Humeur
20 février 2013 par Arnitoile V'là l'Peont à Peont qui-est freumé asteur ! On qu'mincheot à peine à circuler conv'nablemint dins ceulle ville après tous les travéaux qu'on aveot connus dins tous les coins d'puis pus d'treos ans, et que ch'n'est pos fini ; dins l'Bas-Quarthier et les rues voisines, eulle rue Perdue, à l'hariqueot de l'Dorcas, l'av'nue des Etats-Unis, l'rue d'Paris, l'rue de l'Tiête d'Or, l'rue de l'Wallonie, eul Dôme, l'rue des Puits-L'Ieau, l'rue Madame, l'rue des Carliers, tous les rues du quarthier Saint-Brice, eulle plache des Acacias et l'rue de L'Lanterne, infin i faudreot presque chiter toutes les rues du chintre-ville... Asteur eul peont i-est serré pour eine paire de s'maines, qu'i ditent ; mi j'pinse putêot pour eine paire de meos. On voirra ! Tout cha à cause du gel, que les pavés i s'seont déglingués. Ahaite ! I m'feont rire, à l'Ville ! Comme si cha n'deveot pos arriver ein d'ces quate.
13 février 2013 par Du beos d'chuque Pétite anneonche : Ch'est l' vingt quate de féverrier qu' cha va s' passer ichi à Tournai dins no belle Halle aux draps. Bé l'ov'là mes gins, el' Royale Compagnie du Cabaret Wallon Tournaisien, elle vous invite à ein cabaret au profit de « L' Fondatieon Raoul Follereau », ceulle qui s'occupe des malhureux qu'i-eont ramassé eine maladie qu'on appelle la lèpre. Et.... comme ch'est ein cabaret philanthropique et bin là pou ein queop cha n' s'ra pos obligatoire d'avoir eine barpe ou eine moustache et d' porter des marreonnes pou ête dins l' salle à acouter les cancheonnes des amisses de l' Compagnie du Cabaret Wallon.
6 février 2013 par El’ Soyeu du bas de l’cinse Banjour, bansoir les gins! On dit souvint qu’ les absents i-eont alfeos tort. Mais ceull’ feos-chi, j’ pinse que ch’est acor pus vrai qu’ d’habitute. In effet, les cancheonniers ont présinté leu p’tit cabaret d’ janvier avec ein programm’ d’ein très beon cru. Diversité, rythme, i-aveot d’ tout. Mi, j’ai v’nu à les treos orprésintatieons, pasque j’ sus annochint et que j’ deos v’nir treos feos pour tout comprinte, mais ch’est vrai qu’in les acoutant eine paire de queops, i-a des nuances dins leus tesques, leus monoloques et leus poèmes qu’on n’a pos saisi du prumier queop. Infin, mi ch’est m’ cas. Et puis, pouvoir boire eine pinte avec eusses, quand el’ spectaque i-est fini, ch’est merveilleux. Si i pourreot’tent faire cha tous les queops, ej’ s’reos bénaisse et vous éautes avec.
30 janvier 2013 par Catoupi J' conneos eine paire d'infants qui n' tienn'tent d'jà pus in plache. Et ch'est normal, vu qu' ch'est bintéôt l' périote des carnavals, et pus particuïèr'mint les carnavals qui seont vraimint faits pour les infants. Ténez, par eximpe à Kain, ch'est l' 9 féverrier, comme toudis l' prumier saim'di du congé d' carnaval. Là, tout i-est fait pour que les infants i pass'tent eine fin belle après-deîner, et i n' doiftent même pos débourser ein euro ! I-a ein cortèche avé des fanfares et tout plein d' confettis ; i-a l' brûlache du Roi avé de l' belle animatieon (et même des cracheurs de feu) ; à l' fin du cortèche, i-a eine couque et du cacao ; après cha ein spectaque (ç't'ainnée, ch'est deux canteus bin connus à Tournai, qui veont faire ein tout nouvieau spectaque).
23 janvier 2013 par Catoire Si vous êtes comme mi et qu' vous pourménez souvint in ville, vous arez seur'mint d'jà rinqueontré ceulle nouvelle espèce d' piéteons. I seont jeones et i z'eont eine pétite séquoi infonchée dins leus deux orelles. Comme eine sorte d'hariqueot noir avec ein fil qui déquind dins leu poche. J'aveos pinsé d'mander à mes gins quoi ç' qu'i z'aveot'tent là comme harnach'mint, mais à vir leu tiète, je m'ai dit qu' cha s'reot pus simpe d'aller d'mander quoi à Jules, l'pétit garcheon de l' sœur de m' viseine. J'ai été tout estamperné quand Jules i-a sorti ein machin tout parel de s'poche in disant « Mais ch'est ein lecteur MP3 éné !. Tous les jeones i-z'eont cha asteur ! »
16 janvier 2013 par L’Infant d’Tournai Bonjour, savez, mes gins. J'vas ichi vous in raqueonter eine qu'i-a arrivé à n'ein douanier, i-a d'cha n'paires d'ans. Ch'teot du temps qu'i's contrôleottent acore l'immatriculatieon des carrettes. I z'éteottent partis à deux dins leu vielle 4L du côté d'Timpleufe. Et v'là qu'Gilbert, l'pus hard des deux, i dit à s'collèque Raymond : « T'as vu cha ichi tous les fraudeux, cha d'meure in Belgique mais cha roule acor avec des plaques françaisses ! » Ch'est vrai qu'à l'époque, du temps qu'i-aveot acore eine douane...et des douaniers, falleot faire attintieon à cha ! Donc, v'là no Gilbert qui s'décite à aller contreôler tout cha, malgré qu'Raymond, assoupi dins l'carrette, i li aveot dit d'laicher caire. « Quoique ch'est qu'te raqueontes, qu'i dit Gilbert, mi j'sus douanier et j'lutte conte l'fraute ! Neon mais ! »
9 janvier 2013 par Pichoulit Eh, bé mes gins, j'sus fin bénaisse qu'les fiêtes i seont passées. Pasqu'i feaut vous dire que m'feimme et mi on s'in va pos à les sports d'hiver causse qu'on a treos tchiens et deux cats à l'maseon et qu'mi j'ai des couleons au feond de m'gardin qu'i feaut bin soigner tous les jours vu qu'on n'peut pos toudis d'minder au visin de l'faire ; surtout qu'i l'fait d'jà quand on fait no p'tit séjour gastronomique in Alsace au meos d'mai et dins l'Périgord au meos d'sétimpe Du queop, on n'se prife pos d'ête d'tous les saints qu'on beot pou les fiêtes et cha qu'minche avé l'orvue du Cabaret du début novimpe qu'on va vir deux queops de l'rache qu'on rit plein s'panche à chaque queop.
26 décembre 2012 par Du beos d’chuque Et bé ch'est acore eine nouvelle ainnée qui va qu'mincher mes amisses. J'espère pou vous éautes que vous avez bin fiêté l' Noë et qu' vo sapin i-éteot garni d' fins bieaux cadeaux pou tertous. Ichi dins no beonne ville de Tournai, hé bin l' sapin i-a été tout r'mis à nué, pos comme d'sus l' Grand Plache à Bruxelles dusqu'i-eont été foute ein sapin avé des branques in forme d' cupes ortenus pa des tupes in fier. I parait qu' cha n'a pos été bin pris ou compris, diseons puteôt qu' cha n' plaiseot pos à tertous.
19 décembre 2012 par Tiête de lard Acor eine paire de queops à dormir et ch'est l' Noé. I-est grand temps d' busier au cadeau qu' vous allez offère. Ch'est alfeos bin difficile ed' trouver l' séquoi qui va plaire. Mi qui a quarante cheonq ans, des cadeaux, j' d'ai d'jà or'chus eine banse et j' peux vous dire qu'alfeos, ch'étéot des drôles. Quand ej' sus né, em' matante qui t'néot l' buvette au terrain d' fotbal ed l'Unieon à Tournai, i n'a rien trouvé d' mieux d' m'offère eine barboteusse rouche et vert. Même si m' mamère i n' trouveot pos cha fort bieau, elle étéot obligée d' me l' mette quand matante i v'neot dire bonjour. Tous mes frères et sœurs i riottent ed' mi. A m' communieon, em' viseine, eine flaminque, i m'a payé ein crucifix. Ein machin qu'on areot pos su l' raviser sans braire.
12 décembre 2012 par Pichloulit Avé les fiêtes qui arrif'tent, l' temps des cadeaux i-est arrivé li avec. Par les temps qui queurtent ch'est seûr qu'i feaut bin queuzir pou n' pos ruer les liards pau cassis et in même temps essayer d' faire plaisi à les ceusses qu'on aime bin. I-a autant d' plaisi à deonner qu'à orchevoir mais alfeos ch'est ein vrai casse-tiête pou trouver l' cadeau rare, pos trop tchier et qui va surprinte. Et j'in conneos qui grattent à leu tiête pour y arriver. Mais ç't'ainnée, cha n' va pos ête trop compliqué. Pus questieon d' faire l' queue dins les magasins, de s' creuser l' tiête pou trouver eine idée ou acore d' queurir à l' dernière minute pour avoir eine séquoi à mette pa-d'zou l' sapin, pus questieon d' feuill'ter les kileos d' cataloques qui s'ameonchell'tent.
5 décembre 2012 par Pichloulit L’ sémaine passée, je m’sus dém’né su les banques et tous les financiers. Décidémint, j’ sus pos d’ beonne humeur pou l’ moumint ou bin, j’ comprinds d’ moins in moins l’ meonte dusqu’on vit. «T’ vieusis mal» qu’elle m’a dit m’ feimme. Pétète. Ch’est seur que j’ comminche tout duch’mint à m’ faire du souci pou l’av’nir d’mes infants et mes p’tits infants et ch’est cha qui m’ carmousse d’ pus in puque.
28 novembre 2012 par Pichloulit Ch'est seur qu'in lisant m' pétite bafoule, i d'a qui veont dire, m'n'heomme, i-est biête, i n' comprind rien. Pétète, mais ç' qui m' console ch'est que j' sus seurmint pos tout seu dins l' cas. J' vas ichi parler d'eine affaire qui m' carmousse d'puis ein moumint de l' rache que j' n'arrife pos à y voir clair. Ainsin, je n' comprinds pos pourquoi i feaut toudis r'mette des liards pou Dexia alors qu'on cache après des liards pou boucler no budget. Et par hasard, les liards pou Dexia on les trouèfe tout d'suite mais pou l' budget, i n'a pos moyen d' trouver l' beonne solutieon et l' seule qu'on trouèfe, bé, ch'est seul'mint d' vénir dins no poche. Infin, i n' feaut pos rêver, pou Dexia avec, on vient dins no poche mais cha passe inaperçu pasqu'on direot qu'on ne l' veot pos. Diseons qu' ch'est comme l'orfroidiss'mint, on ne l' veot pos mais on l' sint.
21 novembre 2012 par Catoupi Verdi passé, j'aveos pris congé, et comme j'aveos l' temps, j'ai eu invie d'aller m' pourméner dins les magasins. J' pinseos aussi d' faire des beonnes affaires : j'aveos r'chu de l' sémaine des beons d' réductieon au magasin Queulroyt, avec in puque ed' cha treos pourchints su l' total de m' ticket d' caisse. A croire que tout l' ville elle s'aveot là deonné rindez-vous, pasqu'i n'aveot pus d' plache au parkinne. Adeon, comme j'aveos aussi ein beon d' réductieon chez Awéwé, j' m'ai dit qu' j'ireos là-vas d'abord; i m' falleot acater pou vingt euros et on m' mettreot chint points d' puque su m' carte Benhaize. Cha fait qu' j'ai acaté du terreau, eine paire de peots d' fleurs (j'aveos oblié que m' feimme d'aveot acaté l' sémaine d'avant), du produit pou tuer l' cruéau qu'i-a dins l' piéchinte pa-d'vant m' maseon, et eine carte pou l'anniversaire de m' pétite filleule (ahais, i-a même cha chez Awéwé !). Total : j' d'ai eu pou passé trint'-cheonq euros, et j'ai bin mérité mes points d' fidélité !
14 novembre 2012 par Pichoulit et Catoupi
Quater-vingt-sièt ans, et trint-chinq ans d’ cabaret : ch’est d’ANDRE WILBAUX qu’on parle ichi. I-aveot dit qu’i f’reot l’ millième et qu’après cha, i-arrêt’reot. Feaut dire aussi qu’i-éteot d’jà là avant l’ cheonq-chintième ! André i-a connu des fondateurs du Cabaret : quand i-éteot tout jeone, i-a même été chez Walter Ravez ! L’ jour qu’André i-est né, l’ Cabaret i fiêteot tout jusse ses dix-huit ans ! Au Cabaret, i-a connu quarante et ein cancheonniers différints !
7 novembre 2012 par Codolette Ahais, d'habitute, j' déméprisse toudis et j' cache misère à tertous. Mais ç' queop-chi, ch'est pos possipe. Pasque j' vas vous parler du spectaque que j'ai été vir à l' maseon de l' culture l' sémaine passée: l' millième cabaret du Cabaret Walleon. Hureus'mint, m' visin (que je n' sais pos vir in peinture), i-aveot dreot à deux plaches gratuites, vu qu'iest mimbre et qu'i paie s' cotisatieon. Comme i-est tout seu, i m'a deonné s' deuxième plache.
31 octobre 2012
Rudy, ch'éteot ein grand cancheonnier, mais ch'éteot surtout pour nous z'éautes tertous ein amisse, ein vrai compagneon. I-aveot l'esprit « Cabaret », i viveot pou l' Cabaret. Au lundi perdu, i-a été chire ou seot pus d'ein queop, et à chaque feos i-éteot bénaisse. Et l' ceu qui-éteot seot ou chire avec li, i-éteot acor pus bénaisse ! Et queu talent ! I-ortourneot les meots dins tous les sens dins ses cancheons et dins ses initiatieons au patois ou bin ses horoscopes. Vous s' souv'nez seûr'mint d' ses cancheons « L' bob », « Cha va valser », « L'invers du décor », et l' liste elle est bin leonque. I saveot aussi faire des cancheons d'eine grante sinsibilité, in moutrant eine grante culture : « No patois », à l' gloire de no lanque, « Belle », qui f'seot l'éloche de no ville, et ceulle manifique cancheon pou s' pétit Louis... Et dins l' passetoutoute, on a eu bin des russes avé les meots croisés d' GDO Hédéba... Rintré au Cabaret in 95, i nous laiche ein trésor de chefs-d'œuvre, à nous et à tous ceux qui z'aim'tent Tournai, no patois et l' Cabaret. Talent, sympathie, gintillesse, générosité, amitié, et aussi amour du public qui li rindeot bin : Ch'éteot tout cha, Rudy. On wardera aussi l'imache de Rudy in plein fou-rire su l' ponteon, fou-rire communicatif... On diseot alfeos : i suffit qu'i rit et tout l' salle elle est pliée in quate... Au p'tit cabaret in mars, ch'éteot (on ne l' saveot pos cor) s' dernière apparitieon su l' ponteon. Comme i n'aveot pos fait l' cabaret d' janvier, i-a dit au public : « Vous m'avez manqué »... Cha diseot tout ! On n' sait pos si te l' sais, Rudy, mais cré vingt neoms, te vas nous manquer ! Tes amisses du Cabaret
24 octobre 2012 par Catoupi Vous s' rindez queompte ? D'puis la naissance du Cabaret Walleon, in mille nouéf chint sièt, i-a eu jusqu'asteur nouéf chint nonante-nouéf séances de cabaret ! Et ch'est pos bin compliqué d' conclure : l' prochain cabaret, cha s'ra l' millième. Cha s' fiête, vous n' pinsez pos ? Adeon, les cheonq séances qui z'arriftent veont s'app'ler « Ov'là l' millième ». Ch'est bin seûr à l' maseon de l' culture les 27 et 28 octope, et les 2, 3 et 4 novimpe. Ch'est à 20h les saim'dis et l' verdi, et à 16 heures les diminches. Quoi ç' qu'i va là s' passer ? Bé, je n' peux pos tout vous dire, i feaut warder ein p'tit queop l' surprisse, mais feaut s' douter qu'i-ara d' quoi rire, i-ara des morcieaux d'anthologie, des séquinces-souv'nir, et même el' participatieon d' notélé. Mais i-ara aussi d' l'actualité : bé tins, deux s'maines après l'z'électieons, on n' peut pos n' pos in parler bin seûr. A m' meote qu'i faudra aussi parler des travéaux dins l' ville et du passache du tour de France à Tournai, intre autres. Cha fait qu'on s'ra ceulle feos-chi plus dins le style « cabaret » qu' dins le style « revue ». L'ov'là, ein tout p'tit avant-goût de ç' qui vous attind dins eine paire de jours. Adeon, bloquez tout d' suite eine date dins vo n'aginda. Si vous n'avez pos cor réservé vos plaches, arrivez eine heurette avant l' début du spectaque pour ête seûr que ch'est pos complet. I-a aussi moyen d' réserver par téléphone au 069/59 01 39 l' soir pindant l' sémaine. Viv'mint l' millième ! Catoupi
17 octobre 2012 par El soyeu du bas de l' cinse Ch’est Germain, préneom d’emprunt, agint d’ police (adeon on peut l’ croire) qui m’a raqueonté ceulle histoire. I-a ein’ paire de s’maines, alors qu’i fait s’ tour dins l’ chité du Maroc, i rinqueontre el vielle Irma, eine habitant’ du coin qui s’ pourmène avé deux greos sas-poubelles. Tout d’ein queop, ein des deux sas i craque et ein’ masse ed’ billets d’ cheonq euros atterriss’tent su l’ trottoir. Bin vite elle les ormet d’dins. Germain li deonne ein queop d’ main pou les ramasser, mais i trouèfe cha ein p’tit queop drôle ed’ vir tous ces liards dins ein sac et i d’minde à Irma si ch’est bin à elle, si ch’est pos des liards qu’elle a volé.
10 octobre 2012 par Catoupi No planète, tertous i l’ sait bin, elle se réqueauffe.I feaut faire eine séquoi pou limiter l’z’émissieons d’CO2, diminuer l’gaspillache, faire des produits orcyclapes... sineon, on queurt à l’ catastrophe et nos p’tits-infants i d’vreont respirer d’ l’air in boutelle, et s’ mucher pa-d’zous ein parasol tou du leong d’ l’ainnée. El’ film d’ Al Gore, ia eine paire d’ainnées, i-a bin fait comprinte à tertous que l’ situatieon elle est grafe. I-a des documintaires, d’z’artiques d’ journal, et même des cancheons, qui dis’tent aussi qu’i-est grand temps d’ faire attintieon.
3 octobre 2012 par Catoupi Bé on n' d'attrappe eine avé tous l'z'affiches électorales. Te n' sais pus r'wettier eine séchu sans caire sur eine berdélée d' binettes d' tous les sortes. I-in a bramint qu'on n' fait même pus attintieon pasque ch'est d'z'affiches "normales", et qu'on les veot à tous les électieons, qu' cha soiche pou l' commune, l' province, l' communauté, l' fédéral, l' régieon ou l'Europe. Mais i d'a d'z'éautes qui-attir'tent l' regard : ch'est l' tout d' trouver eine séquoi d'espécial, comme ein slogan ou ein sourire obin eine grimace. Alfeos avec, i-a ein infant qui-a rajouté eine moustache, ou ein agozil qui-a écrit ein greos meot.
26 septembre 2012 par Catoire Bonjour mes gins. J' vous ai déjà raqueonté qu' no p'tite rue, elle éteot fort tranquille, pasqu'i n' se passeot pos grand queosse. Eh bé, cha ch'éteot dins l' temps pasque vous n'allez pos m' croire, ch'est seur'mint du jamais vu à Tournai, mais cha fait béteot eine ainnée qu' no rue est in travaux. Cha a comminché in novimpe d' l'ainnée passée. On a ouvert la mitan de l' rue. Et bin profeond savez !
19 septembre 2012 par Robot Cop Je n' sais pos si t'as d'jà vu in ville des tchiens qui porméneottent in laisse avec eine mus'lière. Te m' croiras si te veux, mais mi, eine feos onze heures du soir, j'ai l'impressieon que j' fais partie d' ces biêtes. Neon, pos que j' sus dangereux au point de m' mette eine muselière ni qu' j'ai d'z'invies d' foute l' camp pou ortrouver eine maîtresse, neon ch'est eaute cosse et j' vas t' l'espliquer. Tout i qu'minche à cosse de m' feimme (ch'est souvint ainsin que l'z'imbroulles elles qu'minch'tent). V'là qu'elle trouveot que j' ronfièle tell'mint que cha l'imbêteot au point qu'i-a des nuites qu'elle s'in va dormir dins l' champe d'amis (ch'est pou cha que j'n'invite pus d'amisses à dormir, m' feimme elle s'reot capape d'aller dormir avec eusses)
12 septembre 2012 par Catoupi Vous s' souv'nez pétête que l' titre de m'n'artique, ch'éteot l' sujet imposé du concours Prayez, que l' Cabaret i-organisse tous l'z'ans. Sujet qui-est imposé pou l'z'inciens lauréats, mais les ceusses qui n'eont jamais eu d' prumier prix, i pouveottent écrire su n'importe queu sujet. Eh bé, l'ov'là : diminche qui vient ( l' seize de sétimpe), on va ormette les prix à les lauréats du concours. Cha va s' passer comme d'habitute pindant l' fiête du Cabaret, à l'hôtel de ville, à partir de 10 heures au matin.
5 septembre 2012 par L’infant d' Tournai Bonjour, savez, mes gins. A lire l' titre, j'in conneos qui veont s' dire: «M'n heomme, i d'vient seot?». Ouais, j' deos avouer qu' cha peut paraîte bizarre et j'in conneos qui pourreottent pinser que ch't'à double sins, mais neon; j' vas simplemint vous raqueonter l'histoire d'eine soris dins l'Impasse. Ein bieau jour, ch'est souvint ainsin qu' les histoires elles comminch'tent, l'imployée qui ouèfe dins eine taverne, que s' préneom ch't'Armelle, elle s'apercheot qu'i-areot bin eine visiteusse qui vient s' régaler su l' queompte du patreon...
29 août 2012 par L’infant d' Tournai Bonjour, savez, mes gins. Seûr que vous vous souv'nez d' La Fontaine, Jean de s' préneom, qui-aveot écrit des si belles fables qu'on appreneot à l'école ? «L'corbieau et l'ornard », «L'cigale et l'fourmi», ... Ah bin, cha ch'est bin fini dins l'z'écoles d'asteur. On n' passe pus s' temps à lire et à apprinte tout comme on l' féseot dins l' temps. Mais cha n'impêche qu'i-a acor d'z'instituteurs et d'z'institutrices qui utilis'tent ceulle beonne méthote d'z'histoires dusqu'on peut r'tirer eine séquoi.
15 août 2012 par Arnitoile A l' mi-juin, j'ai été eine sémaine in vacances in Suède; ch't'ein pays dùsque les habitants, on les ortrouèfe essintiell'mint eul leong des côtes, tout au leong de l' Mer Baltique, pasqu'à l'intérieur des tierres, i n'a foc des lacs, des marécaches et des beos ou alors des beos, des marécaches et des lacs. Dins l' régieon dùsque j'éteos, in plein chintre de l' Suède, non loin de l' fronthière norvégienne, i-a foc quate habitants au kilomète carré. Cha veut dire qu'on faiseot des balates à pids pindant des heures inthières sans rincontrer eul moindre indigène. Tout au puque ein renne ou ein élan.
25 juillet 2012 par Pichoulit I-a alfeos des situatieons dusque te t' démintes commint qu'i feaut que t' les comprinds. J'pinse que ch'est l' général De Gaulle qui a dit ein jour qu' l'histoire elle ne se répéteot pos, mais qu'elle bégayeot... Bé, i n'croyeot pos si bin dire... I-a d' cha eine paire d'ainnées déjà, m' comarate Catoire i-a évoqué ç' brafe curé d' Saint Piat qui n'aveot rien d'mindé à personne et qu'on aveot invoyé à Templeufe au risque d' mette tout s' paroisse sins d'sus d'sous.
18 juillet 2012 par Pichoulit L’ nouvelle elle n’est pos toute fraique mais n’impêche, j’ suppose que vous avez vu comme mi qu’on alleot faire eine toute nouvelle gare à Mons. Tins, d’puis qu’i veont ête ville européenne de l’ culture (avec l’appui d’ Tournai, même qu’on n’est pos vraimint seur qu’i veont nous rinvoyer l’ascinseur...), on veot tout in grand. I parait que ch’t’ein architèque ornommé qui va s’in occuper. Mi, j’trouèfe que l’incienne gare de Mons elle n’éteot pos si mau qu’ cha mais infin, je n’ sus pos Montois, adeon, ch’est pos m’n’affaire (mais ch’est quand même ein p’tit peu mes liards...)
11 juillet 2012 par Catoire L'arrivée du Tour de France dins no ville, cha ara coûté cheonq euros à chaque Tournaisien. Mais attintieon, n' pinsez pos qu' ch'est des liards pierdus. Pasqu' asteur que l' Tour i-est d'allé, i paraît qu' tous les liards dépinsés i veont rapporter bramint à no beonne ville. A cosse, comme on dit à l'Régince du «coup de projecteur immense offert par le Tour». Ah, les hélicoptères i z'alleum'tent leus phares in plein jour asteur ? Si ch'est vrai adeon, pinsez à tous les gins in Europe qui-eont ravisé Tournai d'in haut, ch'est seur qu'après cha, i veont tertous aqueurir pour contimpler tous nos mervelles.
4 juillet 2012 par Arnitouile J’ai eine copine que j’ai connue pindant mes étutes et qui après s’ mariache elle a quitté Tournai, et cha i-a pus d’ trinte ans. L’ovlà qu’elle a décidé d’orvénir habiter no beonne ville in avril dernier. I-a pos quinze jours qu’elle éteot là, qu’in roulant à vélo au boulevard Léopold, berdaf, elle n’a pos vu ein treo, elle s’a rétalée tout du leong, elle s’a coichée et elle s’a cassé l’ clavicule. Binv’nue à Tournai, qu’on pourreot li lancher ! Elle qui-aveot vécu eine paire d’ainnées in Hollante, elle deot seûr’mint faire l’ comparaiseon in matière de pistes cyclapes. Faudra ein jour que j’ li présinte Mossieu Leclercq ou Mossieu Michez.
27 juin 2012 par L’infant d' Tournai Bonjour, savez, mes gins. Je n’ sais pos si vous suivez l’actualité mais j’ voudreos vous parler d’eine séquoi qui touche les Tournaisiens, infin les ceusses qui s’intéress’tent au fotbal. Vous l’ savez pétête, l’ Fotbal Clup Tournai i-est dins l’ tourminte! Pour eine feos, ch’ n’est pos pour eine affaire de liards mais pour eine séquoi qui n’est pos clair dins l’ règlemint de l’ Fédératieon. Ainsin, les dirigeants i z’aveottent transféré ein jeueu, Lacam que ch’est s’ neom, qui v’neot d’ Renaix et tout i simbleot in orte.
20 juin 2012 par Catoupi Eh bé i feaut l' vouloir ! J' sais pos si vous aimez bin d' rimplir vo déclaratieon d'impôt (cha m'éteonn'reot), mais mi, in tout cas, j'aime pos cha. Adeon, j' m'ai dit qu' j'alleos l' faire pa l'internet, su «taxonwep», vu qu'on dit tout partout qu'ch'est pus facile. D'abord, j'ai qu'minché pa l' déclaratieon d' mes parints; ch'est pos campliqué, vu qu'i n'a foque eine paire de chiffes à mette. Je m' connecte su l' site «a des quoi», et on m' dit qu' ch'est fort simpe, i n'a foque à mette eul liméreo d' carte d'intité, eul liméreo d' carte sisse, et on orchevra, dins dix jours, ein code par eul poste pou pouvoir rimplir eul déclaratieon pa l'internet !
13juin 2012 par Arnitoile I-a eine paire de s'maines, j' vous aveos raqueonté qu' j'éteos tout ormué pasque j'aveos été chez Codolette, et qu'elle n'aveot pos arrêté d' démépriser su l' Tour de France! J' vous aveos dit ç' que j'in pinseos. Tins, ceulle vielle mègère, elle ne busie même pos à tous les liards qui vont caire su l' ville grâce au tour. D'ailleurs no bourguemette, que tout l' meonte i sait que ch't'ein heomme honnête comme pos deux, i l'a dit héaut et clair. Pour ein euro dépinsé pa l' Ville, ch'est pos moins d' six qui vont orcaire su Tournai!Ch'est éaute cosse que les chintimes qu' les banques i deonn'tent comme intérêts.
30 mai 2012 par Catoupi L'ESTU, ch'est l' club de handball de Tournai. Et vous l'avez seûr'mint vu dins l' gazette, no n'équipe tournaisienne elle meonte in divisieon ein! Ein évén'mint, vous n' pinsez pos ? Feaut l' dire, ichi à Tournai, on a des gins qui s' démèn'tent et qui z'arriftent à faire des miraques. Qu' cha soiche in handball, water-polo, ping-pong (pardeon, in tennis de tape), et j'in passe.
23 mai 2012 par Pichoulit Quand i-arrife l'meos d'mars, cha comminche, on in veot acore eine ou deux in avril mais au meos d'mai, on fait l'plein: j' veux parler des fiêtes dins l'z'écoles. Ch'est surtout l'z'écoles maternelles et primaires qui seont in actieon. L'z'écoles secondaires, eusses, ch'est putôt des portes ouvertes qu'i feont, ch'est vrai que cha n's'reot pos facile d' faire canter su l' scène dins ein déguis'mint leu grands élèfes, j' pinse que cha n' prindreot pos. N'impêche, eine fiête scolaire dins eine école, ch'est pos fiête pou tertous. Et j' conneos bin d'z'inseignants qui s'cass'tent l' tiête in s' démindant quoi ç'qu'i veont faire c't'ainnée.
9 mai 2012 par Catoire I-a eine paire de meos, on a hérité d'nos infants ein tchien. Infin normal'mint i-éteot mis in pinsieon chez nous-eautes in attindant. In attindant d'ête adopté éné. Ah on n' deveot pos s'in faire, on alleot mette des affiches tout partout et in deux s'maines de temps no d'mandeu d'asile à quate pattes, i-alleot trouver ein nouvieau maîte. Ch'est cha, qui ch'est qui va adopter ein tchien d'siept ans passés et qui n' supporte pos d'treop les p'tits infants ? Pos grand meonte bin seur et ch'est normal éné.
16 mai 2012 par Arnitoile Milliards, j'sus tout débalté ! J'orviens d'chez Codelette, ceulle vielle harpielle qui reste à Kain ; elle n'a pos arrêté d'démépriser su l'Tour de France ! Elle dit qu'cha va coûter tchier, non seul'mint tout ç'que l'Ville elle deot payer au Tour de France, des mille et des mille, qu'au total cha fait deux chint mille euros, mais in puque tous les ouverriers de l'Ville mobilisés d'puis des meos pour cha, et après quand i faudra tout r'mette in orte. Et pindant qu'i font cha, i n'font pos éaute cosse, qu'elle rajoute ! Alors qu'i pourreotent récurer les fossés, réparer les trottoirs ou nettier toutes les crasses qui traîn'tent par tierre.
2 mai 2012 par El Soyeu du bas de l’ cinse Ej’ me souviens quanç’que j’éteos rambile - dins les ainnées mil nuef chint chinquante-chinquante-cheonq, cha n’ me rajeunit pos - j’alleos d’timps in temps pourméner à travers camps et dins les pâtures qu’i-aveot tout près de l’ maseon d’ mes parints. Les jeudis, i m’arriveot alfeos d’ partir tout l’après-deîner - car à l’époque, on aveot congé du jeudi et pos du mercredi comme asteur - et quanç’que j’orveneos de m’ pourménate, bin esquinté, qu’ j’aveos respiré l’ beon air de l’ campane, j’aveos bramint faim, ej’ soupeos bin et après j’alleos dins m’ lit jusqu’au lind’main matin dormir du sommel du jusse. Ch’est vrai qu’à ç’ moumint-là, i n’éteot pos questieon d’orwettier l’ télévision; ed’ toute faceon, i n’ d’aveot pos acor beauqueop et puis cha n’éteot pos à l’ portée d’ tout’s les bourses.
25 avril 2012 par Tiête de lard Cha y-est, i n'a pus qu'eine paire de queops à dormir et nos visins Français i veont d'aller voter. Ch'est vrai qu' nous eautes tertous ichi à Tournai et dins l' z'invireons, on aim'reot bin d' savoir qui qu' ch'est qui va ête el' nouvieau Présidint d' nos amisses Français, et ch'est pour cha qu'i d'a beauqueop qui suiftent l'z'élections présidintielles in France. Mi, je n' rate pos ein débat ou l' journal parlé in France.
|
Quand on dit « ein grand heomme », ch’est pos l’ même que « ein heomme grand ». Par eximpe, el’ général de Gaulle, ch’éteot ein grand heomme grand. Ichi, ch’est « seul’mint » d’ein grand heomme qu’on va parler, vu qu’i n’ fait pos ein mète septante.
Bin seûr, on saveot bin qu'i-aveot des greos innuis d' santé. Mais tout n' même, on aveot l'espoir qu'i pass'reot au-d'zeur. Malhureus'mint, i-a follu qu' dix jours avant l' fiête du millième cabaret, l' mauvaisse nouvelle elle nous cait d'ssus. On est tertous bin abattus : Rudy i-est parti.
