arnitoile

I-a eine paire de s'maines, j' vous aveos raqueonté qu' j'éteos tout ormué pasque j'aveos été chez Codolette, et qu'elle n'aveot pos arrêté d' démépriser su l' Tour de France!

J' vous aveos dit ç' que j'in pinseos. Tins, ceulle vielle mègère, elle ne busie même pos à tous les liards qui vont caire su l' ville grâce au tour.

D'ailleurs no bourguemette, que tout l' meonte i sait que ch't'ein heomme honnête comme pos deux, i l'a dit héaut et clair. Pour ein euro dépinsé pa l' Ville, ch'est pos moins d' six qui vont orcaire su Tournai!Ch'est éaute cosse que les chintimes qu' les banques i deonn'tent comme intérêts.

Evidemment cha va surtout caire dins les bistreots, les restaurants et les hôtels et tant pire si i-a eine paire de boutiques qui doiftent serrer ç' jour-là pasqu'i n'areont pos d' clieints. Ch'est quand même qu'eine feos tous les chinquante ans.

Mi j' pinse que ch't'eine véritape aubaine pour Tournai. Vous s' rindez queompte ?

Avé tous les yards qui veont rintrer dins les caisses de l' Ville, eul budget i va ête in équilipe tout d' suite et ch'est no n'éch'fin des finances qui va ête fin hureux. Tins, on raqueonte déjà que puisqu'ein euro i d'in rapporte six, les chintimes additionnels i veont ête divisés par six: ein virgule quarinte six pour chints au lieu de huit virgule huit: pour eine feos, les gins d'Antoing i n' pourreont pus rire des Tournaisiens.

Et parèl pou les deux tasques poubelles; au lieu des chinquante et chint-dix euros à payer, i n'ara pus foc vingt-six euros et soixante-six chintimes à payer pou les deux!

Et cha s'ra l' même pour l' préqueompte immobilier et tous les éautes tasques! Divisées par six. A ç' tarif-là, mi j'espère que ch'est tous les ans que l' Tour de France i va s'arrêter à Tournai. Foc du bénéfice pou tous les Tournaisiens!

Et quand on pinse qu'on va ormette tous les boulevards à neuf su l' queompte de l' Province; obin de l' Régieon wallonne; avé tous les cang'mints d' compétinces, mi j' m'y r'trouèfe pus dins qui i-est responsape d' quoi. Et j' sus seûr que pour épater tous les visiteurs et les journalisses d' passache, tous les trottoirs dùsque les pavés i berloquent, i s'reont réparés et qu'i n'ara pus ein treo à trouver dins tout l' chintre ville, ni dins l' voirie, ni dins les trottoirs, ni dins les pistes cyclapes. Et qu'on va orpeinte tous les passaches cloutés dùsqu'i n'a pus eine milette d' peinture d'pus bin des meos. Et on va ormette des planques à tous les bancs publics qui seont défoutus.

Beon évidemmint d'ichi l' deux juillet les ouverriers de l' Ville i veont avoir bin d' l'ouvrache mais pour eine feos, qu'est ç'qu'on ara eine ville bin interténue!

Rien qu' pour cha, j' dis: Vife l' Tour de France à Tournai.

Arnitoile