Humeur
Vous d'vez s' dire qu'au Cabaret, i-a des périotes dusqu'i n' se passe rien, comme par eximpe pindant les grantes vacances. Bé ahais, là te t' fous l' deogt dins l'oeul. Par eximpe, pou l' momint, on est d'jà in train d'écrire les cancheons et les sketchs pou les spectaques de l' fin du meos d'octope, que cha s' pass'ra acor au collèche de Tournai, vu qu' les traveaux de l' maseon de l' culture i seont leon d'ête finis. Mais ch'est pos grafe, que du cantraire, vu qu'on est là fin bin. Eine eaute queosse qui va s' passer, ch'est l' cabaret à Tournai-les-bains, cha s'ra l' diminche 12 août pindant l'après-deîner. Ch'est toudis fin comique d' canter comme si qu'on s'reot à la mer, avé les gins assis su des fauteuls, pa d'zou les paraseols, les pieds dins l' sable. Feaut espérer qu'i-ara du solèl, pos comme i-a eine paire d'ainnées, quand ç' qu'on a d'vu dét'ler de l' rache qu'i dracheot. Infin, i m' feaut aussi vous rapp'ler que l' concours Prayez i-est ouvert s'qu'au 31 juillet, adeon n' trainez pos si vous avez invie d'écrire eine cancheon, ein poème, ein monoloque, eine prose. L' règlemint complet i-est su no site internet. Pou les débutants, ch'est important d' bin lire ç' réglemint. Par eximpe, i feaut absolumint écrire in patois d' Tournai. Et si on invoie eine cancheon, i feaut absolumint mette l' partitieon avec, dins l'inverlope. Dins ceulle prumière divisieon, on peut traiter n'importe queu sujet. Dins l' deuxième divisieon, i-a ein sujet imposé : « Si ch'est pos malhureux ! ». Tertous i peut utiliser ç' sujet. Par queonte, les gins qui z'eont d'jà eu ein prumier prix l'z'ainnées d'avant, i n' peuf'tent participer que dins ceulle divisieon, et pos dins l' prumière divisieon. Ov'là ein p'tit résumé utile avant d' printe quand même eine paire de jours d'orpeos. Là-d'ssus, beonnes vacances à tertous. Catoupi
Bé on est propes avec cha ! Mi, qu' je n' sus jamais continte, ej' veos surtout qu' ch'est l' saiseon des pichoulits... Dins l' temps, j'aveos ein p'tit couin d' pélousse, et ch'éteot d'jà eine barpe d' dévoir coper l'hierpe tous les s'maines. In puque on m'aveot conseillé d' mette ed' l'ingrais pou qu'i pousse mieux et pus vert. Bé vingt neoms, avec cha i m' falleot l' teonte deux feos pus souvint, et ç' qui pousseot acor pus vite, ch'éteot les pichoulits, avé ces horripes fleurs gueaunes qui s' trinsforment in pluches qui vol'tent et qui s'orsèm'tent.
I-a des périotes dusqu'i-a des meots ou d'z'espressieons qui-orvienn'tent toudis. Par eximpe, i-a eu l' fameux « quelque part », ou bin « en fait ». Pou l' momint, on intind souvint les gins dire « du coup ». Mais l' meot qui m'énerfe l' puque, ch'est « voilà », pasqu'i-arrife dins tous les converzatieons sans raiseon. Cha s'reot in patois, on direot « l'ov'là ». Ch't'ainsin qu' dins les intervious des fotbaleus, ou bin les commintaires des commintateus ou chroniqueus, on peut queompter les « voilà », pardeon, les « ov'là » par dizaines. Acoutez ichi ein estrait d'interviou d'ein d' nos fotbaleus à l' coupe du meonte :
Chaque ainnée, in mai obin juhin, les visins d'ein quartier ou d'ein villache i seont invités à s'ortrouver insanne pou faire fiête. Ch'est l'auberche espagnole. Chaquein i ramène ein plat et eine boutelle. Cha, ch'est eine feos par an. Ch'est là que t' veos pou l' prumière feos l' tiête du soyeu qui teond s' pelouse l' diminche à midi. Te découvères l' ceu qui t'invèye, pa d'zeur l'héyure, à t'in faire attraper les iéaux, les sintimints des saucisses de s' barbecue l' saim'di au soir. T'orconneos l' veox de ceulle qui bérielle comme ein mauviar les cancheonnes d'Édith Piaf in laichant s' cassis ouvère. Te n'oses acore trop rien dire et, comme ein soucard, te fais des risettes à tertous et te complimintes les madames su leu cuisine. Mais beon, te fais connissance. Infin, si on peut appeler cha connaîte, pasqu'à part d'minder à t' visin s' pétit neom, dusqu'i-habite et où qu'i ouèfe, te n'apprinds pos grand cosse. Hasard si te sais si i-est in ménache et si i-a d's infants.
Ch'est les leongs jours et l'ortour de l' saison des porménates. T'in veos qui veont à pied, mais bramint puque in train d' pédaler. I-eont des mailleots peinturlurés que même les carnavaleus i n'osereottent pos in ête attifés. Te les mettreos au mitan du gardin, t' n'areos pus ein osieau. C'est souvint l' diminche au matin qu'i seont à l'ouvrache. In vrai, i trach'tent pou avoir seo pou l' momint d' l'apéro. Mais i n'eont pos l' temps d'attinte et leu lanque i fait l' drapéeau avant l'heure. Adeon is in chiffl'tent d'jà eine pou n' pos morir d'un fatal orséquemint. Pou n' pos ête incombrés avé les bideons vites,i n' d'a qu'i les ru'tent à tierre. I feont l' même avé l's imballaches des chucartes qu'i ming'tent in roulant. Ch'est ainsin qu'on trouèfe tout plein d'orbuts au bord des routes et dins l'hierpe des fossés. Dins l' crape, les pus pires affaires, i paraît que ch'est les mégueots, mais aussi les pales que te beos avec. I d'areot des miards dins l' meonte. Pou l'orcyclache, i n' d'a ein qu'i-a eu l'idée d'impoyer du macaroni puteôt qu' des chalumeaux in plastic. Je n' sais pos queu goût qu' cha va deonner, mais j' jimoule l' tablature si te beos de l' soupe queaute. L' macaroni i va flobir et d'vénir tout mou. I n' d'a qu'i-eont vraimint d's idées d' seot.
Faisez eine risette, vous êtes filmés. J'ai li dins l' gazette du saim'di qu' les magasins is alleottent pouvoir mette in public dins tout l' boutique les imaches d' leus caméras d' surveillance. J' jimoule ein p'tit garcheon qu'i dit à s' manman : « Ravise, on est à l' télé ! » Ouais, mais ch'est in direct et ch 'n'est pos à Notélé ! D'jà qu' je n' sus pos à m'n aisse quand j' passe à l' sortie sans achat. Ch'est quand j' n'ai pos trouvé l' promotieon du foldaire pasque l' camieon i-a pos acore livré vu qu'i-aveot grève au dépôt, comme i m' l'a dit l' vindeu. J' sus t'alors tellemint mansé que j' tourne m' tiête à droite et à gueauche. J'ai idée qu' tertous i m'orwette comme si j'éteos ein filouteu avé tout plein d' marchandisses dins mes tasses.
Salut tertous, Mayday Mayday qu'i direot m' copain inglais !! Ou l' GPS d'ein étringer quançqu'i arrife à Tournai ! Pasqu'avé tous les travéaux qu'i-a là d'dins, bé faudreot ein dreône pou s'ortrouver... Cha n' sert à rien d' lire les pannéeaux vu qu'i-est marqué pa d'sus « déviatieon » ! Ah cha, i-a pos à dire quançque t' roules dins Tournai, te dévies... T'es tell'mint dévié qu'i féaut faire attintieon de n' pos orsortir de Tournai et d'aller vers Courtrai ou Mouscron ! L' seul avintache, ch'est quançque t'es dévié vers Mouscron pasque t'as eine croque ! Pour cha, i véaut mieux aller à l' clinique à Mouscron qu'au Chwapi...
Ov'là eine espressieon qu'on dit bin souvint. Et on peut dire que ch't'eine espressieon qu'elle peut ête optimisse, ou bin l' contraire. Mais je n' vas pos ichi dév'lopper l' sujet, ch'est puteôt à vous-éautes de l' faire, vu que l' Cabaret i-a queusi ceulle espressieon comme sujet imposé pou l' concours Prayez. Jusse eine paire de rappels du réglemint : i-a eine prumière divisieon, uniqu'mint pou les gins qui n'eont jamais eu d' prumier prix au concours. Dins ceulle divisieon, i-a l' catégorie "chansons" (i feaut fournir el' partitieon obligatoir'mint, même si ch't'ein air connu), l' catégorie "poèmes", l' catégorie "monologues", et ceulle ainnée eine nouvelle catégorie : « prose », ch'est ein tesque in continu, ou eine saynète, ou eine poésie libre. Dins l' deuxième divisieon, tertous i peut participer, même les ceux qui z'eont d'jà eu ein prumier prix (mais pos les gins du Cabaret bin seûr). Et ch'est là qu'i-a ein sujet imposé, que ch't'ein nouvieau tous l'z'ans. On peut présinter eine cancheon, ein poème, ein monoloque ou ein tesque in prose, tout i-est dins l' même catégorie. Adeon, ceulle ainnée, l' sujet ch'est : " Si ch'est pos malhureux ! ". Bin seûr, i feaut écrire ses tesques in patois tournaisien, ch'est l' réglemint. Adeon si vous êtes d'ein villache à eine paire de kilomètes, i feaut bin vérifier vo vocabulaire et vo n'orthographe, par eximpe avec el' glossaire de Lucien Jardez, qu' ch'est comme qui direot l' Larousse ou l' Robert tournaisien (je n' parle pos d' l'éch'fin, vous l'arez adveiné). Acor eine queosse importante : vous d'vez signer vos œuvres avec ein pseudonyme, comme cha l' jury i n' sait pos qui ç' que ch'est qui-a participé, et mette vo-n-idintité dins eine inverloppe bin serrée. Et vous d'vez inveyer vos tesques avant l' 15 août au local, tous avé l' même pseudonyme. Dernière nouvieauté : i-ara ceulle ainnée ein prix espécial pour les moins d' trinte ans : cha va s'app'ler l' prix « Rotleot », vu qu'ein rotleot, ch'est quéqu'ein qui-est jeone. Adeon, dins l'inverloppe, i vous feaut aussi mette vo date de naissance. L' réglemint complet i-est su l' site internet cabaretwallon.be, et aussi à les ferniêtes du local au 54 de l' rue Saint-Martin. Et on peut même y trouver ein contact pou des rinsein'mints. Adeon, n'hésitez pos : à vos pleumes ! Catoupi
Salut tertous, mais queulle histoire avé les travéaux au quai Vifquin. Mindémint quançqu'on va orsaquer l' peont-à-peonts... N'impêche, eine feos r'saqué, cha va paraîte bizarre l' rue sans peont... Pasque sans peont, te cais dins l'ieau, ch'est ein espert in mathématiques qui m'a dit cha ! I m'a même dit que d'ichi-là, l'ieau coul'ra pa d'zous l' nouvieau peont... Pindant qu'i n'ara pos d' peont, les responsapes i-eont prévu ein seorte d' pass'relle pou passer au d'zeur d' l'Esquéaut... Mais pos assez grante pou les ceusses in cayère à roulettes !
Salut tertous, je n' sais pos pour vous mais mi j' sus mate... Inter les allergies à les fleurs et l' pollen, l' cang'mint d' heure que je n' m'in sus toudis pos r'mis, et l' caleur qui-arrife tout douch'mint, eh bé ch'est pos facile tous les jours ! Mais n'impêche, j' warde l' bénaisseté d' vife pasque queu plaisi que l' bieau temps soiche là (dins tous les cas, i fait bieau pindant qu' j'écris ceul artique), ch'est l'heure des prumiers barbecues... évidemmint, te n'arrifes pos à l'alleumer margré treos lites d'essince ! Quand te pinses, qu'au Portugal, eine cigarette mal éteinte i-a brulé treos chint hectares et ti te n'as pos l' tour d'alleumer ein mète carré !
Ch'est organisé pau l' Royale Compagnie du Cabaret Wallon Tournaisien. L' diminche 6 du meos d' mai, après-deîner, i-ara tout plein d'infants d' Tournai et d's alintours qui veont moutrer qu'i seont bin « des gosses, eine binde de p'tites rosses », comme tertous i l'a été dins l' temps. Cha va s' passer à Tournai dins le Hall des Sports pa d'rière l' Maseon de l' Culture. Cha va c'mincher à 13h30 et ch'est intrée libre, l' sortie avec. Av'nez adeon.
Salut à tertous, neom de zeo, j' viens d'aller tout jusse à l'inauguratieon du fossoyeur du Chintre-ville, T'adveines d' quoi j' parle mes gins... Bin seûr des Bastieons éné ! L' pus dur à les Bastieons ch'est d'y arriver... Pasque les boul'vards, ch'est pos eine mince affaire ! Puis, féaut savoir qu'i-a là-vas ein parkine pa-d'zous l' tierre.
Bonjour mes gins, j'in r'viens toudis pos de m'n avinture que j' me d'minte dùsqu'on va et d' quoisque d'main i s'ra fait. Du temps de m' jeonesse, m' mopère m'appreneot à réparer ou bin à récupérer d'z'affaires avant d' tout foute à l'ordure. Tout ç' qui pouveot ête réparé l'éteot, proleongeant ainsin s' durée d' vie et ch'teot ein bonheur du style d' dire qu'on aveot eine télé d' p' puque d' douze ans. Z'avez cor eine télé d'au moinse douze ans, vous-z'éautes ? J' vous apprinds pos qu'asteur tout i-est carculé pou caire in raque après l' périote d' garantie. Mais dùsque j'ai été estomaqué, ch'est chez « Mister Minute ». Fini l' temps du p'tit cordonnier d' quartier qui saveot faire s' métier. J' m'ai présinté in d'mindant si cha s'reot possipe d'orfaire l' pétite couture à m' savate qui-éteot partie au niveau des deogts d' pieds, pou mi ainsin ortrouver tout l' confort que j'aveos d'dins ! (paire acatée vingt eureos i-a six meos)
T'as d'jà busié à tous les neoms qu'on donne à nos équipes d'fotbal. Ainsin chez nous z'eautes, avant d'ête « rouches et blancs », on éteot les « Sang et Or ». Comme elle diseot l' cancheonne l'or ch'est l' richesse (et i-in feaut aujord'hui pou faire tourner ein club ed' fotbal) et l' sang l'énergie du corps. Mais i-a des « Sang et Or » bin connus, ch'est l' Racing club de Lens que ch'est pos des unijambisses, sais-te mes gins, et dusqu'i-a bin d' l'émotieon avant les matchs quand l' public i cante « Au nord, c'était les corons ».
Bonjour mes gins, quand j' pinse que parmi vous éautes, i d'a qui n'seont pos contints ! Pos contints de n'pos avoir su avoir eine plache à no dernier P'tit Cabaret « Tout public » qu'i-a eu à l'Halle-aux- Draps l' sémaine passée. Avant l'ouverture des portes tous les plaches éteotent vindues ! Bin seûr, dins l' banse d' raleus i-aveot m' Gertrute ... J'aveos oblié d' li dire ... Elle éteot cor bin in rache ; à s'n'habitute quoi, in beonne santé !
Bonjour, savez, mes gins. Je n' sais pos ç' que vous in pinsez, mais mi, i-a eine séquoi qu' je n'sais pos m'in ravoir. Cha fait d'jà des ainnées qu' les scieintifiques i nous parl'tent d' récauff'mint de l' planète in nous disant qu' si on n' fait pos attintieon à l' couche d'ozone, les glaches i veont fonte et l' nivieau des mers i va meonter. Et qu'on deot faire attintieon à l' pollutieon et surtout écolomiser l'ieau. Pasque sineon, i-a des régieons qui veont disparaîte. Au prumier abord, cha peut faire peur... Au deuxième rabord, comme i diseot l'éaute, te t' dis que l' Flandre elle est l' prumière à y passer et qu'on pourreot in ête débarrassé définitiv'mint. Ouais, mais cha ch'est d' l'humour, éné, pasqu'avec l' sanche qu'on a, la plupart des Flaminds i sareont nager...et i venn'reont s'installer par ichi ! Ah neon hein !
Bé cha y est, cha rapproche. Ahais tins les cloques elles veont béteot s'in aller et du diminche de Pâques et bé elles veont orvénir. Cha s'ra fiête pou tous les ceusses qui-eont acore des p'tits rot'leots qui s'reont fin contints d' queurir dins les gardins pou vir ç' que Marie-Ponteoisse elle ara là pondu. Pou les grands, bé après cha i-ara l'apéreo et quand i s' mettreont à tape, i-ara l'agneau Pascal bin fourré avec ed' l'al (infin pou les ceusses qui-aim'tent cha) et des beonnes hierpes du gardin. Après ceulle belle pièche de viante et bin i-ara cor l' même pou l' dessert in feorme d'agneau mais cha s'ra de l' glache vanile.
Les cabarets d' mars, ch'est ... in mars. Adeon, i-est d'jà v'nu l' temps des cabarets de l' deuxième série, après les ceux du meos d' janvier. Ein tout nouvieau programme, qui colle à no n'actualité. Au Cabaret Walleon, i z'eont voulu faire eine espérieince d'puis deux ans, et i z'orcomminch'tent ç't'ainnée. J' vous esplique. I-ara deux séances, les verdis 16 et 23 mars au soir, que ch'est comme d'habitute réservé à les heommes. Adeon, les gins du sexe "fort", qui z'eont d'jà leu carte, i rint'tent pour rien. Les ceusses qui n'eont pos cor leu carte, i peuf'tent l'acater et i z'areont deux intrées gratuites pou les grands cabarets au meos d'octope.
« Drôles de biètes », ch'est l' thème du carnaval qu'i va avoir à Tournai l' wékenne qui vient. In v'là ein thème qui va bin aller à eine paire de confréries : les mouques à miel, les flamands roses, les coccinelles (qu'on deot puteôt app'ler les biêtes à beon Dieu), les loups (même si i seont garous), les lapins perdus (qu'on d'vreot puteôt app'ler les lapins du lundi perdu), les chats-touilleux, les minnies (qu' ch'est bin seûr des soris), et même les diablotines, vu qu' ch'est des quéautes lapines, les diapes, vu qu' ch'est alfeos d'z'ours, les rats d'eau teuh (cha ch't'ein bieau jeu d' meots !), les Titis (même si cha n'a rien à vir avec Grominet), les sott' vaches et j'in oblie seûr'mint eine banse.
Si vous êtes comme mi et qu' vous pourménez souvint in ville, vous arez seur'mint d'jà rinqueontré ceulle nouvelle espèce d' piéteons. I seont jeones et i z'eont eine pétite séquoi infonchée dins leus deux orelles. Comme eine sorte d'hariqueot noir avec ein fil qui déquind dins leu poche. J'aveos pinsé d'mander à mes gins quoi ç' qu'i z'aveot'tent là comme harnach'mint, mais à vir leu tiète, je m'ai dit qu' cha s'reot pus simpe d'aller d'mander quoi à Jules, l'pétit garcheon de l' sœur de m' viseine. J'ai été tout estamperné quand Jules i-a sorti ein machin tout parel de s'poche in disant « Mais ch'est ein lecteur MP3 éné !. Tous les jeones i-z'eont cha asteur ! » Et quoi ç' qu'i lis'tent avec cha adeon ? Bé i n' lis'tent rien, i z'acou'tent de l' musique. Ah et cha va fort ceulle invintieon ? Bé cha dépind, ch'est comme on l' règle hein.mais i n'a qu' nous qu'on l'intind adeon cha n' dérinche personne !»
Salut tertous,... A part mi-même, j' m'aveos dit que l' Français i-éteot fait à part d'ein éaute, quanç'que j'ai intindu qu' tout partout dins l'hexagone, et dins tous les supermarchés, i-aveot eu là des randouillaches pasque l' Nutella i-éteot in réclame... Te sais bin qu'i n'd'a qu'i-eont orchu su leu guife tout cha pou eine pâte à mette su l' tarteine... Inter nous, l'Ourang Outan i deot braire s' fouèle de palme dins s' main quançqu'i veot l' rache pou l' Nutella... Pasque tout douch'mint, l' sinche i meurt de faim. On déquind tous les abres palmiers pou confectieonner s' choco. Ch'est les mêmes abres qui rindent l' quadrupède bin contint fell'mint qu'i les minche...
Dins l' gazette, j'ai li qu'i-aveot ein life « Martine visite Tournai » qui-alleot béteôt sortir. I paraît qu' ch'est ein guide touristique pou l's infants. Martine pormène pou moutrer les bieautés d' no chité et d's alintours. Je n' sais pos si elle va osoir aller tout partout. On pourreot in raqueonter des banses pou savoir si nos bâtimints i seont bin interténus obin si ch'est nos dirigeants qui n' seont pos tous d'équerre. Infin, pétête que cha s'ra l' prochain tite d' Martine : « Martine i fait de l' politique à Tournai ». À m' mote que cha s'ra in trinte épisodes vu l' triclée d' sotries d' nos édiles.
Tous l'z'ans, on s' délaminte à l' fin du meos d' mars pasqu'i feaut canger l'heure, pou passer à l'heure d'été. Ainsin, on perd eine heure à s' lit, comme on dit. Et on a du mau à s' lever pindant eine paire de jours. Quand cha cait in même temps que l' carnaval à Tournai, on n' veot pos treop l' différince, du moins si on est carnavaleu comme Arnitoile, qui-écrit elfeos d'z'artiques ichi. Li, d' toutes faceons, i-est esquinté pa ceulle belle fiête, alors eine heure in moins à s' lit, cha n' canche pos grand queosse.
Pou eine feos, je n' vas pos ête déméprisant, mais vous raqueonter ç' qui s'a passé avant m'n opératieon. J'éteos à l'hôpital dins m' lit, avé l' docteur au d'seur de m' tiête. Cha fait tout drôle d' vir eine séqui ainsin avé ein masque et ein p'tit capieau vert. « N' vous in faisez pos, tout i va bin s' passer ». Rien qu' pasqu'i l' dit, ch'est qu'i n'est pos seûr de s'n affaire. J'éteos tout trannant et ch'est alors qu'i m'a fait eine piqûre. In moins d' temps qu'i feaut à m' feimme pou berteonner quand j' d'ai fait eine, j' n'aveos pus mau nurvart. Tout i-alleot bin. J'éteos fin bénaisse. J' m'ai sintu su ein neuache. J'aimeos m' feimme comme au prumier jour. S' veox i-éteot ceulle d'ein anche qui canteot tout douche. Mes infants i n' berleottent pus, i n'aveottent pus d' mouquile à leu nez et i m' faiseottent des mimisses su m' bajote.
Bonjour, savez, mes gins. J' vas ichi vous in raqueonter eine. Comme quoi aller printe l'apéreo dins ein bistreot du chintre-ville, ch'est alfeos beon... cha n' s'reot foque pou l'apéreo in li-même. Mais ç' jour-là, ch'teot jusse avant les fiêtes, alors que l' patreon i m' serveot eine beon Picon, l'ov'là ein éch'fin d' no beonne ville qui rinte tout défoutu ! On areot tout dit ein qu'i-aveot perdu s' quinzaine. Et alors Gégène – j' l'appelle ainsin pou n' pos dévoiler s'n idintité – quoisque ch'est qui t'arrife ? « Te n' sareos jamais ad'veiner ! I n'a qu'à mi qu' cha arrife des affaires ainsin.
Bonjour, savez, mes gins. I-a pos lonmint, j'ai li ein artique qui parleot des liards et surtout des banques. Et ç't artique i diseot qu'i falleot faire bin attintieon d' pos laicher trop d' liards su s' queompte. Pour cha i faudreot d'jà d'avoir. Infin soitte, i diseottent qu'i valeot mieux n' laicher que ç' que vous arez b'souin pou payer tous vos domiciliatieons et orprinte l' restant in liquite. Cha fait que quand vous allez faire vos commissieons, puteôt que d' payer avec vo carte, vous allez deonner des liards et rien qu' cha, cha fait faire des écolomies pasque du queop, vous allez faire attintieon à ç' que vous allez acater. Ch'est d'jà cha.
Bonjour mes gins, vous savez, comme dins beauqueop d' ménaches, ch'est m' feimme qui fait les commissieons. Ch'est mieux ainsin pasque quanç'que ch'est mi que j' les fais, j' finis toudis par oblier eine séquoi, et à chaque feos, m' feimme elle berteonne. Et même quanç'qu'elle me fait ein billet, j'oblie que j'ai ein billet dins m' poche. Vous veyez, j' sus v'nu au meonte sans mémoire et ch'est pour cha que j' n'aime pos faire les commissieons mi-même.
L' ceu qui pinse qu'i n'a foque à Tournai qu'i-a des travéaux tout partout, i n'a qu'à printe s' carrette et essayer d'aller s'qu'à Namur su no belle autoroute d' Wallonie, que par indreot te direos tout eine carrière de cinse. Cha ch'est seur qu'i feaut mette des cataplasses tout partout pou boucher les nids d' poule qu'alfeos ch'est même des nids d'autruche. Je n' comprinds pos commint in France par eximpe i n'a pos tous ces treos. Hasard (pos Eden...) que quanç'qu'on a construit ces autoroutes on a ouvré à l' pétite sémaine. A espérer qu' les rafistolaches qu'on fait asteur cha va pouvoir durer lonmint... Pourvu qu' ch'est pos l'même interprisse que ceulle qui a mis les pavé su l' grand-plache à Tournai.
Je m' diseos cha dins m' tiète quançque j' orwettieos les informatieons dins l' meonte intier. Te t' rinds queompte... In Espanne, les catalans veont béteôt d'voir payer leu tortillas avé des francs... catalans. Et l' monnaie d' par-là, cha n' veaut pos ein' brindill' d'hierpe. Pindant qu' leus édil's politiques i z'eont pris orfuche in Belgique,... In Iran et in Irak, t'aras saisi que j' parleos de l' freontière, i-a eu là ein séisme comm' si qu' Maggie Deblock ell' areot bourlé de l' cayère.... El' bilan i-est dur, 400 morts éné.
Bonjour, savez, mes gins. On dit alfeos qu'i-a des travéaux dins no ville. Mais i n'a pos qu'ichi savez. L' jour du Toussaint, on a été visiter Dunkerque et là-vas, ch' n'est pos trisse neon pus. I-a des déviatieons tout partout, l' GPS i tourneot seot mais comme ichi, on finit toudis par trouver l' beon qu'min. Mais orvéneons à no ville. I feaut bin orconnaite que quand ç'qu'on a fini d'ein côté, on ouverre eine séchu ailleurs. A croire qu'i n'saf'tent pos s'organiser.
L' titre i-est surprénant quansqu'on sait qu' mi, je n' sus pos su ces machins-là mais pou ein queop, j'areos bin fait d'y ête. J'esplique. Comme j'aveos oblié d' payer m' cotisatieon 2017 au Cabaret, j' n'ai pos été averti des dates du grand cabaret du meos d'octope. Du queop, j'ai ravisé l' gazette tout l' meos. J' croyeos que comme tous l'z'ans, i-areot ein bieau artique d' mossieu Boussemart que j'aime bin s'n'écriture mais... rien, pos ein meot dins l' gazette pou anneoncher ç' qui-est quand même ein évèn'mint attindu par plein d' gins. Adeon, j' m'ai dit, « Seur'mint qu'i n' veont rien faire ç't'ainnée ». Du lundi au soir, j'ai ravisé No Télé et j'ai vu ein orportache su l' grand cabaret. Mais comme i n'aveotent pos dit qu'on pouveot acore aller l' wékenne d'après, j'ai busié, « Ah, bé zut alors (j'ai dit ein eaute meot mais j' sus trop bin él'vé pour l'écrire), j'ai l' bleusse vue ou bin j'ai raté l' coche pou l' prumier queop d'puis 10 ans ».
No planète, tertous i l' sait bin, elle se réqueauffe. I feaut faire eine séquoi pou limiter l'z'émissieons d' CO2, diminuer l' gaspillache, faire des produits orcyclapes... sineon, on queurt à l' catastrophe et nos p'tits-infants i d'vreont respirer d' l'air in boutelle, et s' mucher pa-d'zous ein parasol tout du leong d' l'ainnée. El' film d' Al Gore, ia eine paire d'ainnées, i-a bin fait comprinte à tertous que l' situatieon elle est grafe. I-a des documintaires, d'z'artiques d' journal, et même des cancheons, qui dis'tent aussi qu'i-est grand temps d' faire attintieon.
Ahais, d'habitute, j' déméprisse toudis et j' cache misère à tertous. Mais ç' queop-chi, ch'est pos possipe. Pasque j' vas vous parler du spectaque que j'ai été vir au collèche de Tournai l' wékenne passé : « A part cha tout va bin ! » par el' Cabaret Walleon. Hureus'mint, m' visin (que je n' sais pos vir in peinture), i-aveot dreot à deux plaches gratuites, vu qu'i-est mimbre et qu'i paie s' cotisatieon. Comme i-est tout seu, i m'a deonné s' deuxième plache. Seûr que j' n'areos pos dépinsé des liards sans savoir ç' que j'alleos vir. J' li dis ainsin : « mais les feimmes i n' peuftent pos aller au cabaret ! » I m' répeond « Sifet, i n'a foque aux p'tits cabarets qu' ch'est réservé à les heommes ! ».
Bonjour, savez, mes gins ! L' sémaine passée, in mettant d' l'orte dins m' bureau, j'ai cait d'ssus des m'nus qui v'neottent de m'n arrière-grand-père. Comme i-éteot volontaire pompier, ch'teot des m'nus de l' fiête de Sainte-Barpe et cha r'meonteot à l' fin des ainnées dix-huit chints... Quand on veot tout ç' qu'i mingeottent à ç' temps-là, ç' qu'i-a d' seûr et certain, ch'est qu'i pouveottent aller conte l' vint...et qu' nous-éautes, à côté d'eusses, on est des p'tits garcheons !
I a eine paire de s'maines, in ravisant l' programme télé de l' soirée, m' feimme cait d'su ein film ed' mil nué chint sieptante : « Dernier domicile connu ». Nous ovlà adeon imbarqués pour ein « ortour vers l' temps passé ». In beonne companie, éné, avé Marlène Jobert toute jeone et m' copain Lino Ventura dins l' forche de l'âche. Eç' film i raqueonteot l'histoire d'ein commissaire et d'eine jeone auxiliaire de police qui cacheot'tent ein témoin capital qu'on aveot pierdu d' vue. On n' saveot qu'eine séquoi sur li, s' dernière adresse connue : ein jeu d' piste estra, pos d' violince pour rien comme asteur, mais ein rythme sout'nu et du « suspinse ».
Bonjour, savez, mes gins ! Queus nouvelles depuis l'dernière feos ? Tout va fin bin ? Hé bé tant mieux ! Ov'là d'jà v'nu l' temps des Grands Cabarets d'octope ! Sifait, vos amisses les cancheonniers du Cabaret i seont d'jà in plein dins les répétitieons, pou vous offère ein bieau spectaque comme tous l'z'ans.
I-a eine paire de meos, on a hérité d'nos infants ein tchien. Infin normal'mint i-éteot mis in pinsieon chez nous-eautes in attindant. In attindant d'ête adopté éné. Ah on n' deveot pos s'in faire, on alleot mette des affiches tout partout et in deux s'maines de temps no d'mandeu d'asile à quate pattes, i-alleot trouver ein nouvieau maîte. Ch'est cha, qui ch'est qui va adopter ein tchien d' siept ans passés et qui n' surporte pos d' treop les p'tits infants ? Pos grand meonte bin seur et ch'est normal éné.
Nos édiles i s' foutent du commerce local et cha fait quarante à chinquante ans qu'i feont tout pou l' mette à bas. I-eont d'abord permis l' constructieon des Bastieons, du zoninque à Froyennes et l' ceu de l' chaussée d' Bruxelles. Comme i n' d'aveot pos core assez, i-eont permis leu n'extinsieon. Feaut vir tout quoi qu'on construit acore aujord'hui à Froyennes et aux Bastieons. Et avé tous les travéaux qu'on a faits pindant eine paire d'ainnées au chintre ville, on a tué les boutiques ein peo puque. Et ch'est l' même avé tous les aménag'mints qu'on a faits autour de l' cathédrale dùsqu'on n' sait pus dùsqu'elle est l' plache pou les piéteons, pou les vélos ou pou les carettes. Ch'est dingereux d' pourméner dins ces rues tell'mint qu' les carettes i roul'tent vite. Feaut dire qu'i-a certaines rues l' soir, comme l' rue d' l'Hôpital Noter-Dame, que ch'est des vraies autoroutes pou les carettes. Feaut pos ête étonné qu'i n'a pus perseonne qui veut faire ses commissieons dins ces rues-là.
Vous s' rindez queompte, mes gins. Ceulle ainnée, cha f'ra nué chints vingt cheonq ans qu' les Tournaisiens i poursuiftent l' même traditieon : eine processieon pour ormercier Noter-Dame aux Malates d'avoir libéré la ville de l' peste. D'ainnée in ainnée, d' génératieon in génératieon, les habitants i-ornouvell'tent l' même geste. Traditieon, ch't'ein meot qui vient du latin : trans, qu' cha veut dire à travers, et dare, qu' cha veut dire donner. Ch'est ce qu'on r'cheot d' nos parints et qu'on ortransmet à nos infants à travers note époque, nos usaches, nos habitutes, no mote de vie.
Mi, cha m' fait toudis rigoler quand j'acoute les intervious après ein match ed' fotbal. Et j' rigole deux queops : d'abord quand j'intinds l' fotbaleu répeonte à les questieons souvint simplistes du journaleu. Après, quand j' lis les mêmes répeonses du fotbaleu dins l' gazette du lind'main. Ej' m'esplique par ein p'tit eximpe sous l' forme d'ein dialoque ( J : ch'est l' journaleu ; F : ch'est l' fotbaleu ; et in italique, ch'est m' commintaire à mi : J : Et adeon, commint qu' cha s'a passé aujord'hui ? (comme si que l' journaleu i n'areot pos vu l' match)
|
18 juillet 2018 par Catoupi