Ov'là nos cancheons !
(paroles et musique d’Eugène Landrieu)
1.
J’viens vous trouver Marraine pour mi vous anneoncher
Et à Grand-père aussi que j’vas béteôt m’marier
Bé garcheon ch’est de t’n’âche, et cha nous fait plaisi
Si on s’plait inter vieux on aime les jeones aussi
A t’baptêm’ te brayeos, ej m’in rappelle acor,
Tout in berlant ainsin, te m’arroseos bin fort
T’mamère elle in rieot
Pindant que j’li canteos
Refrain :
Ch’est ainsin dins no ville
Te n’sareos pos l’canger
Prinds les garcheons les files,
Tout’s tiêt’s sous l’mêm’ bonnet !
2.
D’aussi leong qu’je m’souvienn’, t’éteos ein p’tit bringand,
Te n’aveos pos t’ parel pou jeuer tous les plans :
Ein’ feos t’mamère elle dit ; « Grand-pèr’ tout tranquill’mint
T’iras quère à l’écol’ à midi, no gamin »
Mi, comm’ j’éteos in r’tard, in r’meontant l’rue Clercamps,
J’te veos sonner aux port’s et bin vit’ foute el camp.
T’mamère a berteonné,
Mais mi j’li ai canté :
(Au refrain)
3.
Pus tard, t’n’as pos eu d’chanç’, t’a fallu êt’ soldat,
Dins l’temps ch’teot ein’ affair’, asteur ch’est pus rien d’cha !
Dins ein coin d’no commot’ j’aveos bin mi d’côté
Ein’ pétit’ noirte loque et te d’as profité !
T’nous a récompinsé, braf’ pétit garcheonnal
Quand t’nous a rapporté tes galeons d’caporal !
Et comme tout l’meonte brayeot
Ch’est ta qui nous canteos :
Au refrain)
4.
A l’occasieon d’tes noç’s, te n’aras pos d’cadéau
Mais te n’y perdras pos, on a ichi ç’qu’i t’féaut ;
Avé Grand-père hier nous l’aveons décidé
Et j’sus certain garcheon, qu’te vas ête inchanté
Te veos ceull’ vielle horloch’, j’l’ai toudis connu’ là
Ell’ vient d’vos vieux parints, si t’veux cha s’ra pour ta.
Te berch’ras tes infants
Au tic-tac in cantant :
(Au refrain)
Paroles d’Edmond Godart et musique d’Eugène Landrieu
Dins l’temps, quand ch’teot fiête,
Vous s’in souv’nez bin
Pou fair’ tourner l’ tiête
Et mette l’intrain
On danseot l’ quadrille
L’ polka, l’ mazurka
Pou nos jeones filles,
Asteur feaut mieux qu’ cha
Aqueurez, acoutez, c’ que nous-éaut’s on a trouvé
Refrain
Ch’est à Saint-Piat
Ch’est bin connu dins tout l’ ville
Qu’ la chance est là !
Pour cha, on n’ se fait pos d’ bile
Avé nous-éaut’s av’nez faire ein’ pétit’ reonte,
Av’nez mes gins, cha ira, in chœur on cant’ra
Ch’est à Saint-Piat
Ch’est bin connu dins tout l’ ville
Qu’ la chance est là !
Pour cha on n’ se fait pos d’ bile
Dins tout l’ ruache, on sara fair’ canter l’ meonte
Vous voirrez comme on rira
V’nez tous à Saint-Piat
2.Quand i-a du vint d’ bisse
À les communieons
Les vieill’s de l’ hospice
Feont du rodomeont
Pas’qu’aux récollettes
I-espéreot’tent bin
Tous, in grant’ toilette,
Aller d’ssus l’ moulin
Et, sans s’ fair’ treop prier
Canter l’orfrain du quartier
VOIR REFRAIN
3.Si, d’ssus no n’églisse
On a r’mmémoiré
L’ neom d’ein occulisse
Qui s’a fêt r’marquer
Ch’est pour nous ein’ gloire
Mais, sans êt’ brayoux,
On aim’reot qu’Histoire
S’rappell’ du Pichou
Si la Vill’ nous l’ rindreot
Ch’est à s’n’honneur qu’on criereot
Au refrain
4 Dins l’ paroisse intière
On n’ conneot foqu’ cha ;
Depuis l’ quai Tall’Pierre
Tout jusqu’à l’ Chita !
Dins l’ ru’ Cherquefosse
Et même au bassin
On intind les gosses
Chuffler, fin contints
L’ nouvel’ reont’ de Saint-Piat
Que tout l’ vill’ nous inviera
Au refrain
Ein ormète à beon marché – Charles Maillet
1.I-a des gins blancs comm’ des morts et secs comm’ des picreons
Qui feont des faceons
Et n’trouèf’tent rien d’beon !
Ces vierreux, à s’mette à tape i n’eont jamais d’plaisi,
I n’se norriss’tent qu’au macaroni !
I z’eont peur que du cras
Détraqu’ leu n’estomac…
Mais j’pins’ qu’à vife ainsin
I n’a pos d’agrémint.
J’minch’ tout ç’qui s’présinte
Et je m’rimplis l’vinte :
Des frites et des moules
Et de l’ratatoule,
Des saurets, des penn’tièr’s à l’casaque,
Du mutieau, des oués, des coucoubaques ;
De l’soupe à l’ogneon,
Ch’est m’péché migneon,
Mais j’aim’ tout autant
Du fromach’ puant
Et je m’sins v’nir les iéaux
D’vant ein plat d’hariqueots…
Fait’s comm’ mi, mes gins
Et vous s’port’rez bin !
2. Au qu’minch’mint qu’j’éteos marié, m’feimm’ voulant m’fair’ plaisi,
M’demandeot toudis :
« Quoi ç’que t’minch’s chéri ?
A l’école ménagèr’, j’ai suivi les cours six meos
J’te f’rai des plats à t’in léquer les deogts ! »
Mais mi, l’copant au court,
J’li diseos, tous les jours :
N’te deonn’ pos tant d’tracas
Ch’est bin pus simp’ que cha…
Au refrain
3.J’vas vous dir’ pourquoi ç’que j’fais partie d’tant d’sociétés,
Je n’deos pos l’mucher,
Ch’est pour el’souper !
Ch’est ç’jour-là que j’vas l’pus voleontiers à l’réunieon :
Je n’voudreos pos l’manquer pour ein gambeon !
Et pour faire l’menu
Comm’ je n’sus pos nunu,
Quand j’deos donner m’n’avis,
V’là ç’que j’répeonds toudis…
Au refrain
4.Quand on m’veot passer in vill’, ferm’ dins mes godilleots,
Mêm’ in f’sant m’bouleot
Toudis rigoleo,
On s’demante alfeos commint ç’que j’fais pour ête ainsin,
A m’n’âche, acor leuger et l’cœur contint !
Eh bin, ch’est pos ein s’cret:
L’ov’là si vous voulez…
M’n’ormèt’, je l’deonn’ pour rien,
Acoutez bin m’n’orfrain :
Refrain
Jamais je n’m’esquinte,
Je n’me feonç’ pos l’vinte !
J’fais cha tout bell’mint
Et j’m’orposs’ souvint !
V’là m’deviss’ : bin minger et bin boire ;
Ch’est l’meilleu, dins la vie, on peut m’croire !
N’ouvrer que ç’qu’i feaut,
In boire eine à l’feos,
Vif’ pour fair’ beonn’ chère
Et n’jamais s’in faire !
La mitan de l’santé
Ch’est d’rire et d’s’amuser !
Fait’s comm’ mi, mes gins,
Et vous s’port’rez bin !!
(Henri Thauvoye)
1.
Ch’est nous éaut’s les gosses
De l’Vill’ de Tournai :
Ein’ bint’ de p’tit’s rosses
Traînant d’sus les quais !
Sans ein’ beonne avisse,
On nous veot souvint,
Toudis plein d’malice,
Fair’ rager les gins !
Refrain
On in fait d’tous les sortes :
Sonner à les portes (bis)
Et fair’ cair’ les séeaux
Quand i seont plein d’iéeau ! (bis)
2.
L’écol’ nous imbête
On n’a pos b’souin d’cha
Véaut mieux fair’ queuette,
Querir à l’chita !
On n’a pus d’haleine
D’jeuer aux voleurs,
Puis on va d’sus l’Plaine
Vir les P’tits Chasseurs !
Refrain
Au Boul’vard d’sous les arbres
V’là qu’on jeue à marbres (bis)
On s’amuse à s’touiller
Et puis à batt’lier ! (bis)
3.
Près de l’Cathédrale,
Ch’est là qu’on est l’mieux
Pou bin ruer s’balle
Su l’tiêt’ des Mossieux !
Et vlà qu’on dispute
pour ein’ guiss’ de beos
on s’fout des queops d’blutte,
d’cachoire et d’chabeots !
Refrain
Comm’ l’agint nous orwette
On r’jeue à l’guillette (bis)
A l’toupie, au boucheon
Ou bin au rogneon ! (bis)
4.
Mais quand ch’est l’Karmesse
Su l’plach’, queu bonheur !
On séautte à l’punaisse,
D’su les planques on queurt
Pou suif’ les baraques
Sortant d’l’estatieon,
On trouèf’ bin des craques
Au soir… à s’maseon
Refrain
Mopèr’ cri’ : « T’as d’rambiles ! … »
I nous flanqu’ des piles ! (bis)
Et mamèr’, du mêm’ beond,
Ein bieau cachireon (bis)
(Louis François) air : Valentine
1.
J’sus surtout hureux et j’ormercie m’mamère
Qu’j’ai beon estomac et qu’facil’mint j’digère:
J’minche d’ tout in tout temps!
Mais i-a d’s’affair’s pourtant
Que j’aime acor au-d’ssus d’ tout ç’pindant…
Ch’est bin inter nous, in s’cret, que j’ vous l’ confesse:
D’vant ein plat d’ salate em’ vinte i d’vient bénesse !
Aussi quand, pou l’deîner,
J’ veos m’ feimme in préparer, j’ deviens agité ! …
Refrain
Mi, j’ l’avoue, ej’ rafolle avant tout
De l’ salate … (bis)
J’in ming’reos, quand elle est faite à m’ goût,
Jusqu’à d’attraper l’ souglou
Et m’ rint’ malate ! …
Mi, j’ l’avoue, ej’ rafolle avant tout
De l’ salate … (bis)
Ej’ nettie chaqu’ feos l’ dernier
El’ saladier
Qu’i n’ rest’ pus rien!
Car, vraimint, el’ salat’, mi, j’ l’aim’ bin !
Je m’ rappelle acor tout au qu’minch’mint d’ ménache,
M’ feimme, ein cordeon bleu, bin adroite à s’n’ouvrache,
Cacheot, pou m’ fair’ plaisi,
Toudis des plats queusis
Parmi les pus choitt’s, mais mi j’ li-ai dit:
« N’esquint’pos ainsin, chaqu’ jour, tes péauf’s méninches
Pour tâcher de m’ fair’ ç’ que t’aim’reos mieux que j’ minche »
Et à s’n’orell’, tout bas,
J’ li-ai dit: « Fais, pour chaqu’ plat,
De l’salat’, j’aim’ cha!» (refrain)
Je m’ rappelle acor tout au qu’minch’mint d’ ménache,
M’ feimme, ein cordeon bleu, bin adroite à s’n’ouvrache,
Cacheot, pou m’ fair’ plaisi,
Toudis des plats queusis
Parmi les pus choitt’s, mais mi j’ li-ai dit:
« N’esquint’pos ainsin, chaqu’ jour, tes péauf’s méninches
Pour tâcher de m’ fair’ ç’ que t’aim’reos mieux que j’ minche »
Et à s’n’orell’, tout bas,
J’ li-ai dit: « Fais, pour chaqu’ plat,
De l’salat’, j’aim’ cha!» (refrain)
(Louis François)
- Dins l’temps, l’vrai Tournisien
I cacheot les circonstances
Pour, à la min’ de rien,
Pouvoir boire et fair’ bombance !
Pou l’pus p’tit’ fiêt’ de famille,
I trinqu’balleot dins tout l’ville,
D’cabaret in cabaret,
Buvant, trinquant sans arrêt !
Falleot l’intint’ vanter
S’plaisir ed’ bin pinter …Refrain
Printe ein’ crass’ pinte
Et l’sintir déquinte …
Bin tout au feond de s’vinte :
Rien d’mélieu, ch’est certain!
Cha rind ein heomm’ contint !
Cha canche ein vierreux in bienhureux !
Printe ein’ crass’ pinte
Et l’sintir déquinte …
Bin tout au feond de s’vinte :
Ah, wi ! Vraimint, ch’est beon !
Cha vous r’met du mêm’ beond !
Ah ! vife ein’ crass’ pinte! - Au soir, quand i rintreot,
I s’douteot déjà d’avanche
Que s’feimme ell’ barbot’reot :
I-in rieot à t’nir es’panche !
» Ah ! ch’est ta ! Bé t’es t’in orte :
» Faudra élarguir el’ porte !
» N’a pos d’beon sins, ch ‘est honteux!
» Te d’viens jolimint buveu ! »
Mais li, tout à s’gaîté,
S’metteot à li canter. .. (refrain)3.
Ch’est bin cangé d’nos jours:
Te n’trouèf’s pus beauqueop d’beonn’ bière
Pour li dire t’n’amour!
Gar’ ! Pasqu’asteur, ell’ coût’ thièr(e) !
Les d’mis, cha déquind si vite:
In puqu’ d’ein’ cuit’, quelle esquite !
N’faut pos boir’ deux verr’s à l’feos
Pour avoir des clairs boyeaux !
I feaut pourtant canter
Pour maint’nir no gaîté! … (refrain)
1.
Pou l’écol’ mi j’n’ai pos d’ moyen
Et j’ pass’ toudis pour ein vaurien;
Obligé, jusqu’à quatorze ans,
D’user mes maréeonn’s su les bancs,
Pou les l’ceons pos d’applicatieon,
Mais, j’deos l’avouer, j’ai l’ passieon,
D’puis m’ prumièr’ juness’, j’ai toudis eu l’art
D’ macher du papier buvard !
Pour faire ein’ royal’ maclotte :
Bin l’ortourner dins s’ bajotte,
Puis bin l’ ruer,
Sans hésiter,
Tout nett’ dins l’ beonn’ directieon…
Puis faire attintieon
Pou l’ punitieon.
Quand l’ maîte in rach’, vous orwette,
Féaut conserver s’n’ air bébette;
Si t’es vu, t’es foutu,
Si ch’est sans, ch’est amusant…
Gare au ceu qui va racuser,
I-est sûr de s’ plan, i s’ra sûr’mint dressé !
2. Ein jour que l’ maîte i dessineot
Des chrysanthèmes d’su l’ tabléau,
J’ m’apprêteos à li appliquer
Ein’ fleur in puque dins s’ bouquet.
J’ veyeos d’jà l’effet du papin,
Quand l’ maît’ s’ortourne brusquemint;
I m’orwett’ froid’mint, s’avanchant d’sur mi,
Et m’ dit : « Je te tiens l’ami… »
J’ai dû avaler l’ maclotte,
Qui-a resté dins m’n’épiglotte !
Je m’sins rougir,
Prêt à vomir,
L’ maît’ m’attrap’ par el’ gosier,
Veut, sans pitié,
M’ fair’ dégobiller !
Puis i m’a flanqué à l’ porte,
Mi, pour que l’ maclotte ell’ sorte,
J’y alleos, d’ mes deux deogts :
Pus j’ tateos, pus j’l’infeoncheos !
Pétèt’ qu’on m’aveot raccusé…
In attindant, ch’est mi qui-éteot dressé !
3.
L’ lind’main, j’aveos mal aux boyéaux
Et l’ maît’ toudis, li, m’orwettieot ;
J’ n’oseos pos d’mander l’ permissieon
Pour aller faire em’ commissieon.
Ah !… mô Dieu !… je m’ sins défaiblir…
Pus moyen d’ savoir m’orténir…
Panf !… cha a parti, comme ein queop d’ fusil,
Tout l’ meonte i d’éteot saisi…
Elle éteot passé l’ maclotte
Et je l’ sinteos dins m’ culotte !
J’éteos tout freod
Mais cha brûleot !
L’ maîte i m’ dit d’ein air furieux :
« Avoue ! cha s’ra mieux !
J’ te tiens mon fieu ! »
Comme i-aveot compris l’affaire,
Vraimint, je n’ pouveos pus m’ taire;
J’ li ai dit : « Bé, Mossieu,
Si vous êt’s vraimint curieux,
Si vous l’ voulez, j’ vas vous l’ moutrer,
L’ maclott’ qu’hier ein noir aveot chuché ! »
1.
J’aveos pourtant d’mindé à Dieu
De n’pos m’faire morir à p’tit feu
Feaut croir’ qu’i-a éaut’ cosse à pinser
Pasque j’vas béteôt trépasser
Depuis deux heures que j’sus t’ichi
Tertous i s’acharn’tent après mi
J’ai ramassé cheonq queops d’coutieau
Dins l’vinte, mes gampes et l’bas de m’deos
Et puis j’ai vu ein’ viell’ sorcière
Qu’elle plonqueot m’carcass’ tout intière
Dins eine espèce de grand caudreon
Qu’elle fait cauffer comme ein démeon
Déjà j’intinds les cris d’sauvache
Ceuss’s qui sur mi s’mettreont in rache
J’vas ête minger et on m’a eu
J’sus l’l’apin du lundi perdu
2.
J’ai toudis vécu honnêt’mint
J’veos pos pourquoi feaut qu’in ç’momint
Ch’est mi qui sert de sacrifice
À ces galfars, à ces jocrisses
J’suis v’nu au meonte à Ram’gnies Chin
J’aveos pour père ein greos flamind
Qui m’répéteot m’pétit’ rambille
Ch’est ta l’pus braf de tout l’famile
In amour quand j’sus dev’nu grand
J’ai toudis fait m’n ouvrache à temps
J’vous l’jur’, j’n’ai jamais raté m’queop
J’ai ‘té papa 48 feos
Aussi jugez de m’grand chagrin
Quand j’pins’ que j’laiche des orphelins
Avant d’morir j’ai l’cœur findu
J’sus l’lapin du lundi perdu
3.
Quand dins m ‘camuche on a v’nu m’caire
Pou m’conduir’ jusqu’à l’plache Saint-Pierre
Je m’demindeos ç’qu’i mattindeot
J’pinseos mêm’ vir, ein’ séquoi d’bieau
Au lieu d’cha on m’a assomé
Écorché, saigné, dépieauté
Et m’fourure sans qu’on m’ l’demante
On l’a vindue treos francs chinquante
Inv’loppé dins du papier gris
Tout nu j’sus t’arrivé ichi
On m’a pindu à ceull’ ferniête
In plein’ gélée, pour ête bin raite
Et j’aveos qu’eine consolatieon
Les passant f’sant ceull’ réflexieon
« R’wettiez ç’ichi, qu’i-est bin dodu
Ch’t’ein vrai lapin d’lundi perdu »
4.
Asteur que j’sus dins ceull’ cass’role
Cha n’veot pus l’pein’ que je m’désole
Dins dix minut’s cha s’ra fini
J’s’rai avalé et tout s’ra dit
Aussi j’vas moutrer qu’j’ai d’l’étoffe
Et j’dirai in vrai philosophe
Ch’t’ein grand honneur pour ein lapin
D’ête mingé par des Tournaisiens
Mingez, buvez, riez, cantez
Ch’est jour de fiête aux Cheonq Clotiers
Surtout n’vous in faît’s pos pour mi
Tout ç’que j’souhait’ ch’est d’êt’ bin cuit
Et qu’à ç’soir, tertous in écheo
Insann’, vous répétiez ces meots
Que j’dis au momint d’êt’ foutu :
« Vif Tournai et s’lundi perdu »
Mon cœur est rouge et blanc
Lorsqu’à travers le temps
Je pense à toi Tournai
Mon cœur est rouge et blanc
Et c’est un cœur d’enfant
Qui bat pour toi Tournai
J’ai tant couru tes vieilles rues
Tranquilles
Qu’il n’est pour moi que toi
Ma ville
Mon cœur est rouge et blan
Et c’est un cœur d’amant
Que j’ai pour toi, pour toi, Tournai
E. Baudimon
Refrain :
J’vous assur’ qu’in ville,
L’lindi parjuré
Ch’est dins chaqu’ famille
Ein jour bin d’siré !
1.
A peine que l’diape a mis ses bottes
Tout l’meonte est él’vé dins l’maseon ;
L’mopèr’ beot ses trois-quat’ chinottes
Pour erguérir es’n’émotieon ;
Puis v’là tout d’ein queop que l’mamère
D’pus longtemps in train d’busier,
S’adréchant à s’famille intière,
D’mant’ : « Quoi ç’qu’on f’reot bin pou souper ?
(Refrain)
2.
« Mi j’aim’ fell’mint l’pétit’ saucisse,
Dit ein des garcheons, cha ch’est m’goût ! »
« Mi j’vous assur’, dit l’fill’ Clarisse,
Qu’ein morcieau d’viéeau ch’est l’meilleu d’tout ! »
Ein éaute infant d’mante ein’ cout’lette,
Mais l’pèr’ leu dit : « Cré neom d’ein tchien !
A Tournai pou bin fair’ ceull’ fiête,
L’ceu qui n’a pos d’lapin n’a rien » (Refrain)
3.
L’mamère tout in chifflant ein’ goutte,
Dit : « Vraimint mopère i-a raiseon ! »
Là-d’sus les v’là tertouss in route
Chaquein pou s’pétit’ commissieon.
Pindant qu’les infants au boutique,
Veont quère ogneons, preones et raisins
L’père et l’mère attrap’nt ein’ bell’ chique
Tout in marchandant les lapins ! (Refrain)
4.
Pour orvénir de l’Plach’ Saint-Pierre,
L’lapin est mis dins ein moucheo,
A chaque cheoncliache i traîn’ par tierre
Et l’tiêt’ fait soupett’ dins l’rucheot !
L’pourchéeau n’s’ingraiss’ pos à l’ieau claire :
Ch’est là l’raisonn’mint d’tous ces gins !
Au souper tout l’meont’ fait beonn’ chère
Mêm’ si cha croque dins leus dints !
(Refrain)
5.
Pindant que s’n heomm’ va boire ein verre,
In attindant l’moumint d’minger,
L’feimm’ , par ein d’ses infants, fait faire
Les billets qu’i faudra tirer.
Elle arrinch’ tell’mint bin l’affaire
Qu’noué feos d’sus dix ch’est l’père qui-est l’seot
Ell’ trouèf’ que ch’est l’pus bell’ manière
D’li fair’ toudis rimplir el peot ! (Refrain)
6.
Après l’souper, ch’est dins l’usache,
On s’réunit in société :
Nieur de Dieu, mes gins, queu plucache
A l’bière, au café, au péqué !
Et puis, quervés comme des andoules,
In s’quittant l’lind’main au matin,
On brondièl’ dins tous les bédoules
In cachant à r’trouver s’quémin !
(Refrain)
7.
Si l’feimme a eu l’bonheur d’êt’ Reine
Ell’ le fait vir d’vant de s’coucher :
Ell’ danse, ell’ crie, ell’ se démène,
Ell’ menace s’n’heomme de l’buquer !
A la fin, ç’t’ichi s’fout in rache,
Mais s’feimme li dit : « tais-ta, t’es l’seot ! »
Du queop, v’là la guerre au ménache
Et la Reine attrape ein claqueot !
(Refrain)
1.
Leray l’a dit, dins les guerr’s de la France,
Quand l’Caporal s’apprêteot à buquer,
S’ortournant su s’n’officier d’ordonnance :
« Dis deonc, l’ami, c’qu’on peut béteôt qu’mincher ? »
No n’ait’-de-camp s’ortourneot tout d’ein’ traque,
R’wettieot au leon et puis diseot comme cha
« Sa Majesté, on peut donner l’attaque,
« On peut qu’mincher, les Tournaisiens seont là ! »
2.
D’aussi longtemps que l’mémoire l’permette,
Cha ‘té comm’ cha, dins la guerr’, dins la paix !
D’Jérusalem, tiès qui feonch’ les ferniêtes ?
Tous les prumiers, ch’est deux infants d’Tournai !
Et Godefroid, tout in suivant leu trache,
D’ein’ voix d’tauréau, crieot à ses soldats :
« On peut passer, pou tertous i-a de l’plache,
« On peut rintrer, les Tournaisiens seont là ! »
3.
Ein peo pus tard, quand les Rois, homm’s de tiête,
F’seottent tuer nos pèr’s pou des brins d’tchien,
Etant d’su l’pouint d’attraper ein’ doguette,
I v’neottent querr’ l’appui des Tournaisiens
Le Roi Louis connisseot bin ceull’ sorte
Et i diseot, in s’mettant d’su l’mat’las :
« J’orposse en paix, ne fermez pas la porte,
« J’peux m’endormir, les Tournaisiens seont là ! »
4.
Dix-huit chint trinte éclate et la Belgique
Tout d’ein seul beond à Bruxell’s a volé
A pied, à qu’veau, heomm’s posés et pratiques,
Autour du Parc, nos gins veont s’imbusquer.
Les Brabanceons, in erwettiant leus faches,
Ont demandé : « Quoi qu’ch’est d’ces gaillards-là ? »
Quand i-eont su d’quoi, i-eont dit : « Nous sommes à plache,
« Nous sommes sauvés, les Tournaisiens seont là !
(Air : Les p’tits pois)
Ch’est bin connu, n’féaut pos pour cha ête honteux,
L’Tournisien minch’ bin et même alfeos pour deux
Quand i s’troueffe à tape, à tous les plats i-ortouque;
De s’marreonne i deot défair’ souvint l’blouque
Et quand i s’décite à s’mette ein’ feimm’ su l’deos,
Ch’est ein’ cuisinière à s’in chucher les deogts !
Aussi, quand ej’ pass’, tous les jours, dins l’ruache,
I-a des odeurs qui anneonch’tent l’plucache
Refrain
Comme i sint l’ratatoul’, du mêm’ queop
Mi j’in attrap’ les ieaux !
Seûr que l’feimme elle y toul’ l’z’hariqueots,
Carott’s ou bin navieaux !
Dins l’peot d’fier je l’veos qu’ell’ pèque
Et déjà ell’ se pourlèque !
Ah ! modieu. qu’i sint beon
J’in béfielle et cha queurt jusqu’à d’sus m’minteon
- Dins les sociétés, au souper d’tiêt’ de vieau,
I fait n’chèr’ de Dieu comm’ si ch’s’reot du nouvieau !
On peut li servir l’pus grant’ des gross’s saucisses,
I chiqu’ra tout sans in laicher ein’ guisse !
Et, comm’ dit l’cancheonn’, l’jour par li tant d’siré
Ch’est, sans auquein doute l’lundi parjuré
Ch’est surtout du soir qu’on s’apercheot qu’ch’est fiête
Pau sintimint qui vient d’tous les ferniêtesRefrain
I sint d’sus l’Grand-Plach’ comme au roduit
Qu’on va minger l’lapin
I s’démêl’ dins l’cass’role, i-est bin cuit
Dins les preonn’s, les raisins !
Gare à l’salate aux choux rouches
D’sus l’tarte, l’crèm’, cha ch’est couche
Vingt bougr’s, comme i sint beon !
J’in béfielle et cha queurt jusqu’à d’sus m’minteon - Si, à l’processieon, i fait huit jours intiers,
Cha n’est pos seul’mint pour arroser s’gosier
Les pieds pa d’zous 1’tap’, ch’t’ainsin qu’i fait karmesse,
S’i va à l’foir’, ch’est pou les boul’s à l’graisse !
Ch’s’ra du même aux Saqu’s Saint’-Magrite ou Saint-Piat
Jamais i n’laiss’ra es’ n’appétit aux plats !
El’ soir du Toussaint, cha s’ra l’grand régalache
Qu’à dins l’rulette l’beonn’ naque s’dégacheRefrain
On minch’ des coucoubaqu’s : plein l’séieau
On in a démêlé !
Et on va canger s’panche in tonnieau
Qu’on n’sara pus chuffler !
L’burr’ qu’on plaqu’ comm’ ein’ implate,
Avé n’couch’ de castonate
Cha glich’ tout seu, ch’est beon,
J’in béfielle et cha queurt jusqu’à d’sus m’minteon
Tiès qui n’aim’ pos d’fair’ beonn’ chèr’, j’vous d’mante ein peo
Et j’in veos pus d’ein que s’lanque ell’ fait l’drapeau
Quoisque vous diriez d’mett’ su vo n’estomaque
Ein cras sauret, des penn’tierr’s à l’casaque ?
I d’a qui ming’reott’nt des bourlett’s tous les jours,
D’éaut’s i z’aim’tent mieux l’tarte à preonn’s d’chez Mamour
L’ein l’fromach’ puant ou bin acor des moules
L’verdi, pou souper, mi, ch’n’est pos des m’noules
Refrain
On fait des coul’s de Suiss’, dins leu jus
Nageant comm’ dins l’chireop !
Pour euss, je m’freos traîner ed’ sus…..
C’qu’ein mal él’vé i direot
J’d’ai dit assez, j’m’in vas vite,
M’feimme, aujourd’hui, fait des frites
Et de l’soupe à l’ogneon
J’in béfielle et cha queurt jusqu’à d’sus m’minteon !
Georges DELCOURT