14 novembre 2012 par Pichoulit et Catoupi

Quand on dit « ein grand heomme », ch’est pos l’ même que « ein heomme grand ». Par eximpe, el’ général de Gaulle, ch’éteot ein grand heomme grand. Ichi, ch’est « seul’mint » d’ein grand heomme qu’on va parler, vu qu’i n’ fait pos ein mète septante.

Quater-vingt-sièt ans, et trint-chinq ans d’ cabaret : ch’est d’ANDRE WILBAUX qu’on parle ichi. I-aveot dit qu’i f’reot l’ millième et qu’après cha, i-arrêt’reot. Feaut dire aussi qu’i-éteot d’jà là avant l’ cheonq-chintième !

André i-a connu des fondateurs du Cabaret : quand i-éteot tout jeone, i-a même été chez Walter Ravez ! L’ jour qu’André i-est né, l’ Cabaret i fiêteot tout jusse ses dix-huit ans ! Au Cabaret, i-a connu quarante et ein cancheonniers différints !

Au cabaret, André i-a écrit des tesques d’ tous les sortes : des portraits bin sympathiques (ein franc-peaufe, l’ pétit Jov’neau,…), ou historiques (Jean Noté, Clovis,…), des cancheons poétiques (Gringotte,…) ou humoristiques (Brigate canine, L’ boxe françaisse,…). Et au momint qu’i-anneonche « s’n’ortraite », commint n’ pos pinser au fameux duo qu’i-a fait avec no n’amisse Rudy qui vient d’ nous quitter : « L’ duo des penn’tières ».

André, ch’est avant tout ein heomme qui-a de l’ culture. I sait parler in latin, in grec, i sait que l’ lieon flamind, i-a des origines wallonnes. I conneot Tournai comme es’ poche ; et l’ pichou Saint-Piat et l’ Peont des Treos i n’eont pos d’ sécret pour li, vu que s’ mopère, Jules Wilbaux, i-a ouvré su ces deux molumints d’ Tournai.

Ch’est aussi André qui-a eu l’idée, pou l’ millième cabaret, d’orprésinter su l’ scène de l’ maseon de l’ culture el’ local du cabaret, et d’ faire comme si qu’on s’reot in réunieon. Ein queop d’ génie !

Et i-a queusi ç’t’occasieon-là pou canter « Les faluches », et surtout « J’ t’aim’rai acor », eine cancheon d’admiratieon à Tournai… Tout l’ salle elle aveot l’ chair de poule. Et queulle émotieon au dernier soir, quand l’ présidint du Cabaret (qui l’aveot queusi comme parrain) li a rindu hommache ! Tout l’ salle elle éteot d’bout !

Merci pour tout ç’ que t’as fait pou l’ Cabaret, André ! Et on est seûrs que te vas acor nous deonner bin d’z’idées quand te venn’ras à les réunieons,… si t’arrifes à l’heure !

Pichoulit et Catoupi