7 novembre 2012 par Codolette

Ahais, d'habitute, j' déméprisse toudis et j' cache misère à tertous. Mais ç' queop-chi, ch'est pos possipe. Pasque j' vas vous parler du spectaque que j'ai été vir à l' maseon de l' culture l' sémaine passée: l' millième cabaret du Cabaret Walleon.

Hureus'mint, m' visin (que je n' sais pos vir in peinture), i-aveot dreot à deux plaches gratuites, vu qu'iest mimbre et qu'i paie s' cotisatieon. Comme i-est tout seu, i m'a deonné s' deuxième plache.

Seûr que j' n'areos pos dépinsé des liards sans savoir ç' que j'alleos vir. J' li dis ainsin: «mais les feimmes i n' peuftent pos aller au cabaret!» I m' répeond «Sifet, i n'a foque aux p'tits cabarets qu' ch'est réservé à les heommes!».

Cha fait qu'asteur, comme i m'a deonné eine plache, j' vas ête obligée d' li dire banjour à chaque feos qu' je l' veos.

Qu'i soitte, m'ov'là à l' maseon de l' culture, et là j' n'in r'viens toudis pos de ç' que j'ai là vu. Queu belle soirée! Avec tous les gins du Cabaret su l' scène, dins l' prumière partie i z'eont fait comme si qu'i s'reottent in réunieon pou préparer l' millième.

Ein fin bieau décor, des tesques amusants, tout plein d' cancheons, bramint d'autodérisieon et aussi tout plein d' souv'nirs. In puque, i z'aveottent invité l' fondateur de notélé, Jean-Pierre Winberg, et on a pu orvir des clips des cancheons du Cabaret, qu'i-aveot filmé avec Dominique Delporte à l' fin des ainnées septante.

In deuxième partie, ch'éteot cabaret traditionnel, avec ein «bestof» des cancheonniers d'asteur. On a bin ri, on a aussi eu bin d'z'émotieons.Surtout quand i-a eu l'hommache à Rudy Sainlez. On a là pu vir que ch'teot ein heomme vraimint apprécié par toute l' Compagnie et par el' public.

Infin l'ov'là, l' seul point négatif dins l'histoire, ch'est qu' j'ai dû payer l' taxi pour ortourner à m' maseon, mais pour eine feos... j'aveos l' sourire!

Codolette