5 décembre 2012 par Pichloulit

L’ sémaine passée, je m’sus dém’né su les banques et tous les financiers. Décidémint, j’ sus pos d’ beonne humeur pou l’ moumint ou bin, j’ comprinds d’ moins in moins l’ meonte dusqu’on vit.

«T’ vieusis mal» qu’elle m’a dit m’ feimme.

Pétète. Ch’est seur que j’ comminche tout duch’mint à m’ faire du souci pou l’av’nir d’mes infants et mes p’tits infants et ch’est cha qui m’ carmousse d’ pus in puque.

Allez, j’ vas acore faire ein p’tit queop d’ gueule mais ch’est promis, m’ prochain artique i s’ra pus optimisse…

Ainsin, ov’là l’ nouvelle affaire que j’ai du mau à comprinte.

Comme tertous, j’ai mau à m’ vinte in busiant à tous ces ouverriers d’ Ford à Genk qui veont là s’ortrouver sans ouvrache. L’ série elle ne s’arrête pos là, i-a eu Renault, Opel, asteur Ford, sans oblier Arcelor (et j’in passe), et on s’ déminte dusque cha va s’arrêter. In puque, l’ télé elle nous moutre tout quoi ç’ qui s’ passe in Espane, in Grêce, au Portugal que jusqu’asteur ch’éteot des pays qui f’seotent rêver pou l’ solel et les vacances mais on direot que l’ solel i n’ brille pus beauqueop pou les gins d’ là-vas et qu’ cha fait peur que l’éclipse elle arrife squ’à chez nous z’éautes.

Ouais, on veot bin qu’ tous les ceusses qui ouef’tent i seont acore victimes des capitaux et des ceusses qui eont les liards plein leus tasses et qui s’ foutent pos mal des gins qu’i veont mette dins la dèche…. Ouais, j’ sais bin, on va acore dire que je n’ comprinds rien au système économique, à les lois du marché et tout cha. Pétète, mais n’impêche, l’ malheur des gins, mi cha m’ touche et j’ busie à tous nos infants et p’tits infants, à leu n’av’nir et cha m’ fait peur.

Mais alfeos ch’est pos tous les ceusses qui pertent leu n’ouvrache qui seont à plainte pou autant.

I d’a d’ timps in temps ein qui fait s’ burre avec tout cha. J’ pinse au r’tourneu d’ casaque par excellince, l’ ceu qui n’ sait pos qu’ein contrat signé cha a de l’ valeur et qui vind même s’ parole (tins, cha li rapporte) à l’ moindre occasieon. Ouais, t’as bin vu, j’ parle d’ Leekens, m’n’heomme du moumint qu’i peut faire des liards, i-a rien qui l’arrête, i-a rindu Mouscreon cocu pou aller à l’équipe nationale, après i-a fait l’ même avé l’équipe nationale pou aller à Bruches…à qui l’ tour?

Mais in passant, i passe par el’ caisse. 2,5 millions d’euros pou vider s’ vestiaire. Après deux meos d’ouvrache, ch’est ein r’cord.

Et pindant ç’ temps-là, les ouverriers d’Genk, d’Arcelor et ailleurs qui eont laiché eine partie d’ leu santé à leu n’ouvrache après eine masse d’ainnées au bouleot, i veont d’voir s’ serrer l’ cheinture au quotidien. I-a vraimint eine séquoi d’ détraqué.

V’là, j’ai toudis pos compris…ou bin j’ai trop bin compris.

On pourra dire que ch’est facile, ou acore imployer des meots comme démagogue, poujadiste pour comminter ç’ qu’j’ai là écrit, on pinse tout quoi ç’ qu’on veut mais i falleot qu’ je l’ dis, cha n’ va rien canger hélas, comme vous eautes tertous, j’ai pos les clés (pardeon, j’ai pos les liards).

Pichoulit