5 septembre 2012 par L’infant d' Tournai

Bonjour, savez, mes gins.

A lire l' titre, j'in conneos qui veont s' dire: «M'n heomme, i d'vient seot?». Ouais, j' deos avouer qu' cha peut paraîte bizarre et j'in conneos qui pourreottent pinser que ch't'à double sins, mais neon; j' vas simplemint vous raqueonter l'histoire d'eine soris dins l'Impasse.

Ein bieau jour, ch'est souvint ainsin qu' les histoires elles comminch'tent, l'imployée qui ouèfe dins eine taverne, que s' préneom ch't'Armelle, elle s'apercheot qu'i-areot bin eine visiteusse qui vient s' régaler su l' queompte du patreon...

Ch'teot facile à d'veiner vu qu' les paquets d' biscottes, savez, les ceusses qu'on sert avé l' soupe, i z'aveottent été «intamées» et à croire que ch'n'éteot pos mauvais pasque tout l' boîte elle aveot souffert.

Ni eine, ni deux, elle prévient Jean-Luc, l' patreon, de ç' qu'elle vient d' découvère et i qu'minch'tent à deux à raviser tout partout. Et d'eine logique implacape, cor pus fin limier qu' Columbo, i s'a dit: i-a eine soris dins l'Impasse.

In ravisant d' pus près, i s'a vite rindu queompte qu'elle s'in metteot plein l' gilet: l' chucolat, les soupes in sachets, les spéculoos, tout i passeot. Miard, qu'i-éteot in rache! Hureus'mint qu'i f'seot quiéaud et que l' fromache i-éteot dins l' frigo!

Alors, tout busiant, Jean-Luc i s' met à pinser qu'i-a eine sémaine, i-aveot orchu ein queop d' fil de l' police vu que s'n alarme elle s'aveot déclinché. Et bin seûr, i n'aveottent rien trouvé à ç' momint-là. Deonc, cha vouleot dire qu'elle éteot d'jà là d'puis pus d'eine sémaine!

Ch' n'est pos tout d' cha mais i feaut l'attraper et cha, ch't'eine éaute paires de manches...

Et bin seûr les clieints i z'in rajouteottent... «Mo Dieu, eine soris elle n'est jamais tout seu...» «A l' vitesse que cha s'orproduit, t' pourras faire l'él'vache dins n'paires de s'maines» Et l' patreon i-éteot tout défoutu.

Alors i-a dit à s'n imployée: «Planchons...su l' problème» Et i-a busié qu'i li faudreot ein cat. L'infermer de l' nuit dins l'Impasse, rien qu'eine, bé i pourreot d'jà faire d' l'ouvrache et l'imployée éteot d'accord de prêter l' sien. Mais l' problème ch'est qu'i-a d'jà d'l'âche et que ch' n'est pos ein marou des pus vaillants!

Alors, i resteot deux solutieons: l' poiseon et l'attrape!

L' pus simpe dins ç' ginre de situatieons, ch'est d' tout essayer. Et comme l' patreon i pinseot avoir tout sous la main, i n'a pos perdu d' temps.

Au prumier abord, l' soris, ch'teot eine filousse pasqu'elle bouffeot tout ç' qu'i-aveot dins l'attrape... mais sans jamais s' faire printe. A moins que ch't'eine questieon d'allure, aussi bin pou l' soris qu' pou l' ceu qui met l'attrape.

«I-a cha aussi, qu'elle diseot Armelle, ein p'tit peu fouteu d' gins.» Quand ç'qu'i s'a infin rindu queompte que l'z attrapes n'aveottent pus bramint d'orsorts et que l' soris, eine feos qu'elle aveot mingé l' fromache, elle pouveot s'in raller bin tranquille, i s'a dit: pos d' problème i reste l' poison ...mais seul'mint comme i-éteot périmé, i-ingraisseot l' soris puteôt que d' l'impoisseonner! Et cha a duré ainsin pindant n'paires de s'maines.

Final'mint, ein bieau jour au matin, i l'a ortrouvée, quervée dins ein coin, pos par impoiseonn'mint mais à causse que s'vinte i-aveot éclaté!

Mais l' principal, ch'éteot d' l'avoir et là...i l'aveot. Elle aveot trépassé...dins l'Impasse. Pourquoi l'Impasse? Ch'est pasque ch'est là qu' cha s'a passé, tins!

L' moralité, après tout ç' babillache et malgré tout ç' qu'on dira, pour attraper eine soris, i n'a rien d' tel qu'ein beon cat!

Allez, à l' feos qui vient, mes gins.

L'infant d' Tournai