1° novembre 2017 par Catoupi

No planète, tertous i l' sait bin, elle se réqueauffe. I feaut faire eine séquoi pou limiter l'z'émissieons d' CO2, diminuer l' gaspillache, faire des produits orcyclapes... sineon, on queurt à l' catastrophe et nos p'tits-infants i d'vreont respirer d' l'air in boutelle, et s' mucher pa-d'zous ein parasol tout du leong d' l'ainnée.

El' film d' Al Gore, ia eine paire d'ainnées, i-a bin fait comprinte à tertous que l' situatieon elle est grafe. I-a des documintaires, d'z'artiques d' journal, et même des cancheons, qui dis'tent aussi qu'i-est grand temps d' faire attintieon.

Bé ch'est bin bieau tout cha ! In attindant, ç' qui s'reot bin, cha s'reot qu' nos heommes et feimmes politiques i f'reottent eine séquoi avec. Si cha coût'reot moins tcher pou installer des pannéaux solaires par eximpe. Ou si l'z'horaires des trains i s'reottent pus intéressants, avec moins d'ortards, on pourreot user moins d'essince ou d' diesel. Et si on pourreot utiliser ein carburant pus respectueux de l' nature et moins polluant...

Mais i n'a pos qu' les heommes politiques ! I-a aussi tous les gins comme vous et mi ! Et là ch't'eine éaute paire de manches ! Pasqu'on sait toudis bin dire à les z'éautes tout quoi ç' qu'i doiftent faire, mais quand ch'est à nous-z'éautes, te peux toudis chuffler poupoule !

Ainsin, tertous i dit qu' i feaut d' l'énergie ornouv'lape ! Mais quand on dit qu'on va mette ed'z'éoliennes à cheonq chints mètes de t' maseon, te dis qu' cha va démolir el' paysache...

Pourtant je n' trouèfe pos qu' ch'est laid, eine éolienne... Dins l' temps, i-aveot des moulins dins tous les couins; et quand on va à la mer, on in veot acor eine paire, et nos infants i-z-ouvèrtent leus mirettes pour admirer ces vestiches ed' l'incien temps. Ahais, dins l' temps, i n'aveot pos d' l'élestrique tout partout, adeon on profiteot du vint ou du courant d' l'ieau des rivières pou moute l' grain.

Bin seûr, i n' feaut pos faire n'importe quoi, ni orfuser l' progrès. Mais i n' feaut pos non pus orfuser tout ç' qui va permette ed' prolonger l' vie su no beonne vielle tierre. Et ch'est pos pasque les Américains et les Chinois i seont lents à l' détinte qu'on deot faire parel, pasqu'alors i n'a jamais perseonne qui va bouger l' pétit deogt.

Et est-ce qu'i s'reot pus facile de construire des pistes d' neiche artificielle, qui consomm'tent bramint d'énergie, que d' faire eine séquoi qui sauv'garte no nature ?

J'espère toudis qu'i n'a pos ein d' mes infants qui m' dira ein jour : "Te sais, papa, je n' veux pos avoir d'infants pasqu'i n'areont pos bramint d'espoir ed' vife su ceulle tierre que t' génératieon elle nous a laichée..."

Catoupi