18 juillet 2012 par Pichoulit

L’ nouvelle elle n’est pos toute fraique mais n’impêche, j’ suppose que vous avez vu comme mi qu’on alleot faire eine toute nouvelle gare à Mons. Tins, d’puis qu’i veont ête ville européenne de l’ culture (avec l’appui d’ Tournai, même qu’on n’est pos vraimint seur qu’i veont nous rinvoyer l’ascinseur...), on veot tout in grand.

I parait que ch’t’ein architèque ornommé qui va    s’in occuper.

Mi, j’trouèfe que l’incienne gare de Mons elle n’éteot pos si mau qu’ cha mais infin, je n’ sus pos Montois, adeon, ch’est pos m’n’affaire (mais ch’est quand même ein p’tit peu mes liards...)

Faire des nouvelles gares ch’est à la meote. Je n’ sais pos si t’as d’jà vu l’ nouvelle gare de Lièche que ch’est ein véritape ouvrache d’art sauf que ch’est l’ boul’vard du courant d’air et qu’ dès qu’i fait moins d’ dix degrés déhors, tertous i-est ingélé in d’dins.

Du queop, cha leu met d’z’idées in tiête, v’là qui réf’tent d’ faire eine espo universelle in 2017 que même Elio i-a été s’qu’à Paris pou sout’nir l’ projet (on n’ pouveot quand même pos tout faire à Mons, qu’i s’a dit)

A Namur avec i-eont fait eine nouvelle gare avec tout plein d’z’escayers, d’z’escalators que te t’ croireos dins l’ montée de l’ Tour Eiffel pour y arriver. Dusqu’i veont s’arrêter ?

Acore hureux qu’ pour el tour de France, i n’eont pos rêvé d’orfaire no gare ichi à Tournai (ou infin la mitan de l’ gare seul’mint comme les boul’vards.)

Pasque no gare à nous eautes, elle a du cachet (comme i dit m’ pharmacien), on n’a pos b’soin ichi d’ein nouvieau bâtimint juste pétête ein escalator pour meonter et déquinte du quai (si i reste eine p’tit peu d’ liards après l’ constructieon à Mons).

Mais i feaut rester attintif quand même, tins ravisse l’ clinique Saint Georges elle a disparu sans crier gare (!), on n’ sait pos acore queul hôtel on va avoir au pied de l’ cathédrale et quoi ç’ qu’i faudra qu’on démolit pou orbâtir ...

On n’ sait pos non pus à queulle sauce on va minger l’ peont des treos.

Et je n’ parle pos du terrain du Racing et d’ l’Union qui-eont passé l’arme à gauche pou ein nouvieau state qu’on n’est pos là d’ jeuer l’ coupe d’Europe d’dins....

Alors, no gare, surtout i n’ feaut pos y toucher, même pos in parler.

Mi quand je l’ ravisse avé ses belles pierres, je m’ dis qu’ ch’est ein fin bieau molumint et qu’i peuf’tent aller s’ faire vir avé des gares futuristes, rien n’ vaudra jamais ein témoin du passé.

L’ gare de Tournai, ch’est eine belle pleume d’ no patrimoine, adeon, pos touche....

J’ sais bin qu’i n’in est pos question mais on n’ sait jamais, in périote électorale, au train (!) dusque les promesses i veont on n’est pos à l’abri d’ein qui-areot sorti cha de s’capieau pou sortir du train train (!)... et puis, i m’ falleot bin eine idée pou m’n’artique.

Pasque, quoi qu’on pinse, i-a des liards à la SNCB. I n’ seont pos foutus d’ faire arriver ein train à l’heure, i supprim’tent des passaches à niveau, i-a des feux d’signalisatieon qui n’ signal’tent pus rien mais eine feos qu’i feaut bâtir, là tout d’ein queop, on met l’ paquet et on trouèfe des liards.

Mais i d’a qui veont t’ dire qu’Infrabel ch’est pos l’ même que le holdinge... et qu’ chacun i-a s’ prope budget et, mi j’ pinse que ch’est juste pou noyer l’ picheon ou nous printe pou des couleons.

Tout ç’ que j’ veos ch’est qu’ein côté on trouèfe des millieons et qu’ein eaute on a bin de l’ misère à trouver 10 000 euros...

Mais d’ puis qu’on a rinfloué les banques on n’est pus à eine surprisse près.

Cha n’ m’impêch’ra pos d’ crier «gare à nous eautes».

Pichoulit