15 mai 2013 par Tignace

Banjour mes gins, quand j' pinse à les z'éautes qui-eont écrit leu n'article avant mi et qui prêcheotent l'ortour du printemps pasqu'i n'd'aveotent soupé de ç' leong hiver ...

Hé bin mes gins, j'peux vous asseurer qui-eont bin éte intindus savez, pasqu'asteur, dins m'gardin, cha s'révelle et à eine de ces vitesses ! J'vous dis qu'cha, à croire que l'nature cache à rattraper l'temps perdu. Em' tchien, ein Shih Tzu, quand i s'in alleot faire es' commissieon dins l'pelousse, je ne l'véyeos pus.

Vu que j'ouèfe acor et in puque à l'capitale, hé bé quand j'rinte el' soir j'n'ai pos vraimint l'temps d'm'in occuper. Alors cha cait le wékenne tins ! Et comme on n'peut pos teonte du diminche, cha fait que m'saimedi i-est bin rimpli. Des journées ainsin, j'l'ai pus belle à m'n'ouvrache. Téonte, scarifier, tout ramasser et in route pou l'cortèche au parc à conténères.

El' pire ch'est quand m'matreonne elle met s'nez d'dins, ah j'vous dis qu'cha, ein vrai contre-maîte avec es' lanque mais, pou li faire aller ses bras pour ein p'tit queop d' main, cha deot toudis aller au magasin. D'ein éaute côté, j'sus bénaisse dins m'tranquilité. Et d'timps in temps, j'prinds l'plaisi d'boire eine pinte avec em' visin pa-d'sus l'fil.

Beon, vu que m'n'hierpe aveot l'air malate, j' m'éteos mis in route pour aller quère d' l'ingrais, du queop em'Gertrute, qui-éteot d'jà d'ortour, vouleot v'nir avec. Adeon, tout seu, j'd'aveos, à tout casser, pour cheonq minutes dins l'magasin, temps à l'caisse compris. Eine demi-heure après on éteot pos cor déhors et comme du lind'main i-faiseotent quinsse pourchint su tout l'boutique et bin j'vous l' deonne in mille, j'éteos quitte d'orvénir. J'aveos bieau li dire que j'areos à peine ein euro chinquante de réductieon su l'boîte et qu'cha n' valeot pos la peine : au prix l'essince... Mais, elle aveot r'péré des bricoles de décoratieon, des rosiers et mo dieu, j'ai tout d'suite campris qu'j'alleos devoir orvénir avec em' remorque !

Et bin l'ovlà, diminche au matin, ouverture des portes, milliard qu'i-aveot des gins... I-a fallu aller à l'course pour avoir ein carette, comme Lucien Feron qui canteot dins l'temps, « Eine qui n'perd pos ses roulettes ».

Alors ç'que j'n'aveos pos prévu, ch'est que m'feimme aveot commindé eine chintaine de p'tits pavés. Méon, j'aveos bin pris m'remorque mais depuis l'temps, j'n'ai pu busié à l'pression des pneus pour eine charche ainsin, du queop bé j'éteos quasi à plat ! On s'a ormis in route, douch'mint, pos treop vite, évitant les sécousses pou n'pos camper et avec l'état des pavés de l'ville on s'areot cru dins l'film « Le saleur de la peur » avec el' nitroglycérine. On s'a même fait doubler pa l'pétit train. I-éteot temps qu'on arriveot à l'maseon, dins m'rétro, mes pneus i-fumeotent d'jà tout bleu. Et là, arrife em' tchien qui-a toudis s'n'habitute de lever s'patte su mes roues. Je m'ai dit mais queulle brafe biète, i-va orfroidir mes pneus... Mo dieu, i-a foutu l'camp in hurlant « kaïque », méon el'paufe, i-s'a brûlé s'pétite louloute !

Beon ch'est pas tout cha, feaut détchierquer et tout ringer pou l'ouvrache qui m'attind après. Vif'mint d'main qu'j'ortourne à m'bureau. Allez mes gins, beon corache à vous éautes dins vo gardin et à l'feos qui vient.

Tignace.