13 juillet 2016 par Catoupi

Je n' tappelle pos Willie, pasque t' manman elle n'aimeot pos cha. Et j' veux ichi t' dire merci pour tout ç' que t'as fait pou no n'équipe de fotbal belche.

Quand te l'as orpris i-a d' cha quatre ans, l'équipe elle éteot bin leon dins l' class'mint mondial. La Belgique elle n'aveot pus été à eine coupe du meonte ou ein eureo depuis 2002.

Grâce à ti, et à les jeueus bin seûr, on a été in quart de finale à l' coupe du meonte, et ichi à l'eureo. Je n' parle même pos du class'mint mondial... ch'est vrai qu' ch'est pos cha l' pus important.

T'as réussi à mette ein esprit d' groupe. Et avé l' capitaine Kompany, t'aveos ein relais parfait su l' terrain.

Malhureus'mint, ç'ti-chi i s'a blessé avant l' tournoi. Puis berdaf, on perd conte l'Italie. Et directemint, t'es-t-attaqué par les journaleus. Même ein ou deux jeueus, pos fort "courtois", i-eont comminché à t' critiquer. Tout cha pour eine prumière défaite, que ch'éteot pos conte n'importe qui. In puque, on areot pouvu au moins égaliser si l'z'italiens i n'areottent pos fait tout plein d' feautes d'anti-jeu.

Eine paire de jours après, comme on éteot qualifiés pou les quarts, on s' veyeot d'jà les meilleus du tournoi. Ch'est cor les journaleus qui diseottent cha. Ch'est vrai que queonte l'Hongrie, l'équipe elle a été impressionnante. N'impêche que ch'éteot resté 1-0 pindant lommint, et qu'on areot aussi pu avoir eine sale blaque. Comme quoi, ein match i peut toudis tourner dins ein sens ou bin l'eaute...

Et puis v'là l' Pays d' Galles, qu'on a toudis difficile à jeuer contre eusses. Et re-berdaf, malgré ein beon début, alors qu' "i n'aveot pus qu'à", tout i s'a écroulé.

Et les journaleus i z'orcomminch'tent à s'acharner sur ti et à essayer d' meonter les jeueus conte ti. Et ces "espécialisses" d' journaleus i s' mettent à parler d' tactique et à dire que t' deos démissionner.

Bé mi, je n' pinse pos cha. Ch'est pos de t' feaute si les jeueus i ratent leus occasieons, tout n' même ? Et si les définseus i n' tienn'tent pos leur heomme ! Et si i-a eu des blessés et des suspindus ! Et si les arbites i n' veot'tent pos des corners et des pénaltys !

Mi, j'in ai marre des journaleus qui s'amus'tent à démolir. T'as fait quatre ans d' bieau bouleot, cha a fait vibrer tout l' Belgique à chaque match, cha mérite du respect. L'imbiance qu'on a là eu, ch'éteot formidape. Et ch'est pour cha qu' je l' répète acor ein queop, in espérant qu' te restes :

MERCI MARC !

Catoupi