I-a ichi eine vingtaine d’années, ein habitant d’ Call’nelle i-aveot fait eine fameusse découverte, in bêchant s’gardin: es’n’attintieon elle aveot été rattirée par eine drôle de rondelle.
Et, pour eine feos, cha n’éteot pos eine flotte...
I-a ‘té moutrer s’ trouvalle à n’ein espécialisse qui, nettiant ceulle pièche comme i feaut, dévoila tout l’ mystère: l’ partie supérieure elle éteot troée; ch’éteot eine authintique pièche d’ monnaie; elle aveot seûr’mint servi d’ médailleon.
L'hiver nous a tertous esqueué ! Rouler avé s' carrette cha coûte d' pus in pus tcher. I-est grand temps d' profiter des pestaques et des distractieons qu'on trouèfe à côté de s' porte.
Adeon, vous voulez passer ein beon diminche après-deîner sans queurir bin leon. Vous aimez acouter nos cancheonniers et profiter d' l'ambiance « cabaret » ?
Dins la vie, i feaut toudis vir el' côté positif des queosses.
Tins justemint mi à m' maseon on n'a pos treop bin fini l'ainnée vu que m' feimme elle a fait ein infractus et que bin seûr cha nous a ram'né eine masse de soucis.
Et là ch'est seûr j' pinse surtout au voyache qu'elle a dû s' taper à Bruxelles in ambulance tell'mint hyper médicalisée qu' cha nous a couté deux mille noninte huit euros et que l' mutuelle elle nous in a rindu seul'mint chint nonante. Et là te comprinds tout d' suite qu'i-a ein côté négatif.
Neon, j'vous veos d'jà v'nir avec vos greos chabeots ; je n' vas pos parler d' plucache mais puteôt des situatieons qu'on rinqueontre tous les jours. Et on s' dit bin souvint qu'i-a à boire et à minger.
Quand les gins d'Mons i parl'tent d'Saint Georges, i busit'ent tout d'suite aux fiêtes du Doudou et du Drageon. Ichi à Tournai, Saint Georges, ch'est eaute cosse: ch'est eine pache d'histoire des gins d'ichi.
Si vous avez passé du côté du quai Dumon ces jours ichi, vous n'avez pos pu vous impécher d'vir e l'clinique Saint Georges in train de s'décomposer.
Ch'est seûr qu'i feaut vife avec es' temps, n'impêche que mi tout ç' dallache, cha m'ormue l'mémoire. D'vir ainsin ces murs tout ouverts, je n' peux pos m'impêcher d'avoir eine pinsée pou tous les ceusses qui-eont passé par ceulle clinique.
Ch'est à n' pos croire el' temps qu'i fait pindant ç't'hiver. Au début d' janvier, i f'seot pus d' dix degrés. J'ai même orwettié tout biête quand j'ai vu qu'i-aveot des mouques et des picreons dins l' maseon. T'imagines pos d'ête piqué par ein picreon au meos d' janvier tout l' même !
Dins les gardins, i-a d'jà des pousses, l'hierpe elle continue à pousser qu'i faudra d' taleur tonte el' gazeon, et dins les beos i-a d'jà des gringottes deux meos à l'avanche. Béteôt no comarate Jean-Pierre i pourra canter « Ch'est l' printemps » au cabaret d' janvier...
Cha va faire béteôt deux ans qu'on a instauré l' nouvieau plan d' stationn'mint in ville in aurmintant les zones à parcmètes, in mettant des zones bleusses à deux heures et in aurmintant les zones bleusses à quatre heures. Tout cha pour favoriser l' mobilité, qu'i-a dit Mossieur Leclercq, l'éch'fin de l' mobilité. Ch'est sans doute vrai pindant l' sémaine pasque s'i n'areot pos d' parcmètes à l' rue d' Courtrai, tous les implach'mints d' parkinne i s'reotent occupés pa les professeurs d' l'école des Frères et les ceusses de l' Grand-Plache par les impoyés d' tous les aginces bancaires qui d'meurtent su l' plache.
Adeon mes gins, on est in 2012, cha fait d’jà 12 ans qu’on a passé l’cap ed’ l’an 2000 et on ne l’ direot pos.
Hasard que pou ç’t’ainnée t’as d’jà des tas d’projets... pou qu’mincher digérer tous les reveilleons qu’ t’as fait et i d’a pou ein moumint.
Acore avec eine masse de beonnes résolutieons et d’jà te pinses à n’ rien oblier. Pou cha, i-a pos d’ danger, ch’est pos les calinderriers qui veont t’ manquer. D’jà au début du meos d’ décimpe, on seonne à t’ porte.
Tout d'abord, j' voudreos souhaiter à tous nos lecteurs du Passe-Toutoute eine beonne et hureusse ainnée 2012.
Pour vous-z'éautes et tous les ceusses qui vous seont chers, comme on dit !
Et avec ceulle nouvelle ainnée, et après les deux réveilleons qu'on vient d' vife, i-a acor ein grand momint qui s'anneonche dins no ville: ch'est l' lundi perdu, qu'i d'a qu'i-appell'tent cha «l' troisième réveilleon!».
Et cha, i n'a pos ein tournaisien qui sareot l' manquer, savez !
Ch'est vrai qu' pou l' moumint les beonnes nouvelles i ne s' boucul'tent pos au portilleon.
Je n' parle pos des drames d' ces derniers jours, cha nous laiche estampernés; neon, j' vas parler des liards tout biét'mint in sachant bin qu'i n'a pos d' comparaiseon avé les drames humains, même si pou certains cha rind la vie drôl'mint compliquée.
Tertous i parle d'z'efforts à faire pour assainir les finances et chaquein i fait s' pétit possipe pour essayer d' croire que ch'est l' seule solutieon pou n' pos s'ortrouver comme les Grecs... qui n'sav'tent pus s'ortourner.
Bé je n' sais pos vous z'éautes, mes gins, mais mi, quanç' que j'ouvère em'n'aginda, j'ai alfeos invie d' m'infuir in queurant.
Je n' sais pus par dù!
Eine feos passé l' meos d' novimpe qui-est à mitan calme, i-a bin follu fiêter tous les saints: Cécile, Nicolas, Barbe, Eloi, Catherine, ... Eine riche barpe, ch'est l' cas de l' dire, pasqu'i feaut toudis boire et minger pou fiêter tout cha!
Tous l'z'ans, à ceulle périote, je m' déminte toudis commint ç' qu'i fait, Saint-Nicolas...
Cha fait d'jà eine paire de s'maines qu'on l' veot tout partout, qu'i deonne des cadéaux à les infants dins les magasins, et qu'i passe dins tous les maseons, l' pus souvint pau treo de l' quémeinée.
Bé mi, je m' peosse bramint d' questieons, savez! D'abord, queulle idée d' vouloir passer par ein si p'tit treo, avec es' baudet in puque. Péaufe biête!
J'ai li i-a eine paire de jours dins l' gazette que l' prix des timbres-poste i-alleot acore aurminter in féverrier prochain; soixante-cheoncq chintimes si te d'acates par dix ou septantecheonq si te d'acates moinse que dix!
Bé vingt neoms!
Quand te pinses qu'i t' faudra payer septante-cheonq chintimes pou ti inveyer eine lette occasionnelle à Arlon, mais l' jour que t' vas faire tes courses à Villeneuf' d'Ascq et qu' t'acates ein timpe là-vas, te n' paieras que chinquante-siept chintimes pour inveyer t'lette à Nice. Vas-t'in comprinte!
J' vas vous parler asteur du marché fermier qui s' trouèfe su l' quai du marché aux pisseons tous les verdis.
Ah bin seûr, n'allez pos cacher là après des loques ou bin des chucartes d' tous les couleurs. Ch'est ein marché pou les ceusses qui z'aim'tent bin d' minger du beon et du naturel.
I-a combin d'marchands ? Cha dépind. Au beon temps, i seont six ou bin siète et in hiver deux ou bin treos.
Eh, bé mes gins d'puis qu'on a cangé l'heure, on a l'impressieon qu'on deot d'aller dormir avec les glaines.
In puque d'cha, qu'i fait freod, ein vrai temps d'Toussaint.
Et justemint avé l'Toussaint, ch'est l'début des deux meos d'fiêtes. Seûr que l'Toussaint et l'deux d'novimpe, ch'est pos spécial'mint festif et qu'même si on trouèfe bieau les chimt'ières pleins d'chrysanthèmes, ch'est tout d'même pos fort gai.
Et alors, à m'mote qu'on va béteôt avoir ein gouvernemint! Bé i-est temps, d'puis qu'on l'attind!
On éteot comme soeur Anne, on n'veyeot rien v'nir. Mais ichi, avec Elio, i-a du beon! Infin, on l'espère.
Mais i feaut dire que si tout cha i-a traîné, ch't'à causse des Flaminds et surtout de ç'greos annochint d'De Wever. C'ti-là, tout partout dùsqu'i passe... i fout l'brin.
Vous l' savez, mes gins, ch'est ç' wékenne que l'Orvue du Cabaret elle comminche.
Saim'di à huit heures du soir, les treos queops i veont résonner et on s'ra partis pour cheonq séances d'à peu près treos heures.
N'hésitez pos à v'nir vous distraire!
Cha fait toudis du bin d' passer ein beon momint dins l' beonne humeur, in riant à z'éclats tout plein s' panche. Seul' mint, i n' vous feaut pos attinte l' dernier momint pou réserver vos plaches, et surtout pos arriver à l' dernière séance sans avoir réservé: in général, ceulle séance du deuxième diminche elle est complète eine sémaine à l'avanche!
Queus nouvelles depuis l’dernière feos ? Tout va fin bin ? Hé bé tant mieux !
Dites, z’avez vu l’z’affiches in ville dùsqu’i-est marqué « 22 nous ov’là ». Si j’ai bin compris, ch’est pou l’nouvelle Orvue du Cabaret Walleon. Mi que j’sus t’ein p’tit peu péqueu su les bords, j’ai voulu in savoir puque et j’m’ai rinseigné comme tous l’z’ans à l’feimme qui fait l’ménache dins leu local. Mais ceulle feos-chi, j’n’ai rien su savoir. D’après ç’qu’elle m’a dit, cha fait d’jà ein momint qu’i n’veont pus dins leu local de l’rue Saint-Martin. I paraitreot qu’i z’areottent invahi ein éaute bâtimint de l’ville. J’aveos d’abord busié au stade Luc Varenne, rapport au 22, qu’ch’est l’neombre d’jeueux d’su l’terrain d’fotbal ! On n’sait jamais que l’Régie elle areot sponsorisé l’Cabaret. Mais neon, i parait qu’ch’est pos cha !
Je n’sais pos si l’info elle a ret’nu vo n’attintieon inter el’z’év’mints in Lybie, l’gouvernemint qu’on direot qui s’met in route ichi et les déclaratieons d’DSK qui f’reot mieux de s’mucher que d’parader ainsin à l’télé.
L’nouvelle que j’vas ichi vous parler eh, bé, ch’est du Monopoly.
V’là qu’i z’eont décidé (qui, cha ? On n’sait pos) d’canger eine série d’villes.
I-a alfeos des gins qui m’ distent: «on attind toudis avec impatieinche el’ Passe-Partout, surtout pou lire el’ «passetoutoute ».
Et i m’ démintent aussi commint qu’on fait pou toudis avoir ed’z’idées, et commint qu’ cha s’ passe pour écrire les artiques et les deonner à l’ rédactieon.
Bé j’ vas ichi vous espliquer tout cha, ch’est vrai qu’ ch’est alfeos l’ parcours du combattant, et alfeos eine course contre el’ meontre.
Ch’est eine rue tournaisienne, elle n’a pos chint mètes de leon.
A droite in montant ou bin à gauche in déquindant, ch’est comme on veut, i-a deux nouvelles résidinces à appartemints et eine paire de garaches. In face, ein vieux mur bin héaut comme dins l’z’inciens catieaux.
L’ boul’vard i-est tout près, on l’intind ène milette mais on ne l’ veot pos.
"Quand j' s’rai grand, bin j' s’rai météoroloque..."
Ch'est ç' qu’i m'a dit l’ pétit rambille que j'ai croisé pas pus tard qu'hier pa-d’zou eine porte cochère in attindant avec li qu' les neuaches i-ont fini leu vidanche... A tous les queops, bé je n' peux pos li donner tort...
Comme météoroloque, te peux dire quoi ç' que t' veux, te peux toudis raconter des cacoules, tertous i-s'in fout, i t'acoutent quand même du lind'main... "Mi," qu’i m'a dit l'infant, "j' me d'minde si-i feaut vraimint faire la grante école pour faire euç' n'ouvrache-là..."
Neon, neon, i n’feaut pos croire qu’on a cangé no rubrique in picard in eine rubrique in latin comme du temps des messes avant Vatican 2.
I n’feaut pos croire non pus qu’on veut faire comme l’sinistre Dewever qui parle in latin pou faire l’malin mais surtout pou qu’on l’comprind, pasque avec s’flamind et tous ses dialèques, on n’est pos là de l’comprinte.
Neon, j’voudreos vous parler du beon temps qu’on prind in vacances.
Cha faiseot ein beon momint qu’ j’essayeos de n’ pus m’ dém’ner. L’ docteur i-a dit qu’ ch’éteot pos beon pou m’ cœur, surtout que m’ tinsieon elle jeue au yoyo d’puis eine paire de meos. Mais quand j’ai li l’artique de Catoupi l’ feos passée, m’ sang i n’a fait qu’ein tour et j’ m’ai dit qu’i falleot li répeonte.
Ah, mais cha n’ va pos s’ passer ainsin, savez mossieu Catoupi !
Seûr’mint qu’vous avez intindu ceulle espressieon bin des queops mais pétête que vous n’savez pus dù et quand.
Mais si vous cachez bin dins vo tiête vous n’avez qu’à pinser à ein espèce d’hurluberlu qui travailleot dins l’police et qui malgré s’n’air biète i-éteot fin futé pou li cacher des solutieons dusque l’z’eautes i z’areottent gratté à leu tiête pindant lommint. Ahais mon heomme i-aveot l’art quand i méneot eine inquête d’orpérer d’eine traque el’ ceu qu’i-aveot perpétré l’crime. Bin seûr i metteot bin du temps pou li arriver à ses fins et tout cha pou faire croire au coupape qu’i n’ s’reot pos démasqué.
Bé queu malheur ! Ch’t’à désespérer de s’ décarcasser pour organiser des festivités.
Z’avez pos li dins l’ gazette ? L’z’organisateurs de Tournai-les-Bains (qu’ cha s’app’leot dins l’ temps « Tournai-la-Plage ») i z’eont orchu ein procès-verbal pasque l’ musique elle alleot trop fort. A croire qu’i-a dins l’z’invireons ein rouspéteu ou eine rouspéteusse qui-ara fait v’nir la police. Feaut préciser qu’ ch’est asteur, à ein meos d’ l’ouverture de la plage que ç’t’affaire elle est mis dins l’ gazette. Bé i-a d’ taleur ein an qu’ cha s’a passé !
Tins, avant d' commincher, j'aveos invie d' mette in avant ein trisse anniversaire... eul 19 de juin, Coluche i rateot s' virache... Li qui diseot qu' les restos du coeur, cha n'areot pos dû durer... i n’d'a d’pus-in-puque, des gins qui minch’tent grâce à li... vingt-cheonq ans qu'i-est d'jà parti et quoi ç' qui-a cangé ?...
"Cha nous pousse..." Ch'est ç'qu’i m' diseot m' mopère quand j' teos rambille: "cha nous pousse... Te voiras, quand t'aras m'n'âche..." Mais pou cha, j'ai bin du mau, j' n'arrif' pos à l' rattraper et j’ sus fin contint d' pouvoir acor courir après li, cha veut dire qu'i-est toudis là avec nous-zeautes... Qu’i soit. "Cha nous pousse..." Ahais, cha ch'est bin vrai !
Eh, mes gins, comme el'temps i passe, nous ov'là d'jà à l'fin d'l'ainnée scolaire.
Avant cha, i-a l'z'examins bin intindu et asteur, comme ch'est à la meote, i-ara in puque les orcours, les dérogatieons et tout l'bazar. Comme i n'a perseonne d'jamais contint et comme nos hommes politiques i veul'tent plaire à tertous, on a mis in plache tout ç' bazar.
I’ vient tout jusse d’avoir quate sémaines que t’as fait t’ pet bleu, et i n’a rien à faire, i feaut que j’ te l’ dit acor eine feos : « Merci René !» ……
Et te peux d’ête seûr, j’te l’ dirai acore eine masse de queops.
D’après que m’n’heomme qui n’a jamais d’cravate et qui-a l’air aussi bin él’vé qu’ein albran, i paraitreot qu’sans l’flamind t’es pus rien ichi in Belgique ou éaute part.
Ch’est vrai qu’si t’deos commander eine pinte à La Panne ou ailleurs su l’Belgische kust, t’as intérêt à parler flamind sineon t’as l’temps d’avoir seo.
J’deos dire que je n’warte pos ein souv’nir impérissape d’ceulle apprintissache à l’école mais jusqu’asteur, j’pouveos acore m’débrouiller. Et comme tertous avant qu’les politiques i s’in mêl’tent, on trouveot l’moyen de s’parler in baragouinant dins les deux lanques.
In veyant l’titre, i-in a bramint qui veont s’deminder quoisque j’veux dire par là. Bé ch’t’eine espressieon comme eine éaute, éné ? Ah, j’in conneos qui veont p’tête pinser que j’vas parler de l’politique et anneoncher par eximpe que béteôt on ara ein gouvernemint ! Ch’est vrai que quand cha arriv’ra, i d’a pus d’ein qui s’ra saisi. Ou qu’Jean-Claute Stocman i va infin arrêter d’tout décider tout seu au FC Tournai ou bin qu’i va faire jeuer les Tournaisiens ! A ç’momint-là aussi, dins les supporters, i d’a pus d’ein qui s’ra saisi ! Et avec eine espressieon ainsin, veyez, on pourreot aussi imaginer bramint d’affaires. On pourreot l’dire aussi quand ç’qu’ein politicien, à qui on areot deonné l’Beon Dieu sans confessieon, i met s’main dins des affaires pos très claires. Beon, d’accord, autant pour mi, l’idée elle n’éteonn’reot pos les gins, vu qu’cha s’passe couramint ! Infin, j’deos vous dire que si j’ai queusi ein titre ainsin, ch’est tout simplemint pasque ch’est l’sujet imposé du Concours Prayez d’no Royale Companie du Cabaret Walleon, concours qu’on n’deot bin seûr pus présinter !
Comme tous l’z’ans, i-ara deux divisieons : l’prumière, avec ein sujet libre, pour les ceusses qui comminch’tent ou bin qui n’eont pos acor eu ein prumier prix dins ceulle divisieon, qu’ cha soiche in cancheon, poème ou monoloque, et l’deuxième divisieon, avec ein sujet imposé.
Mais l’pus simpe pour vous avoir tous les détals, ch’est d’aller à l’Office du Tourisme, et là, avec el’ sourire, on vous ormettra l’règlemint complet du concours. Ou bin su no site internet, i-a tous les rinsein’mints avec. Ou acor à l’ ferniête de no local à l’ Rue Saint-Martin si vous s’ pourménez in ville.
Après cha, i n’vous rest’ra pus qu’à écrire (avant l’ prumier août) et …attinte l’jour de l’proclamatieon des résultats. Ch’est toudis ein grand momint pour tertous, aussi bin pou l’Cabaret qu’pou les candidats et j’sus seûr que cha s’ra comme tous l’z’ans, quand ç’qu’on prononch’ra l’pseudonyme des lauréats…i d’a pus d’ein qui s’ra saisi.
Allez mes gins, à vos pleumes…et à l’feos qui vient !
El’ semaine de Pâques, ej’ sus parti avec em feimme passer deux, treos jours à la mer. Pos in France, neon, mais à l'côte belche. Bin seûr, i-d'a qui direont : «Mais i-est vraimint seot d'acor aller chez les flaminds.» A tous ces gins, j' leu répeonds : «Et pourqueo pos.» Cha fait pus d'vingt ans que j'vas passer mes vacances ou des fins de semaine là-vas et j'n'ai jamais eu ein mot d' travers avec un flamind. Bin au contraire.
J’ai orcait i-a pos lommint d’su eine liste d’ neoms j’tés qu’on donneot dins l’ temps à les gins. Par eximpe, m’ pépère, on l’app’leot Noirette, et cha li v’neot de s’ grand-père à li, mais on n’ sait pos pourquoi qu’i-aveot orchu ç’ surneom.
Ainsin dins ceulle liste (qu’elle a été faite par mossieu Gorts, conservateur du musée Edmond Courault à Kain), i d’a qu’on n’ sait pos trop ç’ que cha veut dire, comme Marie Bala, Marcel Tichois ou Baptiste Loulou. Par queonte, i d’a tout plein qu’on peut bin s’ douter pourquoi qu’i-eont hérité de ç’ sobriquet. In v’là eine pétite série (je n’ peux pos tout vous deonner ichi, i d’a presque deux chints !)
Passe-Toutoute - Passe-Partout
