26 septembre 2012 par Catoire

Bonjour mes gins.

J' vous ai déjà raqueonté qu' no p'tite rue, elle éteot fort tranquille, pasqu'i n' se passeot pos grand queosse.

Eh bé, cha ch'éteot dins l' temps pasque vous n'allez pos m' croire, ch'est seur'mint du jamais vu à Tournai, mais cha fait béteot eine ainnée qu' no rue est in travaux. Cha a comminché in novimpe d' l'ainnée passée. On a ouvert la mitan de l' rue. Et bin profeond savez !

Comme si qu'on alleot faire ein tunnel de métreo. Un métreo à Tournai ! Eh bé neon, neon, ceulle tranchée ch'éteot pour placher ein grand « collecteur ». Pos ein collecteur d'impeôt, neon cha i passe d'jà d'pus lommint, seul'mint ein collecteur d'ieau.

Adeon cha n'éteot foque pou d' l'ieau mais asteur on a souffert savez. A l' piquette du jour, cha commincheot, les grues, les pell'teuses, les camieons qui v'neo'ttent querre les tierres. Comme rével-matin j' vous l' conselle, ch'est radical.

Après eine paire de jours de ç' régime, tous les gins de l' rue i-éteottent esqueués comme des castagnettes.

Et pos seul'mint les gins, neon ; à chaque queop dins l' tierre, on intindeot les verres cliqueoter dins les vitrines et même les dintiers faiseot'tent « clap, clap » dins leu verre d'ieau, comme si i z'alleot'tent parler tout seus.

Et après on a vu arriver l' plouèfe. Milliard, ch'éteot l'apocalypse. L' feimme de ménache d' no n'immeupe elle brayeot d' vir s'n' ouvrache garchéné à tout bout d' champ. Infin jusse après l' nouvelle ainnée, no calvaire i-a arrêté.

On pinseot qu' tout i-éteot fini. Seul'mint, in féverrier après les froidures, mes heommes i z-eont ouvert l'avenue in haut d' no rue pour placher, adveinez quoi, ein collecteur, éné, et là i-z-eont décidé d'orfaire , in puque tout l' rue, les trottoirs, l' pavache, infin l' grand jeu, quoi !

Résultat, cha fait asteur six meos qu' no rue elle est barrée in haut. Les poubelles pass'tent ein queop sur deux ou sur trois pasque l' camieon de l' ville i deot faire marche arrière et qu' no rue elle n'est pos larque assez, mais l' camieon Dufour i passe bin li ! Pétète qui n'a pos l' même boîte de vitesses éné. Ah j'alleos oblier, i-a eine barrière in bas qui-esplique in français que l' rue ch't' ein cul d' sac et qu'on n' peut pos passer sauf « desserte locale ». I-a seur'mint bramint d'illettrés au volant pasque tout au leong du jour et de l' nuite cha n'arrête pos d' meonter in auteo ou in moteo, cha fait d'mi-tour et puis cha r'déquind.

Asteur, après les castagnettes, ch'est l' va et vient, l' lambada quoi !

Catoire