Humeur
Vous s' demindez pétête d' quoi ç' que j' vas vous parler ichi. Bé tout simplemint d' l'Orvue du Cabaret Walleon qui va béteôt avoir à l' Maseon de l' Culture à Tournai. Cha va s' passer les deux wékennes autour du Toussaint : les saim'dis 26 octope et 2 novimpe à 20h, les diminches 27 octope et 3 novimpe à 16h, et l' verdi 1er novimpe (l' jour du Toussaint) à 16h aussi.
Banjour savez mes gins, mais queu bieau été qu'on a ichi eu ! Je m' faiseos ein plaisi d'aller l' diminche au matin faire les puches. L'eaute jour, j'sus cait su eine affaire in or, i-aveot là ein p'tit piano élestrique, d'eine beonne marque savez pasque mi, i feaut pos m' rouler. I-éteot acor sous garantie, facture à l'appui et l' mote d'imploi i-éteot bin dins l' boîte. Allez hop, pou l' prix d'mandé, imbarqué à l' maseon. Meon dieu, l' porte à peine ouvert, l' concert i qu'mincheot d'jà ; l'nez de m' Gertrute i friseot d' pus belle : « Quoisque ch'est d' cha acor ? Et dùsque te vas aller l' mette ? I n'a pus d' plache. » Et patati et patata ... « T'as acor eine touche ma parole, te n' sais même pos in jeuer, éh loleo ! ». Là, j' deos dire qu'elle n'aveot pos tort...
Bonjour, savez, mes gins ! J' vas ichi vous raqueonter eine histoire qui m'a arrivé i-a ein momint in allant orconduire eine amisse à s'maseon. Comme elle ne trouveot pus ses clés, et qu'i f'seot noir, j' li ai dit : « N' cache pus, on n'a foque à téléphoner à t'n heomme, i venn'ra ouvère l' porte et on ravis'ra d'main après les clés. « Bé ahais, qu'elle me répeond, li quand i dort, i dort... ». N'acoutant que m'n' idée, j' l'appelle... Rien, aussi bin su l' GSM que su l' fixe. Et pourtant, in étant à l' cour, on intindeot bin l' sonn'rie ! Quoi ç' qu'on va faire ? I li vient eine idée « On va ruer des cailloux su l' ferniête »... Vu qu'i dormeot à l'étache, on essayeot d' viser juste. Ahais, cha et rien ch'est l'même, surtout qu'on n'aveot pos bramint d'allure... Du queop, j' li d'minte si elle n'a pos eine étchelle. Sifait, su l' terrasse... eine escabelle de treos marches... J' meonte d'ssus et bin seûr j'éteos treop court. Veyant que j' n'y arriv'reos pos, elle me donne eine brouche et j' comminche à buquer su l' cassis... Z'imaginez ein p'tit queop l' tableau ?
L'éaute jour qu'i f'seot ein peo queaud, j'ai été après l'deîner m'pourméner dins l'cathédrale dùsqu'i f'seot ein peo pus fraique. On v'neot jusse d'l'ouvère et i n'aveot pos ein tchien. J'ai ainsin pouvu pourméner dins l'calme, busiant à tout ç'qu'i-aveot pouvu s'passer d'puis quinse chints ans. Des jours qu'i-aveot foule, comme au Moyen-Ache quand ch'éteot l'processieon ; des jours de faste quand par eximpe Charles-Quint i-a t'nu ein chapitre de l'Toiseon d'Or, eul seu qu'i-a eu ein jour dins les Pays-Bas espagnols sous l'règne de ç't' imp'reur ; des jours de désolatieon comme après l'Révolutieon françaisse ou les bombardemints d'quarante.
Cha y-est, nous ov'là cor ichi avé eine riche complicatieon linguistique. Ahais tout cha pasque deux Pandas géants i veont béteot ichi arriver dins l' pays et que pou ein queop bé ch'est l'Walleonie qui-a tiré l' greos leot. Ouais les flaminds i z'eont toudis l'air de dire qu'on est des orculés et bé ç' queop-chi ch'est pétête nous eautes les pus malins. Ces deux brafes biêtes qu'on rattind i devreotent béteot arriver ichi dins l' manifique parc d' Pairi Daisa. I parait qu' no prumier minisse pos treop fort in Flamind i-areot pouvu convainc' les Chineois (feaut croire qu'i-a pris des l'çeons dins les restos asiatiques d' Mons) d' nous mette ces deux espécimens rares in pinsieon pou eine paire d'ainnées ichi in Walleonie.
Et raviser les gins, ch'est alfeos ein grand moumint d'humanité. Qui qu'ch'est qu'i seont ? A queo qu'i busitent ? Queo ç'qui les attind eine feos rintrés à leu maseon ? Chaquein i rinfreume derrière s'visache s' pétit sécret, ein morcieau de s'vie qui passe.
Pou l'prix ch't'eot bin organisé savez, l'car i-éteot bin à l'heure, p'tit confort avec mini-bar et toilette, tout s'anneoncheot bin avé même eine pétite étape à Dinant pou boire éaute cosse que du café chimique. Les visites éteotent bin espliquées. Queu bazar, ch'est qu'i-a bin fallu du corache à ces gins pou s'batte à l'époque dins eine froidure parelle.
J'm'esplique. Vu qu'pindant les vacances, j'fais eine masse de photos, j'arrête pos d'les raviser les s'maines qui suiv'tent et ainsin, j'ai l'impressieon d'ête acore in vacances. Pasqu'avec les apparels photos d'asteur, i n'a pus d'raiseon de s'priver d'faire des photos. Dins l'temps, t'acateos ein film Kodak (ou Fudji ou d'eine eaute marque...), te d'veos queuzir 12-24 ou bin 36 photos, queuzir du noir et blanc ou bin de l'couleur et puis inrouler cha (alfeos, te rateos l'affaire et t'film, i-éteot foutu avant de qu'mincher) et puis, te busieos deux queops à l'plache d'eine avant d'faire eine photo vu que l'nombre d'photos du film i éteot limité.
10 juillet 2013 par Pichoulit Eh, bé, mes gins, v'là qu'les saiseons de sportifs i vienn'tent d' finir. Ainsin, on a bin eu de l' détoule avé l'calinderrier des « Sang et Or » qu'on a tout fait pou qu'i n'arrif'tent pos à s'sauver mais qu'i z'eont réussi tout d'même. Tout cha avé des jeones Tournaisiens incadrés pa des vieux serviteurs du club, capieau bas. Ch'est bin dammache qu'i n'a pus là grand meonte pou aller les supporter mais beon, l'temps des derbys, i-est bin oute...
3 juillet 2013 par Codolette Bé vingt neoms, on nous in fout eine avé ç' Peont des Treos. Déjà qu'i n'est pus l'original, vu qu'i-a été orfait après la guerre. Adeon, l' largeur des treos elle n'a pus d'importance. A l'heure de l' crisse, avé tous les liards qu'i feaut écolomiser, mi j'ai eine idée : puteôt que d' déplacher l' Peont pierre par pierre n'importe d'ù, puteôt que d' mette ein greos treo au mitan, et deonc de d'voir canger les treos arches, et deonc chipoter à les deux piliers, mi j' trouèfe qu'i s'reot pus facile, et seûr'mint moins tcher, d'inl'ver tout simplemint ein des deux piliers, sans toucher à l'éaute.
26 juin 2013 par Pichoulit Comme j' l'aveos promis, ov'là l' résultat d' mes révisieons d' vocabulaire. Avé tous les meots qu'j'ai trovés, bé, j'ai fait eine rédactieon, ch'éteot pus simpe, l'ov'là. « In arrivant près de l'cinse, j'ai vu là eine paire de ruches dusque des mouques à miel i f'seotent eine sorte d'danse d'saint gui. Comme i faiseot eine caleur de biête, i-aveot là des biêtes d'orache autant qu'on in veut et l'leong du mur d'ein vieux poulailler, des pourcheaux d'mur i pouméneotent, i z'aveotent l'air d' faire beon ménache avec eine paire de caracoles et d' biêtes à bon dieu.
19 juin 2013 par Pichoulit Comme les examins i s'approch'tent, tertous i fait des révisieons. Bé, ch'est ichi l'occasieon de s'raminvrer d' no vocabulaire d'ichi. Comme i falleot queuzir ein thème pou qu'mincher, j'ai busié qu'on pourreot parler de l'cinse et à cha, i-a eine banse de raiseons. Ainsi, mi j'aime bin l'meot cinse ou acore l'meot cinsier pasque les ceusses qui feont l'malin in disant que l'patois, ch't'ein langache pou les gins qui n'sav'tent pos parler, i z'oblitent que l'patois i-a ses racheines dins l'français et j' vas même osoir vous dire qu'alfeos ch'est l'cantraire. Tins, l'ov'là. Ainsi ein cinsier ch'n'éteot rien d'eaute que l'ceu qui payeot l'cense, ein impôt de dins l'temps qu'on va pos in parler d'treop alfeos qu'cha donn'reot d'z'idées pou ein nouveiau impôt. Asteur, i feaut s'attinte à tout.
12 juin 2013 par Tignace Banjour mes gins, quand j' pinse à les z'éautes qui-eont écrit leu n'article avant mi et qui prêcheotent l'ortour du printemps pasqu'i n'd'aveotent soupé de ç' leong hiver ... Hé bin mes gins, j'peux vous asseurer qui-eont bin éte intindus savez, pasqu'asteur, dins m'gardin, cha s'révelle et à eine de ces vitesses ! J'vous dis qu'cha, à croire que l'nature cache à rattraper l'temps perdu. Em' tchien, ein Shih Tzu, quand i s'in alleot faire es' commissieon dins l'pelousse, je ne l'véyeos pus. Vu que j'ouèfe acor et in puque à l'capitale, hé bé quand j'rinte el' soir j'n'ai pos vraimint l'temps d'm'in occuper. Alors cha cait le wékenne tins ! Et comme on n'peut pos teonte du diminche, cha fait que m'saimedi i-est bin rimpli. Des journées ainsin, j'l'ai pus belle à m'n'ouvrache. Téonte, scarifier, tout ramasser et in route pou l'cortèche au parc à conténères.
29 mai 2013 par Pichoulit Comme j' l'aveos promis, ov'là l' résultat d' mes révisieons d' vocabulaire. Avé tous les meots qu'j'ai trovés, bé, j'ai fait eine rédactieon, ch'éteot pus simpe, l'ov'là. « In arrivant près de l'cinse, j'ai vu là eine paire de ruches dusque des mouques à miel i f'seotent eine sorte d'danse d'saint gui. Comme i faiseot eine caleur de biête, i-aveot là des biêtes d'orache autant qu'on in veut et l'leong du mur d'ein vieux poulailler, des pourcheaux d'mur i pouméneotent, i z'aveotent l'air d' faire beon ménache avec eine paire de caracoles et d' biêtes à bon dieu. L' cinsier i v'neot d'rintrer des champs dusqu'i-aveot été ahoûter ein champ qui-aveot binoqué eine paire de meos avant. I-éteot dins eine vielle cariole qu'i tireot pa d'rière ein brabant qui dateot du temps d'Mathusalem. Pindant ç' temps-là, l'cinsière qui v'neot d'finir s'buache, elle se dém'neot avé l'farine autour d'ein bultieau avant d's'occuper du baburre dins eine pièche rimplie d'arnitoiles (ch'éteot avant les contrôles de l'AFSCA).
22 mai 2013 par Pichoulit Comme les examins i s'approch'tent, tertous i fait des révisieons. Bé, ch'est ichi l'occasieon de s'raminvrer d' no vocabulaire d'ichi. Comme i falleot queuzir ein thème pou qu'mincher, j'ai busié qu'on pourreot parler de l'cinse et à cha, i-a eine banse de raiseons. Ainsi, mi j'aime bin l'meot cinse ou acore l'meot cinsier pasque les ceusses qui feont l'malin in disant que l'patois, ch't'ein langache pou les gins qui n'sav'tent pos parler, i z'oblitent que l'patois i-a ses racheines dins l'français et j' vas même osoir vous dire qu'alfeos ch'est l'cantraire. Tins, l'ov'là. Ainsi ein cinsier ch'n'éteot rien d'eaute que l'ceu qui payeot l'cense, ein impôt de dins l'temps qu'on va pos in parler d'treop alfeos qu'cha donn'reot d'z'idées pou ein nouveiau impôt. Asteur, i feaut s'attinte à tout.
15 mai 2013 par Tignace Banjour mes gins, quand j' pinse à les z'éautes qui-eont écrit leu n'article avant mi et qui prêcheotent l'ortour du printemps pasqu'i n'd'aveotent soupé de ç' leong hiver ... Hé bin mes gins, j'peux vous asseurer qui-eont bin éte intindus savez, pasqu'asteur, dins m'gardin, cha s'révelle et à eine de ces vitesses ! J'vous dis qu'cha, à croire que l'nature cache à rattraper l'temps perdu. Em' tchien, ein Shih Tzu, quand i s'in alleot faire es' commissieon dins l'pelousse, je ne l'véyeos pus. Vu que j'ouèfe acor et in puque à l'capitale, hé bé quand j'rinte el' soir j'n'ai pos vraimint l'temps d'm'in occuper. Alors cha cait le wékenne tins ! Et comme on n'peut pos teonte du diminche, cha fait que m'saimedi i-est bin rimpli. Des journées ainsin, j'l'ai pus belle à m'n'ouvrache. Téonte, scarifier, tout ramasser et in route pou l'cortèche au parc à conténères.
8 mai 2013 par Catoupi In v'là eine espressieon qu'on dit souvint. A tout momint, t'intinds cha. Ch'est toudis pour dire qu'on a loupé eine informatieon, qu'i s'a passé eine séquoi et qu'on n'a pos été prév'nu. Infin, soi-disant, bin seûr. Par eximpe, el' Cabaret i-a été canter à Saint-Piat l' sémaine passée, au profit de l' « Maseon du Pichou », qu' ch'est eine maseon d' quartier qui-accueule des gins in difficulté. Bé, i-a des gins qui n'eont pos v'nu, et après i veont dire : « t'areos bin fait de l' dire ! ».
1° mail 2013 par Pichoulit L'cang'mint on qu'minche à ête habitué. Ainsin, on vient d'canger d'heure, on a cangé les règles du jeu pou l'photovoltaïque et j'in passe. Ce qui n'canche pos ch'est qu'on continue à donner des liards à les banques qui seont in difficulté et qui n'dis'tent pos qui z'eont des liards d'côté dins leus succursales dins les paradis fiscaux et à cacher après les liards dins les poches des gins qui eusses i n'eont rien d'mindé et qui n'eont pos assez d'liards pou les mette dins ces paradis fiscaux. Infin soite, on n'a quand même rien à dire... Mais i-a des cang'mints qui n'coûtent rien adeon pourquoi s'in priver.
24 avril 2013 par Catoire Cha s' passe à Saint-Piat, i a d'jà ein saquant d'ainnées. Dins ceul incien quartier, i-a des gins in difficulté. I n'eont pus d'ouvrache ou i n' seont pos bin portants. Alfeos i z'eont bin du mau à élever leu p'tite famile. Ah bin seur, i a des gins à la Ville qui seont là pou les assister et qui feont bin leu n'ouvrache. Mais i a des démarches à faire et ch'est pos toudis facile d'aller espliquer ses problèmes à des gins qu'on n' conneot pos.
17 avril 2013 par Catoupii Ch'est vrai, i feaut l'orconnaite : ces gins du Cabaret Walleon i n'arrêt'tent pos tout du leong d' l'ainnée. Au meos d' janvier, treos séances de cabaret. Au meos d' féverrier, ein cabaret pou l' fondatieon Follereau (qui s'occupe des malates). Au meos d' mars, deux séances de cabaret, avec ein nouvieau programme. D'après ç' qu'on m'a dit, ein fort beon cabaret ! J'ai aussi intindu qu'i-aveot eu ein cang'mint d' date pou l' cabaret d' mars, et qu' du queop i-a des gins qui s'seont am'nés l' wékenne d'après. Ch'est bin dammache, et tous les gins du Cabaret i s'escuss'tent. Mais pourtant i z'aveottent fait d'z'efforts pou l'anneoncher : ch'aveot été dit aux cabarets d' janvier et féverrier, cha a été mis dins l' gazette, su l' site internet et dins l' radotache que vous avez li l' sémaine d'avant.
10 avril 2013 par L'Infant d'Tournai Bonjour, savez, mes gins. Je n’sais pos ç’que vous in pinsez, mais mi, i-a eine séquoi qu’je n’sais pos m’in ravoir. Cha fait d’jà des ainnées qu’les scieintifiques i nous parl’tent d’récauff’mint de l’planète in nous disant qu’si on n’fait pos attintieon à l’couche d’ozone, les glaches i veont fonte et l’nivieau des mers i va meonter. Et qu’on deot faire attintieon à l’pollutieon et surtout écolomiser l’ieau. Pasque sineon, i-a des régieons qui veont disparaîte. Au prumier abord, cha peut faire peur… Au deuxième rabord, comme i diseot l’éaute, te t’dis que l’Flandre elle est l’prumière à y passer et qu’on pourreot in ête débarrassé définitiv’mint. Ouais, mais cha ch’est d’l’humour, éné, pasqu’avec l’sanche qu’on a, la plupart des Flaminds i sareont nager…et i venn’reont s’installer par ichi ! Ah neon hein !
27 mars 2013 par Catoupi Cha ch'est fourbi qu'i-a eu du mardi dousse mars ! On l' saveot d'puis eine paire de jours qu'i-alleot neiger ein p'tit queop puque qu'à l'habitute, mais malgré cha, cha a été l' bazar dins tout l' pays. Commint ç' qu'i feont in Suisse, au Canada, in Suète, là dusque, quand i neiche, ch'est ein mète ou deux mètes de haut ? I z'arriftent à dégager les routes et les gins i veont à leu n'ouvrache et les infants à l'école comme si qu'i n'areot rien cait.
20 mars 2013 par Albert Tièle Banjour mes gins, J'ai vu l' semaine passée el Soyeu du bas de l' cinse, el' ceu qui-a écrit dans ein des derniers «Radotaches» qu'i-aveot été vir el' petit cabaret d' janvier treos feos, neon pasqu'i n'aveot pos compris l' prumière feos, mais pasque i-aimeot bin l'ambiance qu'i-aveot dins ceulles soirées. Et adeon, i m' diseot que ç' qui l'aveot frappé, ch'éteot qu'i n'aveot pos beauqueop d' politiciens. Su les treos séances, i-a eu eine paire de conseillers communaux, mais comme éch'vins, i-aveot juste Polo, el jour que notélé i-éteot v'nu pour filmer. Ouais, mais cha que j' li ai dit, cha s'comprind : avant les électieons du meos d'octope, i falleot s' moutrer, mais asteur qu'i z'eont l' plache.... ou alors i ouèftent dur... et même el soir. «Cha ch'est pasque t'as eine mauvaise lanque» qu'i m'a répondu. Mi, j' veux bin ! mais....
13 mars 2013 par Catoupi Infin ! Les timpératures i z'ormeont'tent ! On est in plein dins l' meos d' mars, les jours i ralleonch'tent, adeon quoi ç' qu'on pourreot bin faire eç' wékenne ? D'abord si i deonne belle, i-a d' l'ouvrache au gardin. I n' feaut pos oblier qu'à l' Saint-Joseph, i feaut planter les penn'tières. Et l' Saint-Joseph, ch'est l' dix-nouèf mars, adeon, ch'est l' momint ! Ceulle date je n' sareos pos l'oblier, vu qu' ch'est l'anniversaire de mariache de m' papa et de m'manman. Chinquante-nouèf ans ç' t'ainnée, vous s'rindez queompte ? Beon anniversaire !
6 mars 2013 par Catoupi Vous l' savez seûr'mint d'jà : ch'est l' thème du carnaval de Tournai : « Silince on tourne ». Hasard qu'i-a bramint d' gins qui veont s' déguiser in acteur, comme Charlot, Groucho Marx, Gégé Depardieu ou bin Marylin Monroe avé s' rope blanque par eximpe. J'espère pour elle qu'i f'ra quéaud ! I d'a qui veont s' déguiser in personnaches ormarquapes comme Hulk, Superman, Spiderman ou Indiana Jones. I-a cor pus simple : in caméraman, ou pus compliqué : in Oscar... Mais j' pinse qu'i d'a qui veont cacher pus leon qu' cha. On peut imaginer toutes sortes d'objets qui tourn'tent : ein quarante-chinq tours, ein moulin à vint (tant pire si i-a ein Don Quichotte dins l' tas), ou, pus moderne et d'actualité : eine éolienne.
27 février 2013 par L'Infant d'Tournai Bonjour savez mes gins. Vous s'rez pétête surpris du titre de m'n artique mais ch't'ein sujet d'actualité. Ainsin, tertous i sait bin qu' Polo, no nouvieau Bourguémette, i-a fait l' tour de l' ville et des boul'vards pour vir dusque les ampoules i n'alleottent pos. Dammache qu'i n'a pos pinsé d'aller jusqu'au state Luc Varenne l' dousse de janvier quand ç'que l'éclairache i s'a copé. Mais tout cha i m'amène à ceulle histoire que j' vas ichi vous raqueonter. Cha s'a passé à l' rue Bonn'maiseon, dins l' Vert Bocache. Dins l' saleon, Juliette et Polo i ravis'tent l' télévisieon. Comme tous les jeudis au soir, ch't'ein policier et ç' jour-là, ch'teot Julie Lescaut.
20 février 2013 par Arnitoile V'là l'Peont à Peont qui-est freumé asteur ! On qu'mincheot à peine à circuler conv'nablemint dins ceulle ville après tous les travéaux qu'on aveot connus dins tous les coins d'puis pus d'treos ans, et que ch'n'est pos fini ; dins l'Bas-Quarthier et les rues voisines, eulle rue Perdue, à l'hariqueot de l'Dorcas, l'av'nue des Etats-Unis, l'rue d'Paris, l'rue de l'Tiête d'Or, l'rue de l'Wallonie, eul Dôme, l'rue des Puits-L'Ieau, l'rue Madame, l'rue des Carliers, tous les rues du quarthier Saint-Brice, eulle plache des Acacias et l'rue de L'Lanterne, infin i faudreot presque chiter toutes les rues du chintre-ville... Asteur eul peont i-est serré pour eine paire de s'maines, qu'i ditent ; mi j'pinse putêot pour eine paire de meos. On voirra ! Tout cha à cause du gel, que les pavés i s'seont déglingués. Ahaite ! I m'feont rire, à l'Ville ! Comme si cha n'deveot pos arriver ein d'ces quate.
13 février 2013 par Du beos d'chuque Pétite anneonche : Ch'est l' vingt quate de féverrier qu' cha va s' passer ichi à Tournai dins no belle Halle aux draps. Bé l'ov'là mes gins, el' Royale Compagnie du Cabaret Wallon Tournaisien, elle vous invite à ein cabaret au profit de « L' Fondatieon Raoul Follereau », ceulle qui s'occupe des malhureux qu'i-eont ramassé eine maladie qu'on appelle la lèpre. Et.... comme ch'est ein cabaret philanthropique et bin là pou ein queop cha n' s'ra pos obligatoire d'avoir eine barpe ou eine moustache et d' porter des marreonnes pou ête dins l' salle à acouter les cancheonnes des amisses de l' Compagnie du Cabaret Wallon.
6 février 2013 par El’ Soyeu du bas de l’cinse Banjour, bansoir les gins! On dit souvint qu’ les absents i-eont alfeos tort. Mais ceull’ feos-chi, j’ pinse que ch’est acor pus vrai qu’ d’habitute. In effet, les cancheonniers ont présinté leu p’tit cabaret d’ janvier avec ein programm’ d’ein très beon cru. Diversité, rythme, i-aveot d’ tout. Mi, j’ai v’nu à les treos orprésintatieons, pasque j’ sus annochint et que j’ deos v’nir treos feos pour tout comprinte, mais ch’est vrai qu’in les acoutant eine paire de queops, i-a des nuances dins leus tesques, leus monoloques et leus poèmes qu’on n’a pos saisi du prumier queop. Infin, mi ch’est m’ cas. Et puis, pouvoir boire eine pinte avec eusses, quand el’ spectaque i-est fini, ch’est merveilleux. Si i pourreot’tent faire cha tous les queops, ej’ s’reos bénaisse et vous éautes avec.
30 janvier 2013 par Catoupi J' conneos eine paire d'infants qui n' tienn'tent d'jà pus in plache. Et ch'est normal, vu qu' ch'est bintéôt l' périote des carnavals, et pus particuïèr'mint les carnavals qui seont vraimint faits pour les infants. Ténez, par eximpe à Kain, ch'est l' 9 féverrier, comme toudis l' prumier saim'di du congé d' carnaval. Là, tout i-est fait pour que les infants i pass'tent eine fin belle après-deîner, et i n' doiftent même pos débourser ein euro ! I-a ein cortèche avé des fanfares et tout plein d' confettis ; i-a l' brûlache du Roi avé de l' belle animatieon (et même des cracheurs de feu) ; à l' fin du cortèche, i-a eine couque et du cacao ; après cha ein spectaque (ç't'ainnée, ch'est deux canteus bin connus à Tournai, qui veont faire ein tout nouvieau spectaque).
23 janvier 2013 par Catoire Si vous êtes comme mi et qu' vous pourménez souvint in ville, vous arez seur'mint d'jà rinqueontré ceulle nouvelle espèce d' piéteons. I seont jeones et i z'eont eine pétite séquoi infonchée dins leus deux orelles. Comme eine sorte d'hariqueot noir avec ein fil qui déquind dins leu poche. J'aveos pinsé d'mander à mes gins quoi ç' qu'i z'aveot'tent là comme harnach'mint, mais à vir leu tiète, je m'ai dit qu' cha s'reot pus simpe d'aller d'mander quoi à Jules, l'pétit garcheon de l' sœur de m' viseine. J'ai été tout estamperné quand Jules i-a sorti ein machin tout parel de s'poche in disant « Mais ch'est ein lecteur MP3 éné !. Tous les jeones i-z'eont cha asteur ! »
16 janvier 2013 par L’Infant d’Tournai Bonjour, savez, mes gins. J'vas ichi vous in raqueonter eine qu'i-a arrivé à n'ein douanier, i-a d'cha n'paires d'ans. Ch'teot du temps qu'i's contrôleottent acore l'immatriculatieon des carrettes. I z'éteottent partis à deux dins leu vielle 4L du côté d'Timpleufe. Et v'là qu'Gilbert, l'pus hard des deux, i dit à s'collèque Raymond : « T'as vu cha ichi tous les fraudeux, cha d'meure in Belgique mais cha roule acor avec des plaques françaisses ! » Ch'est vrai qu'à l'époque, du temps qu'i-aveot acore eine douane...et des douaniers, falleot faire attintieon à cha ! Donc, v'là no Gilbert qui s'décite à aller contreôler tout cha, malgré qu'Raymond, assoupi dins l'carrette, i li aveot dit d'laicher caire. « Quoique ch'est qu'te raqueontes, qu'i dit Gilbert, mi j'sus douanier et j'lutte conte l'fraute ! Neon mais ! »
9 janvier 2013 par Pichoulit Eh, bé mes gins, j'sus fin bénaisse qu'les fiêtes i seont passées. Pasqu'i feaut vous dire que m'feimme et mi on s'in va pos à les sports d'hiver causse qu'on a treos tchiens et deux cats à l'maseon et qu'mi j'ai des couleons au feond de m'gardin qu'i feaut bin soigner tous les jours vu qu'on n'peut pos toudis d'minder au visin de l'faire ; surtout qu'i l'fait d'jà quand on fait no p'tit séjour gastronomique in Alsace au meos d'mai et dins l'Périgord au meos d'sétimpe Du queop, on n'se prife pos d'ête d'tous les saints qu'on beot pou les fiêtes et cha qu'minche avé l'orvue du Cabaret du début novimpe qu'on va vir deux queops de l'rache qu'on rit plein s'panche à chaque queop.
26 décembre 2012 par Du beos d’chuque Et bé ch'est acore eine nouvelle ainnée qui va qu'mincher mes amisses. J'espère pou vous éautes que vous avez bin fiêté l' Noë et qu' vo sapin i-éteot garni d' fins bieaux cadeaux pou tertous. Ichi dins no beonne ville de Tournai, hé bin l' sapin i-a été tout r'mis à nué, pos comme d'sus l' Grand Plache à Bruxelles dusqu'i-eont été foute ein sapin avé des branques in forme d' cupes ortenus pa des tupes in fier. I parait qu' cha n'a pos été bin pris ou compris, diseons puteôt qu' cha n' plaiseot pos à tertous.
19 décembre 2012 par Tiête de lard Acor eine paire de queops à dormir et ch'est l' Noé. I-est grand temps d' busier au cadeau qu' vous allez offère. Ch'est alfeos bin difficile ed' trouver l' séquoi qui va plaire. Mi qui a quarante cheonq ans, des cadeaux, j' d'ai d'jà or'chus eine banse et j' peux vous dire qu'alfeos, ch'étéot des drôles. Quand ej' sus né, em' matante qui t'néot l' buvette au terrain d' fotbal ed l'Unieon à Tournai, i n'a rien trouvé d' mieux d' m'offère eine barboteusse rouche et vert. Même si m' mamère i n' trouveot pos cha fort bieau, elle étéot obligée d' me l' mette quand matante i v'neot dire bonjour. Tous mes frères et sœurs i riottent ed' mi. A m' communieon, em' viseine, eine flaminque, i m'a payé ein crucifix. Ein machin qu'on areot pos su l' raviser sans braire.
12 décembre 2012 par Pichloulit Avé les fiêtes qui arrif'tent, l' temps des cadeaux i-est arrivé li avec. Par les temps qui queurtent ch'est seûr qu'i feaut bin queuzir pou n' pos ruer les liards pau cassis et in même temps essayer d' faire plaisi à les ceusses qu'on aime bin. I-a autant d' plaisi à deonner qu'à orchevoir mais alfeos ch'est ein vrai casse-tiête pou trouver l' cadeau rare, pos trop tchier et qui va surprinte. Et j'in conneos qui grattent à leu tiête pour y arriver. Mais ç't'ainnée, cha n' va pos ête trop compliqué. Pus questieon d' faire l' queue dins les magasins, de s' creuser l' tiête pou trouver eine idée ou acore d' queurir à l' dernière minute pour avoir eine séquoi à mette pa-d'zou l' sapin, pus questieon d' feuill'ter les kileos d' cataloques qui s'ameonchell'tent.
5 décembre 2012 par Pichloulit L’ sémaine passée, je m’sus dém’né su les banques et tous les financiers. Décidémint, j’ sus pos d’ beonne humeur pou l’ moumint ou bin, j’ comprinds d’ moins in moins l’ meonte dusqu’on vit. «T’ vieusis mal» qu’elle m’a dit m’ feimme. Pétète. Ch’est seur que j’ comminche tout duch’mint à m’ faire du souci pou l’av’nir d’mes infants et mes p’tits infants et ch’est cha qui m’ carmousse d’ pus in puque.
28 novembre 2012 par Pichloulit Ch'est seur qu'in lisant m' pétite bafoule, i d'a qui veont dire, m'n'heomme, i-est biête, i n' comprind rien. Pétète, mais ç' qui m' console ch'est que j' sus seurmint pos tout seu dins l' cas. J' vas ichi parler d'eine affaire qui m' carmousse d'puis ein moumint de l' rache que j' n'arrife pos à y voir clair. Ainsin, je n' comprinds pos pourquoi i feaut toudis r'mette des liards pou Dexia alors qu'on cache après des liards pou boucler no budget. Et par hasard, les liards pou Dexia on les trouèfe tout d'suite mais pou l' budget, i n'a pos moyen d' trouver l' beonne solutieon et l' seule qu'on trouèfe, bé, ch'est seul'mint d' vénir dins no poche. Infin, i n' feaut pos rêver, pou Dexia avec, on vient dins no poche mais cha passe inaperçu pasqu'on direot qu'on ne l' veot pos. Diseons qu' ch'est comme l'orfroidiss'mint, on ne l' veot pos mais on l' sint.
|
23 octobre 2013 par Catoupi