10 juin 2015 par Catoupi

 Ahais, diminche, ch'est l' fiête des pères. Si vous avez l' sanche, comme mi, d'acor avoir vo papa, ch'est toudis ein momint agréape d' passer dire beonne fiête du diminche au matin.

Avec bin seûr ein p'tit cadéeau. Avé l'z'ainnées, on n' sait pus toudis quoi offère. Fini les cravates (i d'a eine banse dins s' garde-rope), les briquets (d'puis l' temps qu'i n' feume pus), ou bin les casquettes (i n'arrife pos à l'z'user).

Adeon, on va s' rabatte sur eine beonne boutelle, ou bin deux. Cha fait toudis plaisi.

Cha m' fait pinser qu'in passant dins m' buréeau, j'ai orcait d'su des cadéeaux qu' mes garcheons i z'aveot'tent fabriqué à l'école, quand ç' qu'i z'éteot'tent in gardienne ou bin in primaire : ein bieau peot d'yogourt décoré pou mette des bics ed'dins; ein collache de pinces à linche qui form'tent eine boîte, décorée pou mette des bics ed'dins; eine boîte à chaussures avé des compartimints, bin décorée pou mette des bics ed'dins...

Acor hureux, alfeos j'ai orchu des cadéeaux qui z'aveot'tent ein p'tit queop puque d'utilité : par eximpe ein cintre, bin décoré bin seûr, et cha ch'est pos mette des bics ed'dins. Ainsin j' pinse à l' fiête des pères chaque feos qu' j'ouvère em' garde-rope. Et l' pus utile ed' tout : eine décapsuleusse, avé m' préneom gravé d'ssus ! Là, i l'aveot'tent bin trouvé. Ch'est surtout comique d'intinte et' pétit garcheon dire : "Tins, papa, ch'est pour boire ta bière !"

Infin, l' principal, comme on dit, ch'est l'intintieon, et toudis ç' bieau momint quand les infants i vienn'tent t' déréveiller du diminche au matin pou t' souhaiter eine beonne fiête.

In grandissant, ch'est pus compliqué pour eusses, vu qu'i doiftent imaginer (et surtout acater eusses-mêmes) el' pétit cadéeau, eine feos qu'i n' seont pus in primaire. On voirra ceulle ainnée-chi tout quoi ç' qu'i z'areont imaginé.

Infin, pour in définir, j' vas souhaiter eine beonne fiête à tous les papas qui lis'tent ç't'artique, et surtout à m' papa à mi. Beonne fiête, P'pa !

Catoupi