28 novembre 2018 par les cancheonniers

« Mon cœur est rouge et blanc », ch'est ainsin que t' finisseos tous tes mails que t' nous inveyeos même depuis t' lit d'hôpital ces derniers temps.

Pasque ouais, t' coeur i-éteot tout intier à Tournai, au Cabaret, tout intier in rouche et blanc. No patois, i-a lonmint que t' l'aveos dins l' sang. D'jà dins l'z'ainnées septante, su les planques d' l'orvue, te jeueos les jeones prumiers. T' réplique « Bé, neon, neon, pou asteur cha va aller vite » quand te jeueos l' rôle de Lionel, tertous i l'intind acore.

T'aveos même côtoyé Albert Coens quand te t'occupeos des jeones du Racing dins ces mêmes ainnées. T'as acore pris des responsabilités au basket... neon vraimint, on peut dire que t' saveos orlever tes manches. Te nous as r'joints à l' Compagnie in 2010, après qu' t'aveos gagné l' concours Prayez avé l' cancheon « J'aim' pos l' saucisse ». Tout d' suite, no public i t'a apprécié, i feaut dire que t'aveos l'art de nous faire rire et d' célébrer l' joie d' vife. T' talint i s'a dév'loppé dins tous les sens. « On beot des pintes », fait partie du répertoire à chaque queop qu'on veut fiêter les plaisis d' tous les jours, « L'fonctionnaire » i n'éparne pos les gins d' ceulle catégorie, t'as même mis Rudy et Polo su l' même véleo pour « A véleo ». Mais te l' diseos ti-même : « Eine vie » ch'éteot t' cancheon préférée, eine de ces cancheons qu' tertous voudreot avoir écrit ein jour. I- a dins ceulle cancheon, tout t' sens de l'humain, tout l' poésie, tout l' sinsibilité qu'i-a foque les mots patois qu'i peuv'tent les traduire.

Su les planques des grands cabarets, t'éteos acor eine vedette, in cantatrice autrichienne, avé l'autodérisieon pou raqueonter t'n opératieon d' la hanche ou acore dins l' rôle d'Albert Coens dins l'orprisse du « Relais d' la puce », dins les brèves de comptoir que t'as jeués avec t' comparse Jo, ces brèves qui seont asteur incontournapes dins nos spectaques futurs. T'éteos tout cha, Prési : ein talint pluriel, modeste mais tell'mint apprécié d' tertous. Mais neon contint d'animer les planques du ponteon, t'as pos hésité eine minute pou ti printe l' tiête de l' Compagnie i-a cheonq ans d'ichi. Au service de TA ville, de TON patois, ch'éteot t' marque d' fabrique. T'as laiché t'n impreinte, t'as tissé des liens avec nos amisses du Bistreot ou acore avec les géants athois, t'as orlevé tes manches avec tout t' famile pou l' réussite de nos grands cabarets, t'as rassimblé tertous autour de ç'n esprit d' compagnie. Ch'est cha l' messache que t' nous as laiché.

I-a ein an d'ichi, te nous diseos qu' t'éteos prêt à acore diriger l' Cabaret pindant cheonq ainnées, mais l' destin t'in a impêché. Mais t'n esprit, t' souv'nir veont rester à jamais dins l'histoire de « ceulle belle société » comme diseot René Godet.

Alors, Prési, à r'voir et merci. Si aujord'hui, on a l' cœur mansé, si t'n absince elle va nous peser, t' dernier messache, li, i va rester...

Si te veos Albert, Félicien, Jean-Pierre, Rudy et tous les éautes, dis-leur bin que comme ti, no cœur i-est rouge et blanc.

Tes cancheonniers

"Ah, les feimmes, in n' saurait plus s'in passer"

12 décembre 2018 par Pichoulit

I-éteot eine feos... ein peont avec des treos à qui on vouleot faire du mau à ses treos.

Adeon, l' peont in questieon, vous l'avez orconnu, j' supposse, i-a invité ses amisses les eautes peonts pou définte s'n'existince qui-est menacée pa l's ingénieurs qui n' seont pos Tournaisiens et des décideus tournaisiens qui n' seont pos... ingénieux.

On a ainsin réuni l' leong du quai d' l'arsenal eine masse de peonts.