29 août 2012 par L’infant d' Tournai

Bonjour, savez, mes gins. Seûr que vous vous souv'nez d' La Fontaine, Jean de s' préneom, qui-aveot écrit des si belles fables qu'on appreneot à l'école ? «L'corbieau et l'ornard », «L'cigale et l'fourmi», ...

Ah bin, cha ch'est bin fini dins l'z'écoles d'asteur. On n' passe pus s' temps à lire et à apprinte tout comme on l' féseot dins l' temps.

Mais cha n'impêche qu'i-a acor d'z'instituteurs et d'z'institutrices qui utilis'tent ceulle beonne méthote d'z'histoires dusqu'on peut r'tirer eine séquoi.

Ainsin, l'sémaine passée, à l'école du p'tit Valentin, l'institutrice Mam'zelle Julie, elle a d'mindé aux infants d' vénir du lind'main avec eine histoire raqueontée pa leus parints. Mais attintieon, pos n'importe queulle histoire. Ah neon, i-in falleot eine avec eine morale à la fin.

Du l' lind'main au matin, les infants, l'z'eins après l'z'éautes, i raqueontent leu n'histoire et cha va ainsin du tchien sauvé à l' ceu qu'iaveot l'z'is pus greos que l'vinte.

Tertous i-a passé et i reste Valentin. «Et alors Valentin, on t'acoute», qu'elle fait Mam'zelle Julie. Et l' pétit i comminche s'n' histoire. «M' maman elle éteot pilote d'avieon. Eine feos qu'elle survoleot l' camp enn'mi, on li a tiré d'ssus et elle a été touchée. Infin s'n' avieon, hein, pos elle. Du queop, elle a d'vu sauter in parachute et elle a cait dusqu'i n' falleot pos.

Tout ç' qu'elle aveot avec elle, ch'teot eine boutelle de whisky, ein coutieau et ein pistolet. Pou n' pos qu'elle se casse, elle vide l' boutelle in déquindant. Arrivée au sol, elle est intourée pas d'z'enn'mis qui n'eont pos l'air fort amiteux. Elle sort s' pistolet et elle comminche à tirer. Ein, deux, treos... i caittent comme des mouques. Siept, huit... et elle continue. Arrivée à dousse, l' chargeur i-est vite et i reste quate ostrogueots.

Elle sautielle d'su l' prumier, sort s' coutieau et elle le tue. Au tour du deuxième asteur. I passe à l' cass'reole avec. L' troisième, pus rabi, i-essaie de s' définte mais m' mamère elle prind l' dessus et i passe à l' trape comme l'z'éautes. Malhureus'mint, l' lame du coutieau elle se casse. Et i-in reste acor ein ! Mais ç'ti-chi, veyant qu'i risqueot li avec de s' faire déquinte, i s'a infui. Là, veyez, ch'est mal connaite m' mamère, pasqu'elle a queuru après et quand elle l'a eu rattrapé, elle l'a étreonné et i-a subi l' même trait'mint qu' ses amisses».

Julie, l'institutrice, au bord des larmes, elle n'in orvenneot pos d'intinte eine histoire parelle sortant de l' bouque de Valentin. Après ein momint, elle orprind ses esprits et d'minte au p'tit garcheon: «Et l' morale ?»

«L' morale, qu'i-a fait Valentin, ch'est que quand m' mamère elle a bu, i vaut mieux l' laicher tranquille... »

Allez, à l' feos qui vient, mes gins.

L'infant d' Tournai