28 novembre 2012 par Pichloulit

Ch'est seur qu'in lisant m' pétite bafoule, i d'a qui veont dire, m'n'heomme, i-est biête, i n' comprind rien. Pétète, mais ç' qui m' console ch'est que j' sus seurmint pos tout seu dins l' cas. J' vas ichi parler d'eine affaire qui m' carmousse d'puis ein moumint de l' rache que j' n'arrife pos à y voir clair.

Ainsin, je n' comprinds pos pourquoi i feaut toudis r'mette des liards pou Dexia alors qu'on cache après des liards pou boucler no budget. Et par hasard, les liards pou Dexia on les trouèfe tout d'suite mais pou l' budget, i n'a pos moyen d' trouver l' beonne solutieon et l' seule qu'on trouèfe, bé, ch'est seul'mint d' vénir dins no poche. Infin, i n' feaut pos rêver, pou Dexia avec, on vient dins no poche mais cha passe inaperçu pasqu'on direot qu'on ne l' veot pos. Diseons qu' ch'est comme l'orfroidiss'mint, on ne l' veot pos mais on l' sint.

Ahais, j'ai bin intindu qu' nos heommes politiques i z'eont dit qu' ch'éteot cha ou acore pire si on ne l' f'reot pos. Soite, mi, j' veux bin les croire, i z'eont l'air si convaincants in l' disant (tertous i sait qu'ein politicien i n' mint jamais ou si peu) mais adeon i d'a quand même ein qui dins l' temps i-a signé eine affaire qui fait qu'on est pris au pièche aujourd'hui. Quand j' dis ein, cha m'éteonn'reot qu'i soiche tout seu... Adeon, i faudreot aller les ortrouver là dusqu'i s'much'tent et leu d'minder des queomptes quand même. Pasqu'en matière de vache à lait pou rinflouer les banques, on n'arrête pos d' deonner d'puis eine paire d'ainnées. Mais que dins l' même temps, les banques, in ormerciemint pou l' contributieon du contribuape, i feont faire cheinture à les p'tits épargnants et i foutent à l' porte eine partie d' leu personnel. Cha i faudreot quand même qu'on m'esplique pourquoi qu' chaque queop qu'on les rinfloue avé nos liards, pou t'dire merci, i nous pomp'tent acore puque ; neon, j'ai bieau ortourner l'affaire dins tous les sens dins m' tiête je n' comprinds pos. Et quand j' veos commint qu'i traitent les gins in Espane, cha m' fait freod dins l' deos.

Mais là dusque j' comprinds acore moins, ch'est quand j' veos qu'on aveot ichi à Tournai eine banque qui marcheot bin, qu'elle éteot bin gérée, qui n' demindeot rien à personne et qui aveot eine masse de clients même qu'elle les connisseot presque tertous et v'la qu'on obliche à l' serrer, ch'est pos pou éclaircir m'z' idées. A m' meote qu'i d'a là eine paire qui tir'tent les fichelles (des gros banquiers flaminds seur'mint) et qui peuv'tent ainsin profiter des liards des eautes...I venn'reont seur'mint tout sérieux nous espliquer qu' ch'est l' conjoncture (ah pour cha, i connaiss'tent les beons meots) qui veut cha et qu'on n' peut pos faire autermint. Mais après cha, i s'in ireont bin vite dins leu s'conde ou troisième résidince, pasque la crise comme i dis'tent eh, bé, ch'est pos pou tertous.

V'là, j'ai toudis pos compris...ou bin j'ai trop bin compris. Dins tous les cas, i m' falleot l' dire et tant pire si te dis que j' sus trop biête pou comprinte.

Pichoulit