3 octobre 2012 par Catoupi

Bé on n' d'attrappe eine avé tous l'z'affiches électorales. Te n' sais pus r'wettier eine séchu sans caire sur eine berdélée d' binettes d' tous les sortes.

I-in a bramint qu'on n' fait même pus attintieon pasque ch'est d'z'affiches "normales", et qu'on les veot à tous les électieons, qu' cha soiche pou l' commune, l' province, l' communauté, l' fédéral, l' régieon ou l'Europe. Mais i d'a d'z'éautes qui-attir'tent l' regard : ch'est l' tout d' trouver eine séquoi d'espécial, comme ein slogan ou ein sourire obin eine grimace. Alfeos avec, i-a ein infant qui-a rajouté eine moustache, ou ein agozil qui-a écrit ein greos meot.

Mi, je n' sais pos si cha sert à n'eine séquoi d' foute des affiches avé s' binette dins tous les coins. On n' juche pos les gins à leu binette, à vo meote ? Bin du contraire, i-in a qui f'reottent pétête mieux de s' mucher ! J' d'ai vu ein, avec eine mine pas-tibulaire, que si je l' voireos au coin d'ein beos avec eine brouette de meontres, j' n'os'reos pos li d'mander l'heure !

I-a aussi les ceusses qui tapiss'tent des panneaux intiers in collant là-d'ssus des dizaines de feos leu portrait. A m' meote qu'i f'reottent mieux d'in mette ein grand puteôt qu' trinte pétits.

Si ch'est pos du garchennache, je n' sais pos ç' que ch'est. Avé tous les liards dépinsés inutil'mint, à m' meote qu'on pourreot donner à minger à eine paire de péaufes gins.

I d'a même qui veont coller leus affiches sur les affiches des éautes candidats. Et du même parti sivouplét ! Ch'est ainsin qu' pos leon de l' maseon, i d'a ein qui-a surcollé eine grante affiche su des p'tites affiches du même parti, in laichant dépasser eine paire de chintimètes de ses « comarates » colistiers. I deot avoir d' l'imbiance quand ç' qu'i s'rinqueontrent à les réunions d' parti !

Infin, j' n'ai pus qu' deux s'maines à vir el' même binette in rintrant dins m' rue eine paire de feos par jour, et j'espère bin qu'au soir de l'électieon, tout cha va ête bin vite ortiré, pasque ch'est eine vraie pollutieon !

I-a aussi l' nouvelle meote des photeos géantes su les auteos. Là, ch'est l' tout d' bin queusir l'implach'mint, pou n' pos avoir ses is à l' plache des poignées d' portière ou s'bouque à l'plache du réservoir d'essince. Si d'a ein qui-est chaufe, l'intenne de l' radieo elle peut li servir de poil su s' cailleo.

Dernière questieon : quand ç'qu'on met d'z'affiches dins les rues pour anneoncher eine fiête ou ein spectaque, i feaut d'mander eine autorisatieon au bourguémette... Vous pinsez qu'ichi, tous les candidats i z'eont fait eine demante ? J' s'reos bin curieux d' connaîte el' répeonse...

Catoupi