12 décembre 2012 par Pichloulit

Avé les fiêtes qui arrif'tent, l' temps des cadeaux i-est arrivé li avec. Par les temps qui queurtent ch'est seûr qu'i feaut bin queuzir pou n' pos ruer les liards pau cassis et in même temps essayer d' faire plaisi à les ceusses qu'on aime bin. I-a autant d' plaisi à deonner qu'à orchevoir mais alfeos ch'est ein vrai casse-tiête pou trouver l' cadeau rare, pos trop tchier et qui va surprinte. Et j'in conneos qui grattent à leu tiête pour y arriver.

Mais ç't'ainnée, cha n' va pos ête trop compliqué.

Pus questieon d' faire l' queue dins les magasins, de s' creuser l' tiête pou trouver eine idée ou acore d' queurir à l' dernière minute pour avoir eine séquoi à mette pa-d'zou l' sapin, pus questieon d' feuill'ter les kileos d' cataloques qui s'ameonchell'tent.

Neon, l'idée, elle est tout trouvée vu que l' Cabaret Walleon avé no télé, i-a eu l' riche idée d' sortir ed' ses archifes des grands moumints d' no folklore.

Du queop, i-eont sorti ein DVD « in partenariat », comme on dit asteur.

L' DVD « Ein queop d'oeul dins l' rétro », i va permette d' vir, d'intinte et de s' régaler in s' raminvrant des grands noms de l' Compagnie. Ainsin, Albert Coens avé « L'lapin du lundi perdu » ou acore Jean-Pierre Verbeke, in pleine jeonesse qui cante « L'lundi parjuré » qu' cha cait bin avé l' troisième réveilleon qui s'annonche. Mais ch'est pos tout.

On pourra orvir Eloi Baudimont, Edmond Roberte, Jean Leclercq, Ghislain Perron, André Dupriez, Félicien Doyen ou cor Lucien Jardez dins ein monoloque et bin d'z'éautes qu'on n' sait pos tertous les citer. On pourra même s' raminvrer les derbys d'antan à travers ein duo d'anthologie mais je n' vas pos ichi tout dévoiler, vous voirez bin in orwettiant l' DVD quand vous l'arez acaté.

Les ceusses qui seont v'nus vir el' grand cabaret, i-eont eu ein échantilleon de ç' pétit trésor et tertous i-est unanime à dire qu' tout Tournaisien i deot avoir cha à s' maseon.

Adeon, i n'a pos à hésiter. Vous pouvez aller l'querre au guichet « infos » des Bastieons ou à l'gestieon centre ville dins l'bas de l'rue Saint Martin ou bin auprès d'ein des cancheonniers ou même in téléphonant au 0473-17 55 42 dusque ch'est ein cancheonnier pinsieonné qui-a du temps à li. Cha li f'ra plaisi d' vous satisfaire. Et cha n' coûte que 20 euros (neon pos pou qu'i vous satisfait ... mais pour acater l' DVD).

Et si vous voulez ein deuxième cadeau, pos d' problème, i-a l' livret-CD des « Tournaisiens sont là » qui peut faire l'affaire ou bin l' life « Chint ans d' Cabaret » par eximpe.

Avec cha, ch'est seûr vous pouvez avoir l' garantie que l' cadeau i va faire d'l'effet bin puque que si vous allez acater in dernière minute ein cadeau pasqu'i feaut bin trouver eine séquoi.

Allez, beon réveilleon à tertous.

Pichoulit