17 juin 2015 par Du beos d'chuque

Et adeon mes gins, queus treos queusir ?

Cha fait d'jà ein moumint qu' cha m' tracasse tous ces gins payés pou ç' ginre d'ouvrache mais qui n'arrif'tent pos à s' décider pou trouver eine solutieon qui plaireot à tertous.

I d'a qui dis'tent que pou l' bieauté i feaudreot laicher l' caractère incien du molumint, mais i d'a d'z'eautes qui pins'tent à l'av'nir et qui seont pou l'élargiss'mint du treo du mitan. Mais quoi faire si on deot rassimbler les idées d' tertous pou arriver à printe eine décisieon qui n' s'ra pétête pos l' beonne quand tout cha s'ra fini

Pou l'esthétique bé là i d'a qui-eont des idées tout plein, par eximpe rallargir l' treo du mitan pou qu' les batieaux des croisiérisses i pass'tent pus facil'mint.

D'a d'z'eautes qui pins'tent au futur et qui veot'tent cha avé des matériaux à l' meote d'asteur, par eximpe d' l'inoxydape. Ahais du métal bin brillant d'sus no peont des treos qui-est là rassis depuis bin d'z'ainnées et bâti avec des pierres qu'on a ichi pris dins nos carrières.

Mais ch'est vrai qu'i feaut pinser à ces gins qui ouèf'tent pou ces projets d' grante valeur et laicher plache à leu n'imaginatieon. Ch'est seûr'mint pasqu'on a laiché faire les ceusses qui seont passés avant eusses qu'on a des si bieaux molumints.

Mais là j' pinse tout d'ein queop qu'on va ichi mette à l'éclusse de Kain des nouvelles portes et que si elles ne seont pos larques assez pou les grands batieaux, bé ch'n'est pos la peine de busier à tout cha !

Beon rattindeons ein p'tit queop pou vir l' suite des opératieons. J' pinse qu'on n'a pos cor fini avec cha !

Du beos d'chuque